Сайёр қабулларда аҳоли муаммолари ўрганилмоқда

Аҳолининг турмуш фаровонлигини яхшилаш, муаммоларни жойига бориб ўрганиш ҳамда қисқа фурсатларда ижобий ҳал этилишига эришишда ҳудудларда ташкил этилаётган сайёр қабуллар муҳим аҳамият касб этмоқда. Шу мақсадда Амударё тумани Чойкўл овулида жойлашган 22-сонли умумтаълим мактабида сектор раҳбарлари ва ёшлар учрашуви ташкил этилди.

Учрашувда туман ҳокими Собир Хўжаметов, секторлар раҳбарлари, корхона-ташкилотлар раҳбарлари, бўлимлар бошлиқлари, Чойкўл овули, Дарё бўйи маҳалласи, Жайхун овули, Қипчоқ шаҳарчаси, Босув маҳаллаларида яшовчи ёшлар ва аҳоли вакиллари ҳамда “маҳалла еттиликлари” масъуллари иштирок этдилар.

Учрашув мобайнида ёшларнинг турли мазмундаги мурожаатлари қабул қилинди, уларнинг аксарияти қабул жараёнининг ўзида ижобий ҳал этилди, қўшимча ўрганиш ва муддат талаб қиладиган мурожаатларнинг самарали ҳал этилиши юзасидан тегишли ташкилотлар масъулларига топшириқлар берилиб, ижроси назоратга олинди.

Хусусан, Чойкўл овулида яшовчи Қудрат Дўсчанов уй шароитида чорвачиликни ривожлантириш учун имтиёзли кредит олишда амалий ёрдам сўраб, Мавлуда Шомуратова оиласида икки киши олий таълим ташкилотида шартнома асосида ўқиётгани сабабли шартнома пулларини тўлашда амалий ёрдам сўраб, Нигора Шомуратова эса келини тиббиёт йўналишида ўқиганлиги боис туман Тиббиёт бирлашмасига ишга жойлашишида амалий ёрдам сўраб мурожаат қилдилар.

Шунингдек, Жайхун овулида яшовчи Сарвар Турсунбоев тадбиркорлик фаолиятини бошлаш учун субсидия асосида асбоб-ускуна олишда, Моҳинур Қўшманова ҳамда Суҳроб Муродбоевлар эса олий таълим муассасасининг шартнома пулларини тўлашда амалий ёрдам сўраб масъулларга мурожаат қилдилар.

Сайёр қабулда Дарё бўйи маҳалласида яшовчи Шоҳрух Шомуродовнинг сафарбарлик чақируви резервидаги хизмат учун шартнома пулини тўлашда, Акмал Камоловнинг наслдор қорамолчиликни ривожлантириш мақсадида кредит маблағи олишда, Музаффар Усмоновнинг онаси доимий даволанишга муҳтож бўлганлиги сабабли дори-дармон олишда амалий ёрдам сўраб йўллаган мурожаатларини ҳам қисқа муддатларда ижобий ҳал этиш бўйича тегишли ташкилотлар раҳбарларига топшириқлар берилди.

Олис ҳудудлар аҳолисининг муаммоли масалаларини жойига бориб ўрганиш ва уларни бартараф қилиш мақсадида Заҳириддин Муҳаммад Бобур номли овулда ҳам сектор раҳбарларининг сайёр қабули бўлиб ўтди.

Сайёр қабулда туман ҳокими Собир Хўжаметов, секторлар раҳбарлари, корхона ва ташкилотлар раҳбарлари, Бобур ва Оқ олтин овуллар, Жумуровул маҳалла ҳамда Жумуртов шаҳарча фуқаролар йиғинларидаги “маҳалла еттиликлари” ҳамда аҳоли вакиллари иштирок этдилар.

Сайёр қабулда аҳоли вакиллари томонидан тадбиркорликни, чорвачилик ва паррандачиликни ривожлантириш учун кредит олишда амалий ёрдам бериш, даволаниш учун моддий ёрдам бериш, фарзандининг олий таълим муассасалари контракт пулларини тўлашда амалий ёрдам бериш каби турли масалалар юзасидан йўлланган мурожаатлар тегишли тарзда ўз ечимини топадиган бўлди.

Таъкидлаш керакки, мамлакатимизда кейинги йилларда йўлга қўйилган тизим катта-кичик раҳбарни одамларнинг ҳаётидан рози бўлиб яшашлари учун шарт-шароитлар яратиш, аҳолининг ҳаёт фаровонлиги ва турмуш сифатини ошириш, муаммоларини ҳал қилиш ва таклифларини тинглашдек эзгу ишларга ундамоқда. Одамлар қалбига қулоқ солиб, уларнинг дард-у ташвишини эшитиш ва муаммоларини ҳал этиш эса олий қадрият даражасига кўтарилди, десак, асло муболаға эмас. Ушбу эзгу мақсадларни амалга оширишда эса энг чекка ҳудудларда ташкил этилаётган сайёр қабуллар муҳим аҳамият касб этмоқда. Амударё тумани ҳокими бошчилигида ўтказилган ушбу сайёр қабул ҳам ана шу мақсадларга қаратилгани билан ниҳоятда катта аҳамият касб этди.

Чарос Арслонова, туман ҳокимлигининг Ахборот хизмати раҳбари.