Жумуртов шаҳарчасида ёшларга эътибор қай даражада?

Юртимизда ёшларнинг таълим олиши, касб-ҳунар эгаллаши ва жамиятда фаол иштирок этиши учун кенг имкониятлар яратилмоқда. Уларни ижтимоий ҳимоя қилиш, тадбиркорликка жалб қилиш ва бандлигини таъминлаш борасида тизимли чора-тадбирлар амалга оширилаётгани эътиборга молик. Жумладан, Жумуртов шаҳарча фуқаролар йиғинида ҳам ёшлар манфаатларини ҳимоя қилиш ва уларни ҳар томонлама қўллаб-қувватлаш борасида самарали ишлар олиб борилмоқда. 

Хусусан, маҳалладаги ёшлар етакчиси Муяссар Муродова ташаббуси билан 2024 йил давомида “Ёшлар дафтари”га киритилган 16 нафар ёшларнинг ижтимоий ҳимояси таъминланди. Олий таълим муассасаларида таҳсил олаётган 13 нафар талабанинг контракт тўловининг бир қисми қоплаб берилди. Шунингдек, ёшларнинг 2 нафарига субсидия асосида тикув машиналари тақдим этилган бўлса, яна 1 нафарининг сафарбарлик резерви тўлови тўлиқ тўлаб берилди. Ёшларнинг бўш вақтини мазмунли ўтказиш мақсадида спорт мусобақалари, маънавий-маърифий тадбирлар ташкил этилди, бу эса уларнинг жамиятдаги фаоллигини оширишга хизмат қилмоқда. 

Маҳалладаги ҳоким ёрдамчиси Самандар Бобожонов бошчилигида ўтган йили “Ёшлар ва бизнесни қўллаб-қувватлаш йили” давлат дастури доирасида ҳам бир қатор амалий ишлар қилинди. Жумладан, 28 нафар ишсиз ёшлар рўйхатга олиниб, уларнинг 10 нафарига 30 йил муддатга ижара асосида деҳқончилик қилишлари учун ер майдонлари ажратилди. Шунингдек, 5 нафар ёшларга тадбиркорликни йўлга қўйиш учун жами 81 миллион сўмлик кредит маблағлари ажратилиб, иш фаолияти учун зарур техника ва жиҳозлар билан таъминланди.  

Мамлакатимизда ёшларга қаратилаётган эътибор, уларнинг таълим олиши ва меҳнат бозорида муносиб ўрин эгаллаши учун яратилаётган имкониятлар Жумуртов шаҳарчаси ёшларининг ҳам ҳаётларида ўз аксини топмоқда.

Озода Холназарова, Ирода Холназарова - ҚДУ талабалари, таҳририят амалиётчилари.