Амударё туманининг иқтисодий салоҳияти ошиб бормоқда
Амударё туманида 2024 йил давомида ижтимоий-иқтисодий кўрсаткичлар бўйича сезиларли ўсишга эришилди. Туман Статистика бўлимининг дастлабки ҳисоб-китобларига кўра туманда саноат, қишлоқ хўжалиги, қурилиш, чакана савдо ва экспорт ҳажми ошиб, иқтисодий ривожланишнинг барқарор суръатлари кузатилмоқда. Айниқса, кичик тадбиркорлик субъектларининг иқтисодий жараёнлардаги иштироки юқори бўлиб, ҳудуд иқтисодиётининг ривожланишига хизмат қилмоқда.
2024 йилда Амударё туманида саноат маҳсулотлари ишлаб чиқариш ҳажми 2 трлн. 79,7 млрд. сўмни ташкил этиб, 2023 йилнинг мос даврига нисбатан 12,1 фоизга ошди. Аҳоли жон бошига саноат ишлаб чиқариш ҳажми 9 млн 723,7 минг сўмни ташкил этди, бу эса мос равишда 10,3 фоизлик ўсишни англатади.
Туманда асосий капиталга йўналтирилган инвестициялар ҳажми 598,2 миллиард сўмга етиб, ўтган йилга нисбатан 43,6 фоизга ошди. Бу эса ҳудудда иқтисодий фаолиятни кенгайтириш ва ишлаб чиқариш қувватларини оширишга йўналтирилган маблағлар ҳажми ортаётганидан дарак беради.
Қишлоқ, ўрмон ва балиқчилик хўжалиги умумий ишлаб чиқариш ҳажми 3 трлн. 274,5 млн сўмни ташкил этиб, ўтган йилга нисбатан 4,2 фоизга ошди.
Қурилиш секторида ҳам ўсиш суръатлари қайд қилинган. Йил давомида қурилиш ишлари ҳажми 324,8 миллиард сўмни ташкил этиб, бу кўрсаткич 2023 йилга нисбатан 5,4 фоизга ошган. Аҳоли жон бошига қурилиш ишлари ҳажми эса 3,6 фоизга ўсди. Ушбу ўзгаришлар инфратузилма ва уй-жой қурилиши ривожланаётганини тасдиқлайди.
Туманда чакана савдо айланмаси ҳажми 903,7 миллиард сўмга етиб, ўтган йилга нисбатан 12 фоизга ошди. Аҳоли жон бошига чакана савдо ҳажми 4 млн 225 минг сўмни ташкил этди. Бозор хизматлари ҳажми эса 869 миллиард сўмни ташкил этиб, 17,4 фоизга ўсди. Бозор хизматлари ҳажми аҳоли жон бошига 15,4 фоизга ошгани ушбу секторнинг ҳам ривожланиш тенденциясини акс эттиради.
Ташқи савдо кўрсаткичлари ҳам ижобий ўзгаришларни намоён этди. Туманнинг экспорт ҳажми 15,5 миллион АҚШ долларини ташкил этиб, ўтган йилга нисбатан 5 фоизга ошган. Импорт ҳажми эса 1,6 миллион АҚШ долларига тенг бўлиб, 42,1 фоизни ташкил этди. Экспортнинг ошиши ва импортнинг нисбатан пасайиши ички ишлаб чиқаришнинг мустаҳкамланаётганидан далолат беради.
Амударё туманида кичик тадбиркорлик субъектларининг иқтисодий фаоллиги юқори. Саноат соҳасида кичик бизнес улуши 74,8 фоизни, инвестиция соҳасида 50,3 фоизни ташкил этди. Қурилиш секторида бу кўрсаткич 90,9 фоизга етган. Чакана савдода кичик тадбиркорлик улуши 97,9 фоизни, хизматлар соҳасида эса 70,3 фоизни ташкил этди. Экспорт ҳажмининг 94,6 фоизи ҳам кичик тадбиркорлик субъектлари томонидан таъминланган.
2024 йил давомида Амударё туманининг иқтисодий ривожланиш кўрсаткичлари ижобий суръатда ўсди. Саноат, қишлоқ хўжалиги, қурилиш ва хизматлар секторларининг уйғун ривожланиши ҳудуд иқтисодиётининг барқарорлигини таъминламоқда. Кичик тадбиркорликнинг иқтисодий жараёнлардаги улуши юқори бўлиб, бу рақобатбардош муҳит яратиш ва иш ўринларини кўпайтиришда муҳим роль ўйнамоқда.
Шоҳзод Қурбонбоев
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
