Urush faxriylari – jasorat va vatanparvarlik namunasi

1989-yil 15-fevral – Sovet Ittifoqi qoʻshinlarining Afgʻoniston hududidan toʻliq olib chiqilgan kun sifatida tarixga muhrlangan. Bu sana butun xalqimiz uchun unutilmas voqea boʻlib qoldi. Afgʻon urushi u yerda jang qilgan askarlar, ularning oilalari va jamiyat hayotiga katta taʼsir koʻrsatgan mashʼum voqealardan biri edi. Oradan 36-yil oʻtgan boʻlsa-da, bu urush izlari hali ham oʻchmagan.

Shu kunlarda yurtimizda Afgʻon urushida qatnashgan faxriylarga hurmat va eʼtibor koʻrsatish maqsadida turli tadbirlar oʻtkazilmoqda. Ana shunday jasur insonlardan biri – Afgʻon urushi faxriysi, Amudaryo tumanining faxrli farzandi Maxsud Murodov “Yoshlarni vatanparvarlik ruhida tarbiyalash uchun” medali bilan taqdirlandi. Shu munosabat bilan Amudaryo tuman Mudofaa ishlari boʻlimi boshligʻi, mayor Shuhrat Mamatov, Oʻzbekiston “Veteran” jangchi-faxriy va nogironlar birlashmasining vakili Bahodir Jumaniyozov hamda uyushma aʼzolari uning xonadoniga tashrif buyurib, holidan xabar olishdi.

Maxsud Murodov 1961-yil 4-fevralda Amudaryo tumanida tugʻilgan. Maktabni 1978-yilda tugatgach, 1979-yilda harbiy xizmatga chaqirilgan. U Afgʻonistonning Qobul shahrida xizmat qilib, jang maydonida oddiy askarlikdan serjantlikkacha koʻtarilgan. Namunali xizmati tufayli u nafaqat jasur jangchi, balki haqiqiy vatanparvar sifatida shakllangan.

Harbiy xizmatdan qaytganidan soʻng, Maxsud Murodov oʻz hayotini suv xoʻjaligi sohasiga bagʻishladi. 1982-yilda Anora Qoʻchqorova bilan oila qurib, toʻrt farzandning mehribon otasiga aylandi. Bugungi kunda ham Maxsud Murodov oilasi, mahallasi va barcha amudaryoliklar uchun qadrli inson hisoblanadi.

Shu kuni yana bir Afgʻon urushi faxriysi – Saʼdulla Yuldashev ham “Yoshlarni vatanparvarlik ruhida tarbiyalash uchun” medali bilan taqdirlandi. U 1969-yil 1-fevralda Toʻlqin ovulida tugʻilgan. Maktabni tugatganidan soʻng, 1987-yilda harbiy xizmatga chaqirilgan. Samarqandda boshlangʻich harbiy tayyorgarlikdan oʻtib, Afgʻonistonning Qandahor viloyatiga yuborilgan. 1988-yilda esa xizmatini Rossiyaning Saxalin viloyatida davom ettirgan.

1989-yilda harbiy xizmatni tamomlab, oʻz qishlogʻiga qaytgan Saʼdulla Yuldashev koʻp yillar qishloq xoʻjaligi sohasida faoliyat yuritdi. Oila qurib, turmush oʻrtogʻi Oqchagul Kenjaboyeva bilan 3 nafar farzandni jamiyatga naf keltiradigan insonlar qilib tarbiyalashdi.

Afgʻon urushida ishtirok etgan, oʻz hayotini Vatanga xizmat qilishga bagʻishlagan bunday insonlar yuksak hurmat va eʼtiborga sazovor. Ular jasorat va matonat timsoli sifatida bugungi yoshlar uchun oʻrnak sanaladi. Mamlakatimizda bunday mard yurtdoshlarimizning hayot yoʻli, fidokorona xizmati va vatanparvarlik ruhi hamisha qadrlanadi.

Davlatimiz tomonidan harbiy faxriylarni qoʻllab-quvvatlash, ularning ijtimoiy himoyasini taʼminlash va jasoratlarini yosh avlodga yetkazish borasida olib borilayotgan ishlar ham alohida ahamiyatga ega. Zero, tarix – nafaqat yodgorliklar va obidalar, balki jasur insonlar xotirasi va ularning ibratli ishlari orqali ham qadrlanadi.

Shohzod Qurbonboyev.