Ғаллачиликни ривожлантиришга бағишланган семинар бўлиб ўтди

Бугунги кунда бутун дунёда озиқ-овқат маҳсулотларига бўлган талабнинг юқорилиги туфайли озиқ-овқат хавфсизлигини таъминлаш, қишлоқ хўжалигидаги мавжуд имконият ҳамда ресурслардан самарали фойдаланиш, ҳосилдорликни ошириш, қолаверса, соҳада янги иш ўринларини яратиш муҳим масалалар сифатида қаралмоқда.

Амударё тумани ҳокимлигининг мажлислар залида ташкил этилган семинар ҳам қишлоқ хўжалигининг муҳим тармоқларидан бўлган ғаллачиликни ривожлантиришга бағишланди. Семинарда республика миқёсидаги аграр соҳа масъуллари, профессор, олимлар кун тартибидаги мавзу юзасидан тақдимотлар орқали кенг тушунчалар ҳамда янги билимлар бердилар.

Семинарда туман ҳокими Собир Хўжаметов, ҳоким ўринбосарлари, тумандаги қишлоқ хўжалиги соҳаси масъуллари, тижорат банклари раҳбарлари, тегишли ташкилотлар раҳбарлари ҳамда ғаллачилик билан шуғулланувчи фермер хўжаликлари раҳбарлари иштирок этдилар.

Туман ҳокими Собир Хўжаметов бугунги кунда муҳтарам Президентимиз ташаббуси билан қишлоқ хўжалиги тармоқларини ҳар томонлама ривожлантиришга алоҳида эътибор қаратилиб, аграр соҳа билан шуғулланувчилар учун янги имкониятлар ҳамда шарт-шароитлар яратилганлигини, улардан ўз вақтида унумли фойдаланиш лозимлиги хусусида сўз юритди. Туман ҳокими ўз сўзида соҳа ривожи йўлидаги ислоҳотларни алоҳида таъкидлаб ўтди.

Жумладан, давлатимиз раҳбарининг Қорақалпоғистон Республикасининг мавжуд табиий хом ашё ресурсларидан самарали фойдаланиш орқали саноат, қишлоқ хўжалиги соҳаларини жадал ривожлантириш, ижтимоий ва ишлаб чиқариш инфратузилмаларини яхшилаш, тадбиркорлик ва хизматлар соҳасини қўллаб-қувватлаш, шу асосда аҳоли бандлигини таъминлаш ҳамда турмуш даражасини ошириш мақсадида имзолаган “Қорақалпоғистон Республикасини комплекс ижтимоий-иқтисодий ривожлантириш ва аҳоли бандлигини таъминлашнинг қўшимча чора-тадбирлари тўғрисида”ги 66-сонли қарори билан кенг имкониятлар эшиклари очилганлигини алоҳида қайд этди.

Шунингдек, семинарда қишлоқ хўжалиги маҳсулотларини етиштиришдаги асосий мақсад мўл ҳосил олиш ва яхши даромад олишдан иборат эканлиги таъкидланиб, ҳосилдорликни оширишда қатор тавсиялар берилди.

Хусусан, экинларнинг ҳосилдорлиги юқори бўлишида асосан тўғри амалга оширилган агротехник тадбирлар, ўсимлик ўсиши ҳамда ривожланиши давридаги об-ҳаво шароити, бундан ташқари, тупроқнинг хусусиятлари, навларни тўғри ташлаш, замонавий технологиялар имкониятларидан фойдаланиш каби омиллар муҳим аҳамият касб этиши алоҳида қайд этилди.

Қолаверса, бошоқли дон экинларини етиштиришда сув таъминоти оғир майдонларга сув тежовчи ёмғирлатиб суғориш технологияларини жорий этиш ҳисобига ҳосилдорликни янада ошириш, уруғни ғўза қатор ораларига аниқ меъёрларда ва бир хил чуқурликда экиш орқали уни тежаш ҳамда барвақт униб чиқишини таъминлаш зарурлиги таъкидланди.

Семинарда мутахассислар фермер ва деҳқонларга юқори ғалла ҳосили олиш бўйича зарур тавсия ва тушунчалар бериб, саволларига илмий асосланган жавоблар бердилар.

Чарос Арслонова, туман ҳокимлигининг Ахборот хизмати раҳбари.