ДХХ чегара қўшинларига қарашли ҳарбий қисмда “Очиқ эшиклар куни” ўтказилди
Ҳар бир ўзбек хонадонида ўғил бола дунёга келса аскар туғилди, дея суюнчилар улашилиб, элга ош берилади. Албатта, бу бежизга эмас. Дастлаб, оилада ўғил болага ҳақиқий ҳимоячи, эртанги кун ишончи сифатида қаралиб, тарбия берилса, кейинчалик эса жамиятда, таълим масканларида йигитларимизга чинакам ватан ҳимоячиси бўлишлари учун замин яратилади. Бу борада ёшларни ватанпарварлик руҳида тарбиялаш мақсадида ташкил қилинаётган “очиқ эшиклар куни” тадбирларининг аҳамияти катта. Ана шундай тадбирлардан бири яқинда Амударё туманида жойлашган Давлат хавфсизлик хизмати чегара қўшинларига қарашли ҳарбий қисмда ўтказилди.
Тадбирда Амударё туман Мудофаа ишлари бўлими бошлиғи, майор Шуҳрат Маматов, Нукус шаҳар Прокуратураси ходими Фарид Рамазонов, ДХХ чегара қўшинлари масъул офицери Санжарбек Тошматов, ДХХ чегара қўшинлари ходими Миржаҳон Мажидов, шунингдек, туманимизда муддатли ҳарбий хизматни ўтаётган оддий аскарлар ҳамда туман мактабгача ва мактаб таълими бўлимига қарашли умумтаълим мактаблари ўқувчилари қатнашдилар.
Тадбирнинг асосий мақсади ёшларни ватанпарварлик руҳида камол топтириш, уларда шу юрт тақдирига ва келажагига дахлдорлик туйғусини уйғотиш ҳамда чинакам ватан ҳимоячиларини кашф этишдан иборат.
“Очиқ эшиклар куни”да сўзга чиққан масъуллар мактаб ўқувчиларига она юрт сарҳадларида собит қадам бўлиб, ўзи туғилиб ўсган диёрнинг тинчлиги ва осойишталигини сақлаш ҳар бир фарзанднинг муқаддас бурчи эканини алоҳида таъкидлашди. Шунингдек, ватан тинчлиги йўлида фидокорона хизмат қилиб, мардларча ҳалок бўлган бир қатор ҳарбийларимизнинг шарафли умр йўлини ўқувчиларга ибрат сифатида келтириб ўтдилар. Дарҳақиқат, Миллий Армиямизнинг қудратини оширишда мард ва жасур ўғлонларимизнинг ўрни беқиёс.
Миллий армия – ҳар бир давлат мустақиллигининг кафолати, Ватаннинг мустаҳкам қалқонидир. Ёшлар армияда нафақат ҳарбий билим ва кўникмаларга эга бўладилар, балки жисмонан бақувват, иродали ва ватанпарвар инсонлар сифатида шаклланадилар. Муддатли ҳарбий хизмат ёшларга тартиб-интизомли бўлиш, жамоа билан ишлаш ва масъулиятни ҳис қилишни ўргатади.
Шу сабабли ҳам ватан ҳимоячиси бўлиш ҳар бир йигитнинг орзуси, десак муболаға бўлмайди. Йигитларимизда ҳарбий хизматга чақирилгунига қадар йигитлик бурчи қай тарзда адо этилади, ҳарбий техникалардан қай тартибда фойдаланилади, умуман, Армия ҳаёти қандай бўлади, деган саволлар бўлиши табиий.
Тадбир давомида ўқувчилар ушбу саволларга жавоблар олдилар. Ўсмирлар ва ёшлар тадбир давомида муддатли ҳарбий хизматни ўтаётган аскарларимизнинг яшаш жойлари, уларга яратилган шароитлар билан яқиндан танишдилар. Шу билан бирга, улар ҳарбий техникалардан, қурол-аслаҳалардан, хизмат отлари ва хизмат итларидан фойдаланиш, улар билан қай тартибда ишлаш бўйича маълумотга эга бўлдилар.
Тадбир иштирокчилари ҳарбийлардан ўзларини қизиқтирган саволларга тегишлича жавоблар олдилар. Албатта, ўтказилаётган бу каби тадбирлар юртимизда Жалолиддин Мангуберди издошларининг сафини кенгайтиришда, ёшларимизнинг ҳарбий хизматга, она юртга бўлган муҳаббатини янада оширишда муҳим аҳамият касб этади.
Азиза Мадраҳимова
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
