Уруш фахрийлари – жасорат ва ватанпарварлик намунаси

1989 йил 15 февраль – Совет Иттифоқи қўшинларининг Афғонистон ҳудудидан тўлиқ олиб чиқилган кун сифатида тарихга муҳрланган. Бу сана бутун халқимиз учун унутилмас воқеа бўлиб қолди. Афғон уруши у ерда жанг қилган аскарлар, уларнинг оилалари ва жамият ҳаётига катта таъсир кўрсатган машъум воқеалардан бири эди. Орадан 36 йил ўтган бўлса-да, бу уруш излари ҳали ҳам ўчмаган.

Шу кунларда юртимизда Афғон урушида қатнашган фахрийларга ҳурмат ва эътибор кўрсатиш мақсадида турли тадбирлар ўтказилмоқда. Ана шундай жасур инсонлардан бири – Афғон уруши фахрийси, Амударё туманининг фахрли фарзанди Махсуд Муродов “Ёшларни ватанпарварлик руҳида тарбиялаш учун” медали билан тақдирланди. Шу муносабат билан Амударё туман Мудофаа ишлари бўлими бошлиғи, майор Шуҳрат Маматов, Ўзбекистон “Ветеран” жангчи-фахрий ва ногиронлар бирлашмасининг вакили Баҳодир Жуманиёзов ҳамда уюшма аъзолари унинг хонадонига ташриф буюриб, ҳолидан хабар олишди.

Махсуд Муродов 1961 йил 4 февралда Амударё туманида туғилган. Мактабни 1978 йилда тугатгач, 1979 йилда ҳарбий хизматга чақирилган. У Афғонистоннинг Қобул шаҳрида хизмат қилиб, жанг майдонида оддий аскарликдан сержантликкача кўтарилган. Намунали хизмати туфайли у нафақат жасур жангчи, балки ҳақиқий ватанпарвар сифатида шаклланган.

Ҳарбий хизматдан қайтганидан сўнг, Махсуд Муродов ўз ҳаётини сув хўжалиги соҳасига бағишлади. 1982 йилда Анора Қўчқорова билан оила қуриб, тўрт фарзанднинг меҳрибон отасига айланди. Бугунги кунда ҳам Махсуд Муродов оиласи, маҳалласи ва барча амударёликлар учун қадрли инсон ҳисобланади.

Шу куни яна бир Афғон уруши фахрийси – Саъдулла Юлдашев ҳам “Ёшларни ватанпарварлик руҳида тарбиялаш учун” медали билан тақдирланди. У 1969 йил 1 февралда Тўлқин овулида туғилган. Мактабни тугатганидан сўнг, 1987 йилда ҳарбий хизматга чақирилган. Самарқандда бошланғич ҳарбий тайёргарликдан ўтиб, Афғонистоннинг Қандаҳор вилоятига юборилган. 1988 йилда эса хизматини Россиянинг Сахалин вилоятида давом эттирган.

1989 йилда ҳарбий хизматни тамомлаб, ўз қишлоғига қайтган Саъдулла Юлдашев кўп йиллар қишлоқ хўжалиги соҳасида фаолият юритди. Оила қуриб, турмуш ўртоғи Оқчагул Кенжабоева билан 3 нафар фарзандни жамиятга наф келтирадиган инсонлар қилиб тарбиялашди.

Афғон урушида иштирок этган, ўз ҳаётини Ватанга хизмат қилишга бағишлаган бундай инсонлар юксак ҳурмат ва эътиборга сазовор. Улар жасорат ва матонат тимсоли сифатида бугунги ёшлар учун ўрнак саналади. Мамлакатимизда бундай мард юртдошларимизнинг ҳаёт йўли, фидокорона хизмати ва ватанпарварлик руҳи ҳамиша қадрланади.

Давлатимиз томонидан ҳарбий фахрийларни қўллаб-қувватлаш, уларнинг ижтимоий ҳимоясини таъминлаш ва жасоратларини ёш авлодга етказиш борасида олиб борилаётган ишлар ҳам алоҳида аҳамиятга эга. Зеро, тарих – нафақат ёдгорликлар ва обидалар, балки жасур инсонлар хотираси ва уларнинг ибратли ишлари орқали ҳам қадрланади.

Шоҳзод Қурбонбоев.