Sayyor qabullarda aholi muammolari oʻrganilmoqda

Aholining turmush farovonligini yaxshilash, muammolarni joyiga borib oʻrganish hamda qisqa fursatlarda ijobiy hal etilishiga erishishda hududlarda tashkil etilayotgan sayyor qabullar muhim ahamiyat kasb etmoqda. Shu maqsadda Amudaryo tumani Choykoʻl ovulida joylashgan 22-sonli umumtaʼlim maktabida sektor rahbarlari va yoshlar uchrashuvi tashkil etildi.

Uchrashuvda tuman hokimi Sobir Xoʻjametov, sektorlar rahbarlari, korxona-tashkilotlar rahbarlari, boʻlimlar boshliqlari, Choykoʻl ovuli, Daryo boʻyi mahallasi, Jayxun ovuli, Qipchoq shaharchasi, Bosuv mahallalarida yashovchi yoshlar va aholi vakillari hamda “mahalla yettiliklari” masʼullari ishtirok etdilar.

Uchrashuv mobaynida yoshlarning turli mazmundagi murojaatlari qabul qilindi, ularning aksariyati qabul jarayonining oʻzida ijobiy hal etildi, qoʻshimcha oʻrganish va muddat talab qiladigan murojaatlarning samarali hal etilishi yuzasidan tegishli tashkilotlar masʼullariga topshiriqlar berilib, ijrosi nazoratga olindi.

Xususan, Choykoʻl ovulida yashovchi Qudrat Doʻschanov uy sharoitida chorvachilikni rivojlantirish uchun imtiyozli kredit olishda amaliy yordam soʻrab, Mavluda Shomuratova oilasida ikki kishi oliy taʼlim tashkilotida shartnoma asosida oʻqiyotgani sababli shartnoma pullarini toʻlashda amaliy yordam soʻrab, Nigora Shomuratova esa kelini tibbiyot yoʻnalishida oʻqiganligi bois tuman Tibbiyot birlashmasiga ishga joylashishida amaliy yordam soʻrab murojaat qildilar.

Shuningdek, Jayxun ovulida yashovchi Sarvar Tursunboyev tadbirkorlik faoliyatini boshlash uchun subsidiya asosida asbob-uskuna olishda, Mohinur Qoʻshmanova hamda Suhrob Murodboyevlar esa oliy taʼlim muassasasining shartnoma pullarini toʻlashda amaliy yordam soʻrab masʼullarga murojaat qildilar.

Sayyor qabulda Daryo boʻyi mahallasida yashovchi Shohrux Shomurodovning safarbarlik chaqiruvi rezervidagi xizmat uchun shartnoma pulini toʻlashda, Akmal Kamolovning nasldor qoramolchilikni rivojlantirish maqsadida kredit mablagʻi olishda, Muzaffar Usmonovning onasi doimiy davolanishga muhtoj boʻlganligi sababli dori-darmon olishda amaliy yordam soʻrab yoʻllagan murojaatlarini ham qisqa muddatlarda ijobiy hal etish boʻyicha tegishli tashkilotlar rahbarlariga topshiriqlar berildi.

Olis hududlar aholisining muammoli masalalarini joyiga borib oʻrganish va ularni bartaraf qilish maqsadida Zahiriddin Muhammad Bobur nomli ovulda ham sektor rahbarlarining sayyor qabuli boʻlib oʻtdi.

Sayyor qabulda tuman hokimi Sobir Xoʻjametov, sektorlar rahbarlari, korxona va tashkilotlar rahbarlari, Bobur va Oq oltin ovullar, Jumurovul mahalla hamda Jumurtov shaharcha fuqarolar yigʻinlaridagi “mahalla yettiliklari” hamda aholi vakillari ishtirok etdilar.

Sayyor qabulda aholi vakillari tomonidan tadbirkorlikni, chorvachilik va parrandachilikni rivojlantirish uchun kredit olishda amaliy yordam berish, davolanish uchun moddiy yordam berish, farzandining oliy taʼlim muassasalari kontrakt pullarini toʻlashda amaliy yordam berish kabi turli masalalar yuzasidan yoʻllangan murojaatlar tegishli tarzda oʻz yechimini topadigan boʻldi.

Taʼkidlash kerakki, mamlakatimizda keyingi yillarda yoʻlga qoʻyilgan tizim katta-kichik rahbarni odamlarning hayotidan rozi boʻlib yashashlari uchun shart-sharoitlar yaratish, aholining hayot farovonligi va turmush sifatini oshirish, muammolarini hal qilish va takliflarini tinglashdek ezgu ishlarga undamoqda. Odamlar qalbiga quloq solib, ularning dard-u tashvishini eshitish va muammolarini hal etish esa oliy qadriyat darajasiga koʻtarildi, desak, aslo mubolagʻa emas. Ushbu ezgu maqsadlarni amalga oshirishda esa eng chekka hududlarda tashkil etilayotgan sayyor qabullar muhim ahamiyat kasb etmoqda. Amudaryo tumani hokimi boshchiligida oʻtkazilgan ushbu sayyor qabul ham ana shu maqsadlarga qaratilgani bilan nihoyatda katta ahamiyat kasb etdi.

Charos Arslonova, tuman hokimligining Axborot xizmati rahbari.