Gʻallachilikni rivojlantirishga bagʻishlangan seminar boʻlib oʻtdi

Bugungi kunda butun dunyoda oziq-ovqat mahsulotlariga boʻlgan talabning yuqoriligi tufayli oziq-ovqat xavfsizligini taʼminlash, qishloq xoʻjaligidagi mavjud imkoniyat hamda resurslardan samarali foydalanish, hosildorlikni oshirish, qolaversa, sohada yangi ish oʻrinlarini yaratish muhim masalalar sifatida qaralmoqda.

Amudaryo tumani hokimligining majlislar zalida tashkil etilgan seminar ham qishloq xoʻjaligining muhim tarmoqlaridan boʻlgan gʻallachilikni rivojlantirishga bagʻishlandi. Seminarda respublika miqyosidagi agrar soha masʼullari, professor, olimlar kun tartibidagi mavzu yuzasidan taqdimotlar orqali keng tushunchalar hamda yangi bilimlar berdilar.

Seminarda tuman hokimi Sobir Xoʻjametov, hokim oʻrinbosarlari, tumandagi qishloq xoʻjaligi sohasi masʼullari, tijorat banklari rahbarlari, tegishli tashkilotlar rahbarlari hamda gʻallachilik bilan shugʻullanuvchi fermer xoʻjaliklari rahbarlari ishtirok etdilar.

Tuman hokimi Sobir Xoʻjametov bugungi kunda muhtaram Prezidentimiz tashabbusi bilan qishloq xoʻjaligi tarmoqlarini har tomonlama rivojlantirishga alohida eʼtibor qaratilib, agrar soha bilan shugʻullanuvchilar uchun yangi imkoniyatlar hamda shart-sharoitlar yaratilganligini, ulardan oʻz vaqtida unumli foydalanish lozimligi xususida soʻz yuritdi. Tuman hokimi oʻz soʻzida soha rivoji yoʻlidagi islohotlarni alohida taʼkidlab oʻtdi.

Jumladan, davlatimiz rahbarining Qoraqalpogʻiston Respublikasining mavjud tabiiy xom ashyo resurslaridan samarali foydalanish orqali sanoat, qishloq xoʻjaligi sohalarini jadal rivojlantirish, ijtimoiy va ishlab chiqarish infratuzilmalarini yaxshilash, tadbirkorlik va xizmatlar sohasini qoʻllab-quvvatlash, shu asosda aholi bandligini taʼminlash hamda turmush darajasini oshirish maqsadida imzolagan “Qoraqalpogʻiston Respublikasini kompleks ijtimoiy-iqtisodiy rivojlantirish va aholi bandligini taʼminlashning qoʻshimcha chora-tadbirlari toʻgʻrisida”gi 66-sonli qarori bilan keng imkoniyatlar eshiklari ochilganligini alohida qayd etdi.

Shuningdek, seminarda qishloq xoʻjaligi mahsulotlarini yetishtirishdagi asosiy maqsad moʻl hosil olish va yaxshi daromad olishdan iborat ekanligi taʼkidlanib, hosildorlikni oshirishda qator tavsiyalar berildi.

Xususan, ekinlarning hosildorligi yuqori boʻlishida asosan toʻgʻri amalga oshirilgan agrotexnik tadbirlar, oʻsimlik oʻsishi hamda rivojlanishi davridagi ob-havo sharoiti, bundan tashqari, tuproqning xususiyatlari, navlarni toʻgʻri tashlash, zamonaviy texnologiyalar imkoniyatlaridan foydalanish kabi omillar muhim ahamiyat kasb etishi alohida qayd etildi.

Qolaversa, boshoqli don ekinlarini yetishtirishda suv taʼminoti ogʻir maydonlarga suv tejovchi yomgʻirlatib sugʻorish texnologiyalarini joriy etish hisobiga hosildorlikni yanada oshirish, urugʻni gʻoʻza qator oralariga aniq meʼyorlarda va bir xil chuqurlikda ekish orqali uni tejash hamda barvaqt unib chiqishini taʼminlash zarurligi taʼkidlandi.

Seminarda mutaxassislar fermer va dehqonlarga yuqori gʻalla hosili olish boʻyicha zarur tavsiya va tushunchalar berib, savollariga ilmiy asoslangan javoblar berdilar.

Charos Arslonova, tuman hokimligining Axborot xizmati rahbari.