Ҳуқуқни муҳофаза қилувчи идораларнинг Мувофиқлаштирувчи Кенгаши йиғилиши бўлиб ўтди
Бугунги шиддатли замон, дунёда содир бўлаётган турли вазиятлар бизга тинчликнинг, хотиржамлик туйғусининг нақадар бебаҳо эканини англатмоқда. Жамиятдаги ана шу тинчлик ва осойишталикни сақлашда ҳуқуқни муҳофаза қилувчи органларнинг ҳиссаси катта. Уларнинг сергаклиги, тинимсиз саъй-ҳаракатлари натижасида қанчадан-қанча кўнгилсизликларнинг олди олинади. Билиб-билмай жиноят кўчасига кириб қолганлар ўз жазосини олади, уларнинг аксарияти эса тўғри йўлга қайтади.
Амударё туманида фаолият юритаётган ҳуқуқни муҳофаза қилувчи идораларнинг Мувофиқлаштирувчи Кенгаши йиғилишида ҳам ҳудудда қонунийликни мустаҳкамлаш, фуқароларнинг ҳуқуқ ва эркинликларини муҳофаза қилиш, жиноятчилик ва ҳуқуқбузарликларнинг олдини олиш борасида 2024 йилда амалга оширилган ишлар ва жорий йил учун мўлжалланган устувор вазифалар муҳокама қилинди.
Йиғилишда туман ҳокими Собир Хўжаметов, ҳуқуқни муҳофаза қилувчи органлари масъуллари ва фуқаролар йиғинлари раислари иштирок этди. Йиғилиш давомида 2024 йилда жиноятчиликка қарши курашиш, ҳуқуқбузарликларнинг олдини олиш ва жамоат хавфсизлигини таъминлаш, ижтимоий-иқтисодий соҳалардаги муаммолар ва йўл қўйилган камчиликлар танқидий таҳлил қилинди.
Туман Прокурори – Мувофиқлаштирувчи Кенгаши раиси Баҳром Машарипов ўз маърузасида 2024 йилда қонунлар ижроси юзасидан ўтказилган 100дан ортиқ назорат тадбирларида 1 минг 969та қонун бузилиш ҳолатлари аниқланиб, 439та прокурор назорати ҳужжатлари қўлланилганини, келиб тушган жами 923та мурожаатларнинг 700дан ортиғи бевосита прокуратурада кўрилганлиги, ўтказилган сайёр қабулларда 481дан ортиқ жисмоний шахслар ва юридик шахслар вакилларининг муаммолари тингланганлигини ҳамда аҳолининг ҳуқуқий маданиятини ошириш мақсадида 400дан ортиқ тарғибот тадбирлари ўтказилганлигини маълум қилди.
Прокуратура органлари томонидан аниқланган қонунбузилиш ҳолатларининг келиб чиқишига, асосан идора ва ташкилотлар раҳбарлари, масъул шахсларининг ўз хизмат вазифаларини лозим даражада билмаслиги, касбига садоқат руҳи шаклланмагани, ишлар тўғри ташкил этилмагани, соҳадаги тизимли хато ва камчиликларни, мавжуд муаммоларни ўз вақтида бартараф этиш борасида шахсий ташаббус йўқлиги сабаб қилиб кўрсатилди. Бундан ташқари, хизмат вазифасига юзаки ва масъулиятсизлик билан қараб, қонунбузилиш ҳолатларига йўл қўйган ходимларга нисбатан қатъий чоралар кўрилиши лозимлиги таъкидланди.
Шундан сўнг, йўл қўйилган камчиликлар бўйича масъулларнинг тушунтиришлари ва ҳисоботлари тингланди.
Йиғилиш сўнгида Кенгаш Қарори билан, ҳудудда криминоген вазият барқарорлигини таъминлашда ҳуқуқни муҳофаза қилувчи органлар ҳамда ҳокимлик, идора ва ташкилотларнинг ҳамкорлигини янада кучайтириш бўйича чора-тадбирлар белгиланиб, ижроси назоратга олинди.
Шунингдек, йиғилишда Ўзбекистон Республикаси Президентининг 2025 йил 3 январдаги “2025 йилда республика маҳаллаларида хавфсиз муҳитни яратиш ва ҳуқуқбузарликларнинг барвақт олдини олиш тизими самарадорлигини янада ошириш бўйича чора-тадбирлар тўғрисида”ги Қарори мазмун-моҳияти юзасидан ҳам кенг тушунтиришлар берилди. “Маҳалла еттиликлари”га мазкур Қарор талабларидан келиб чиқиб, жойларда амалга оширилиши лозим бўлган ишлар юзасидан кўрсатма ва топшириқлар берилди.
Амударё туман Прокуратураси
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
