Ўтганларни хотирлаш, кексаларни эъзозлаш - инсоний бурчимиздир

9 май куни туманимиздаги Хотира боғи ҳар қачонгидан ҳам гавжум бўлди. Бу ерга уруш ва меҳнат фахрийлари, туман ҳокимлиги, муассаса, корхона ва ташкилотлар раҳбарлари, депутатлар, ҳарбийлар ва кенг жамоатчилик вакиллари ташриф буюрдилар.

Хотира ва қадрлаш куни муносабати билан ўтказилган тадбирда сўз олганлар таъкидлаганидек, кишилик тарихидаги энг қонли, энг катта йўқотиш ва мислсиз қурбонларга, эл-юртимиз ўртасида қанча-қанча мусибат ва офатлар, ғам-аламларга, бева-бечоралар ва етимларнинг пайдо бўлишига сабаб бўлган бешафқат уруш тугаганидан буён орадан 70 йил ўтди. Лекин юртимизда бирорта хонадон йўқки, бу машъум урушни эсидан, хаёлидан чиқарган бўлса.

Агар урушдан олдин мамлакатимизда 6,5 миллионга яқин аҳоли яшаган бўлса, шундан 1,5 миллиондан кўпроғи жангларда қатнашган. Ёки ўша пайтдаги халқимизнинг тахминан учдан бир қисми қўлига қурол олиб, жангу жадалларда иштирок этган, қонини тўккан.

Ўша ёвуз урушда 500 мингга яқин юртдошларимиз ҳалок бўлган, қанча одам бедарак кетган, қанча-қанча инсонлар майиб-мажруҳ бўлиб қайтган.

Иккинчи жаҳон урушида туманимиздан 4 минг 344 нафар нафар аскарлар қатнашган бўлса, шуларнинг 2724 нафар нафари она юртига қайтиб келмаган. Бу рақамлар халқимизнинг фашизм устидан ғалаба қозонишга қандай улкан, ҳеч унутилмас ҳисса қўшганини кўрсатади ва буни бирортамиз ҳам эсимиздан чиқармаслигимиз даркор.

Ҳа, Иккинчи жаҳон урушида ҳалок бўлган минглаб юртдошларимиз хотирасини ёд этиш, оловли жанггоҳлардан омон қайтган боболаримизга, оғир кунларни сабр-бардош билан енгган, машаққатли дақиқаларда ҳам ўзлигини йўқотмаган, имони бутун юртдошларимизга ҳурмат-эҳтиром кўрсатиш том маънода миллий қадриятга айланди.

2015 йилнинг "Кексаларни эъзозлаш йили” деб эълон қилинганлиги муносабати билан кексаларга, жумладан, уруш қатнашчилари ва ногиронларга кўрсатилаётган чуқур ҳурмат ва эҳтиром ҳам уларнинг фаровон ҳаёти учун кенг шарт-шароит ва имкониятлар яратишда намоён бўлмоқда.

Тадбир сўнгида майдон узра маҳзун мусиқа садолари таралди. Давлат ва жамоат ташкилотлари, касаба уюшмалари ҳарбий оркестр садолари остида мангу ёниқ олов монументи пойига гулчамбарлар қўйди.

Сўнгра уруш ва меҳнат фронти фахрийлари учун "Ўзбегим" кафесида дастурхон ёзилиб, концерт дастури намойиш қилинди. Шу куни туманимизда фаолият юритаётган "Манғит такси", "Люкс такси", "Баракат такси" номли йўналишсиз такси хизматини кўрсатувчи компанияларнинг енгил автомашиналари нуронийлар хизматида бўлди.

Қуйида сана муносабати билан ташкил қилинган тадбирлардан фотолавҳалар акс эттирилган.

Ушбу манзилда эса мавзуга доир видеолавҳа жойлаштирилди.