Имтиёзли тавсиянома учун тест синовлари ташкил этилди
Ўзбекистон Республикаси Қуролли Кучлари сафида муддатли ҳарбий хизматни ўтаган ёшлар учун олий таълим муассасаларига киришда имтиёз тақдим этадиган тавсиянома уларнинг келажакдаги таълим ва касбий фаолиятида муҳим ўрин тутади.
7 февраль куни Амударё муҳандислик техникумида туман ҳудудидаги Давлат хавфсизлик хизмати Чегара қўшинларига қарашли ҳарбий қисмларда хизмат қилаётган муддатли ҳарбий хизматчилар ўртасида олий таълим муассасаларига киришда имтиёз берувчи тавсиянома учун тест синовлари ташкил этилди.
Жараён аввалида Ўзбекистон Республикаси Олий таълим, фан ва инновациялар вазирлиги ҳузуридаги Билим ва малакаларни баҳолаш агентлигининг Қорақалпоғистон Республикаси бўлими масъуллари томонидан иштирокчиларга тест жараёнининг тартиби, асосий мезонлари ва муҳим жиҳатлари ҳақида тушунчалар берилди.
Муддатли ҳарбий хизматчиларга имтиёзли тавсиянома бериш жараёни уларнинг хизмат давомида эришган натижалари ҳамда билим савияси асосида баҳоланади. Ушбу жараёнда аскарларнинг жанговар тайёргарлиги, маънавий-маърифий савияси ва назарий билимлари асосий мезон сифатида кўриб чиқилади. Жанговар тайёргарлик – ҳарбий хизмат давомида ўтказилган амалий машғулотларда кўрсатган натижалари асосида, маънавий-маърифий тайёргарлик эса аскарларнинг ватанпарварлик руҳида тарбияланганлиги, интизоми ва ҳуқуқий билимлари даражаси бўйича баҳоланади. Назарий билимларни аниқлаш мақсадида эса ҳарбий хизматчилар математика, физика ва мантиқий тафаккурга оид тест синовларидан ўтадилар.
Тавсиянома ҳарбий хизмат давомида ўзини интизомли, билимли ва фаол сифатида намоён этган аскарларга тақдим этилади. Агар аскар хизмат давомида интизомий қоидабузарликларга йўл қўйган ёки жазо олган бўлса, у тавсиянома олиш ҳуқуқидан маҳрум қилинади. Ушбу тизим, бир томондан, ҳарбий хизмат интизомини мустаҳкамлашга хизмат қилса, иккинчи томондан, олий таълимга интилаётган ёшларни ўз билим ва маҳоратини оширишга рағбатлантиради.
Махсус тест синовлари 100 та саволдан иборат бўлиб, ҳарбий хизматчиларнинг турли йўналишлардаги тайёргарлик даражасини аниқлашга қаратилган. Баҳолаш тизими аскарларнинг жанговар ҳамда маънавий-маърифий тайёргарлиги, шунингдек, математика, физика ва мантиқий тафаккурга оид билимларини қамраб олади.
Тест натижалари ҳарбий хизматни ўтаётган ёшларнинг билим даражасини аниқ белгилаш баробарида, уларнинг келажакда олий таълим муассасаларида ўқиш имкониятини ошириш ҳамда тафаккурини янада ривожлантиришга хизмат қилади.
Тавсияномага эга бўлган ҳарбий хизматчилар олий таълим муассасаларига киришда тест натижалари бўйича тўплаган балларининг 50 фоизи миқдорида қўшимча баллга эга бўлишади. Шунингдек, олий таълим муассасаларига қабул жараёнида ҳарбий хизматни ўтаган абитуриентлар учун алоҳида квоталар ажратилади. Тавсияноманинг амал қилиш муддати уч йил бўлиб, бу ҳарбий хизматдан сўнг ёшларнинг ўқишга кириш режалари устида ишлаши учун етарли имконият яратади. Ушбу имтиёзлар ҳарбий хизматни ўтаган ёшларнинг интеллектуал ривожланишини қўллаб-қувватлаш ва уларнинг келажакдаги таълим жараёнига кенг йўл очиш мақсадида жорий этилган.
Муддатли ҳарбий хизматни ўтаб, олий таълим муассасаларида таҳсил олишни мақсад қилган ёшлар учун бундай имтиёзлар, шубҳасиз, катта аҳамият касб этади.
Шоҳзод Қурбонбоев
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
