Афғон уруши иштирокчилари учун байрам тадбири ташкил этилди

Ўтган асрнинг 79-89-йилларида Афғонистондаги фуқаролик уруши ва қуролли тўқнашувларда иштирок этган собиқ Совет иттифоқи қўшинлари 1989 йил 15 февраль куни мамлакат ҳудудидан олиб чиқиб кетилган эди. Ушбу сана Афғон уруши фахрийларининг байрамига айланган. Салкам ўн йил мобайнида Афғонистон ҳудудида бўлиб ўтган ҳарбий ҳаракатларда Республикамиздан 3580 нафар ҳарбий хизматчилар иштирок этган. Анъанага мувофиқ бу йил ҳам Афғон уруши қатнашчилари, жангчи-фахрийлар иштирокида ушбу мамлакатдан собиқ Совет иттифоқи қўшинлари олиб чиқилганининг 36 йиллиги кенг нишонланмоқда. Амударё туманида ҳам сана муносабати билан уруш фахрийларининг аҳоли ва ёшлар билан учрашувлари ҳамда байрам тадбирлари ташкил этилмоқда.

Амударёлик афғон уруши қатнашчилари бўлмиш жангчи-фахрийлар иштирокида тумандаги Хотира майдонига ўрнатилган “Мотамсаро она” ҳайкали пойига гулчамбарлар қўйилди. Байналмилал жанги-фахрийлар Афғонистондаги уруш ҳаракатларида қатнашиб, шаҳид бўлган қуролдошлари хотирасига ҳурмат бажо келтириб, уруш қийинчиликлари, унинг салбий оқибатларини эслаб, юртимиздаги тинчлик мангу бўлишини тилаб дуога қўл очдилар.

Сўнгра тантаналар Манғит шаҳридаги “Diamond” ресторанида давом эттирилди. Бу ерда афғон уруши қатнашчилари бўлмиш байналмилал жангчилар учун байрам дастурхони ёзилди.

Туман ҳокимлиги томонидан ташкил этилган тадбирда ҳокимнинг ёшлар сиёсати, ижтимоий ривожлантириш ва маънавий-маърифий ишлар бўйича ўринбосари Нодирбек Камолов, туман Мудофаа ишлари бўйича бўлим бошлиғи Шуҳрат Маматов, республика Маънавият ва маърифат маркази туман бўлими бошлиғи Ислом Маткаримов ҳамда Ўзбекистон “Ветеран” жангчи-фахрий ва ногиронлар бирлашмасининг тумандаги вакили Баҳодир Жуманиёзов бошчилигида бир гуруҳ фахрий жангчилар иштирок этди.

Байрам тадбирини туман ҳокими ўринбосари Нодирбек Камолов табрик сўзи билан очиб берди. У ўз нуқида Афғонистонда чорак асрча давом этган ўзаро урушларга барҳам бериш учун собиқ иттифоқ армияси сафида сафарбар қилинган, мураккаб шароитларда жанг-у жадалларда қатнашиб, омон қайтган фахрийлар учун 15 февраль – собиқ иттифоқ қўшинлари олиб чиқиб кетилган сана чинакам байрам эканлигини таъкидлади ҳамда уларни байрам билан табриклади. Сана муносабати билан ҳар йили мамлакатимизда турли тадбирлар ўтказилиб, Афғон уруши фахрийларига алоҳида ҳурмат-эътибор кўрсатилаётгани, уларнинг муносиб дам олиши ва саломатликларини тиклашлари учун ҳукуматимиз томондан шароитлар яратилганини қайд қилиб, Афғон уруши фахрийларига ташаккурномалар, эсдалик совғаларини топширди.

Байрам тадбирида сўз олганлар юртимизда жангчи-фахрийларни ҳар томонлама қўллаб-қувватлашга ва ҳалок бўлган ватандошларимизнинг хотирасини абадийлаштиришга катта эътибор қаратилаётганини қайд қилиб, ушбу уруш қанчадан-қанча оилаларнинг ёстиғини қуритгани, бугунги тинч ва осойишта ҳаётимизнинг қадрига етиш, ёшларни ватанпарварлик руҳида тарбиялашда уруш фахрийларининг тажрибаси ва ҳаёт йўлини ўрнак қилиб кўрсатиш лозимлигини қайд этдилар. Афғон урушида ҳалок бўлган фахрийларни хотирлаш ҳар биримизнинг инсоний бурчимиз эканлиги алоҳида таъкидланди.

Маълумотларга кўра, Афғон урушида 65 минг нафар Ўзбекистон фуқаролари қатнашиб, уларнинг 1500 нафардан кўпроғи ҳалок бўлган. Амударё туманидан ҳарбий ҳаракатларда иштирок қилган фуқароларнинг 13 нафари жангларда ҳалок бўлган, 20 нафари урушда яраланган, 278 нафари эса бугунги кунда тинч ва осойишта юртимизда умргузаронлик қилмоқда.

Байрам тадбири мобайнида туман Маданият бўлими санъаткорлари томонидан концерт дастури намойиш этилди. Хонандалар томонидан ижро этилган Ватан, она, тинчлик, шукроналик ҳақидаги шўх-шодон куй-қўшиқлар фахрийларимизга байрамона кўтаринки кайфият бағишлади.

Чарос Арслонова, туман ҳокимлигининг Ахборот хизмати раҳбари.