Vatan himoyachilari kuni munosib nishonlandi
Mamlakatimizda 14-yanvar sanasi Oʻzbekiston Respublikasining suvereniteti, hududiy yaxlitligi, aholining tinch hayoti va xavfsizligini himoya qiladigan soha vakillari – Vatan himoyachilari kuni hamda Oʻzbekiston Respublikasi Qurolli Kuchlari tashkil topgan kun sifatida nishonlanadi. Bu yil Oʻzbekiston Respublikasi Qurolli kuchlari tashkil topganiga 33-yil toʻlishi munosabati bilan butun yurtimiz boʻylab katta bayram shodiyonalari boʻlib oʻtmoqda.
Amudaryo tumanida ham Vatan himoyachilari kuni keng tarzda munosib nishonlandi. Tuman Madaniyat boʻlimida tashkil etilgan bayram tadbiriga harbiylar, huquqni muhofaza qiluvchi organlar vakillari, nafaqadagi faxriy harbiylar taklif qilindi.
Bayram tadbiri Oʻzbekiston va Qoraqalpogʻiston Respublikalari davlat madhiyalari sadolari bilan boshlandi.
Tadbirni tuman hokimining birinchi oʻrinbosari Faxriddin Yusupov tabrik soʻzi bilan ochib berdi. U oʻz nutqida bugungi kunda Yangi Oʻzbekistonni barpo etish yoʻlida erishayotgan barcha yutuq va marralarimizda Qurolli Kuchlarimiz va ularning saflarida oʻz vazifasini sidqidildan ado etayotgan ming-minglab harbiylarimizning munosib hissasi bor ekanligini alohida taʼkidladi.
Shuningdek tadbirda soʻzga chiqqanlar Vatan himoyasi eng sharafli kasblardan biri ekanligini, oʻz ona Vatanini, yurt mustaqilligini qoʻriqlash – yuksak sharaf ekanligini, Vatanni qoʻriqlash bu oʻz uyini, oilasini himoya qilishni anglatishini hamda ushbu bayram barcha Oʻzbekistonliklarning umummilliy bayrami ekanligini taʼkidladilar.
Bayram tadbiri tuman Madaniyat boʻlimi ijodkorlari tomonidan tayyorlangan ajoyib chiqishlar, betakror kuy-qoʻshiqlar bilan davom etdi. Xonandalar Vatanni, istiqlolni, tinchlik va doʻstlikni madh etuvchi kuy-qoʻshiqlar ijro etib, barcha tadbir ishtirokchilariga bayramona kayfiyat bagʻishladilar.
Tadbir mobaynida Vatanimiz sarhadlarining daxlsizligini saqlashda, yurt himoyasida, tinch va osoyishta hayot kechirishimizda, yoshlarga vatanparvarlik tuygʻularini singdirishda fidoyilik bilan xizmat qilayotgan, ushbu sharafli ishlarga oʻzining munosib hissasini qoʻshib kelayotgan bir guruh soha vakillari tuman hokimligi tomonidan tashakkurnoma hamda esdalik sovgʻalari bilan taqdirlandi.
Taʼkidlash joizki, ushbu bayram nafaqat harbiy xizmatchilar, balki ayni vaqtda armiya saflarida oʻz burchini oʻtab qaytgan vatandoshlarimiz va kelgusida harbiy xizmatga boradigan ming-minglab navqiron yigitlarning bayramidir. Yurtimizda ushbu sana munosabati bilan har yili tantanali tadbirlar oʻtkazilib, Vatan himoyachilariga cheksiz hurmat va ehtirom koʻrsatiladi.
Xalqimiz hamisha oʻzining mard, jasur oʻgʻlonlari bilan faxrlanib kelgan. Yigitlarimiz ota-onasi va oilasini, oʻzi yashayotgan yurt tuprogʻini muqaddas bilib, Vatan himoyasi uchun doimo shay turishni burch deb hisoblaydilar. Mazkur bayramning keng nishonlanishi xalqimizning oʻz Milliy Armiyasiga nisbatan cheksiz hurmati, alp yigitlariga boʻlgan ishonchining amaliy ifodasidir.
Xalqimiz mard va jasur harbiylarimiz timsolida Vatanni himoya qilishdek dunyodagi eng ulugʻ ishni sharaf bilan ado etib, Jaloliddin Manguberdi, Amir Temur, Bobur Mirzo singari buyuk ajdodlarimizning shonli anʼanalarini munosib davom ettirib kelayotgan ona yurtimizning chinakam qalqonlarini koʻradi.
Barcha Vatan himoyachilarini bayram bilan tabriklaymiz!
Charos Arslonova, tuman hokimligining Axborot xizmati rahbari.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
