51-сонли давлат мактабгача таълим ташкилотида семинар бўлиб ўтди
Болани тўғри тарбиялашда, аввало, у билан тўғри мулоқот қилиш, бола “тили”ни тушуниш муҳим аҳамият касб этади. Шунингдек, кичкинтойларга таълим-тарбия беришда уларни севиш, уларга чинакам меҳр бериш ҳам фойдадан ҳоли бўлмайди.
Маълумки, бугуннинг кичкинтойларини тарбиялаб вояга етказиш, мактаб таълимига йўналтириш ҳар қачонгидан ҳам масъулиятли вазифа ҳисобланади. Боиси, бугунги глобаллашув асрида дунёга келган болакайни хўрозқанд билан алдаб, “сени лайлак олиб келган, ухламасанг қайтадан лайлакларга бериб юбораман…” сингари чўпчакларга ишонтириб бўлмайди.
Ҳа, бугунги ёш авлод зийрак, билағон, зеҳни ўткир. Уларни тарбиялашда ота-онадан ҳам, боғчадаги тарбиячилардан ҳам ўз устида ишлаш, таълим-тарбиянинг замонавий, инновацион методларини билиш ва ўринли қўллай олиш, деган кўникмалар талаб этилади. Бунда, мактабгача таълим ташкилотларида мунтазам равишда ўтказилиб келинаётган семинарларнинг ўз ўрни бор.
Яқинда Амударё тумани Мактабгача ва мактаб таълими бўлимига қарашли 51-сонли давлат мактабгача таълим ташкилотида мактабгача таълим сифатини янада яхшилаш ва тарбиячиларнинг касбий маҳоратини ошириш мақсадида навбатдаги семинар ташкил этилди. Унда тумандаги давлат мактабгача таълим ташкилотлари директорлари, директор ўринбосарлари ва тарбиячилар иштирок этдилар.
Семинарни ташкил қилишдан асосий мақсад – тарбиячилар ўртасида тажриба алмашишни ривожлантириш, болаларнинг таълим-тарбиясида замонавий усулларни амалиётга татбиқ этишдир.
Жараён давомида иштирокчилар тайёрлов, катта ва кичик гуруҳларда тарбиячиларнинг очиқ машғулот жараёнларида иштирок этдилар. Тарбиячиларнинг болалар билан ишлаш услублари, машғулот жараёнидаги педагогик ёндашувлари муҳокама қилинди. Шунингдек, семинар мобайнида тарбиячилар ўзаро тажриба алмашиш имкониятига эга бўлиб, илғор педагогик усулларни амалиётга татбиқ этиш бўйича фикр алмашдилар.
Таҳлиллар натижасида тарбиячиларнинг ўқув жараёнида қўллаётган инновацион усуллари юқори баҳоланди. Семинарнинг асосий қисми тарбиячиларнинг амалий фаолиятини баҳолаш ва уларнинг ишлаш сифати бўйича фикр алмашишга бағишланди. Мутахассислар томонидан тарбиячиларнинг инновацион усулларни қўллашдаги ютуқлари эътироф этилди.
Хусусан, машғулотларда интерфаол методлардан фойдаланиш, болаларнинг қизиқишини ошириш учун ўйинли ёндашувларни татбиқ этиш, тарбиявий жараёнда визуал ва аудио материаллардан самарали фойдаланиш каби жиҳатлар юқори баҳоланди. Шу билан бирга, айрим камчиликлар ҳам қайд этилиб, уларни бартараф этиш бўйича аниқ таклиф ва тавсиялар билдирилди.
Бундай семинарлар тарбиячилар орасида ўзаро тажриба алмашиш, уларнинг малакасини ошириш ва мактабгача таълим сифатини янада яхшилашга хизмат қилади. Шунингдек, соҳа масъуллари томонидан келгусида ҳам бундай тадбирларни мунтазам равишда ўтказиш режалаштирилган.
Азиза Мадраҳимова
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
