Ватан ҳимоячилари куни муносиб нишонланди
Мамлакатимизда 14 январь санаси Ўзбекистон Республикасининг суверенитети, ҳудудий яхлитлиги, аҳолининг тинч ҳаёти ва хавфсизлигини ҳимоя қиладиган соҳа вакиллари – Ватан ҳимоячилари куни ҳамда Ўзбекистон Республикаси Қуролли Кучлари ташкил топган кун сифатида нишонланади. Бу йил Ўзбекистон Республикаси Қуролли кучлари ташкил топганига 33 йил тўлиши муносабати билан бутун юртимиз бўйлаб катта байрам шодиёналари бўлиб ўтмоқда.
Амударё туманида ҳам Ватан ҳимоячилари куни кенг тарзда муносиб нишонланди. Туман Маданият бўлимида ташкил этилган байрам тадбирига ҳарбийлар, ҳуқуқни муҳофаза қилувчи органлар вакиллари, нафақадаги фахрий ҳарбийлар таклиф қилинди.
Байрам тадбири Ўзбекистон ва Қорақалпоғистон Республикалари давлат мадҳиялари садолари билан бошланди.
Тадбирни туман ҳокимининг биринчи ўринбосари Фахриддин Юсупов табрик сўзи билан очиб берди. У ўз нутқида бугунги кунда Янги Ўзбекистонни барпо этиш йўлида эришаётган барча ютуқ ва марраларимизда Қуролли Кучларимиз ва уларнинг сафларида ўз вазифасини сидқидилдан адо этаётган минг-минглаб ҳарбийларимизнинг муносиб ҳиссаси бор эканлигини алоҳида таъкидлади.
Шунингдек тадбирда сўзга чиққанлар Ватан ҳимояси энг шарафли касблардан бири эканлигини, ўз она Ватанини, юрт мустақиллигини қўриқлаш – юксак шараф эканлигини, Ватанни қўриқлаш бу ўз уйини, оиласини ҳимоя қилишни англатишини ҳамда ушбу байрам барча Ўзбекистонликларнинг умуммиллий байрами эканлигини таъкидладилар.
Байрам тадбири туман Маданият бўлими ижодкорлари томонидан тайёрланган ажойиб чиқишлар, бетакрор куй-қўшиқлар билан давом этди. Хонандалар Ватанни, истиқлолни, тинчлик ва дўстликни мадҳ этувчи куй-қўшиқлар ижро этиб, барча тадбир иштирокчиларига байрамона кайфият бағишладилар.
Тадбир мобайнида Ватанимиз сарҳадларининг дахлсизлигини сақлашда, юрт ҳимоясида, тинч ва осойишта ҳаёт кечиришимизда, ёшларга ватанпарварлик туйғуларини сингдиришда фидойилик билан хизмат қилаётган, ушбу шарафли ишларга ўзининг муносиб ҳиссасини қўшиб келаётган бир гуруҳ соҳа вакиллари туман ҳокимлиги томонидан ташаккурнома ҳамда эсдалик совғалари билан тақдирланди.
Таъкидлаш жоизки, ушбу байрам нафақат ҳарбий хизматчилар, балки айни вақтда армия сафларида ўз бурчини ўтаб қайтган ватандошларимиз ва келгусида ҳарбий хизматга борадиган минг-минглаб навқирон йигитларнинг байрамидир. Юртимизда ушбу сана муносабати билан ҳар йили тантанали тадбирлар ўтказилиб, Ватан ҳимоячиларига чексиз ҳурмат ва эҳтиром кўрсатилади.
Халқимиз ҳамиша ўзининг мард, жасур ўғлонлари билан фахрланиб келган. Йигитларимиз ота-онаси ва оиласини, ўзи яшаётган юрт тупроғини муқаддас билиб, Ватан ҳимояси учун доимо шай туришни бурч деб ҳисоблайдилар. Мазкур байрамнинг кенг нишонланиши халқимизнинг ўз Миллий Армиясига нисбатан чексиз ҳурмати, алп йигитларига бўлган ишончининг амалий ифодасидир.
Халқимиз мард ва жасур ҳарбийларимиз тимсолида Ватанни ҳимоя қилишдек дунёдаги энг улуғ ишни шараф билан адо этиб, Жалолиддин Мангуберди, Амир Темур, Бобур Мирзо сингари буюк аждодларимизнинг шонли анъаналарини муносиб давом эттириб келаётган она юртимизнинг чинакам қалқонларини кўради.
Барча Ватан ҳимоячиларини байрам билан табриклаймиз!
Чарос Арслонова, туман ҳокимлигининг Ахборот хизмати раҳбари.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
