Амударё тумани 2-сонли политехникуми – билим ва касбга йўғрилган келажак маскани

Ҳар бир тонг янги имкониятлар эшигини очади. Ҳар бир қадам эса Сизни илм ва муваффақиятга етаклайди. Бугунги кунда билимли ва малакали мутахассисларга эҳтиёж ошиб бораётган бир пайтда, ўз касбингиз бўйича мукаммал билим ва кўникмаларга эга бўлиш муҳим аҳамият касб этади. Агар Сиз муҳандис ёки ихтирочи бўлишни, ёхуд ўз бизнесингизни бошлашни орзу қилсангиз, бу йўл илм олишдан бошланади. Амударё тумани 2-сонли политехникуми айнан шу мақсадда ташкил этилган замонавий таълим муассасаси бўлиб, ўқувчиларга сифатли таълим олиш, назарий билимларни амалий машғулотлар билан бойитиш ва касбий тажриба эгаллаш имконини беради.

Президентимизнинг 2024 йил 16 октябрь кунги “Касбий таълимда малакали кадрлар тайёрлаш тизимини янада такомиллаштириш ва халқаро таълим дастурларини жорий қилиш чора-тадбирлари тўғрисида”ги Фармонига мувофиқ Амударё тумани 2-сонли политехникуми ташкил этилди. Муассаса аввалги Амударё туман 2-сонли касб-ҳунар мактаби негизида ташкил этилган бўлиб, 360 ўринли ўқув мажмуаси сифатида фаолият юритади. Политехникум Қорақалпоқ давлат университетига бириктирилган бўлиб, ўқув жараёни миллий ва халқаро стандартларга мос равишда олиб борилади.

Политехникумда ўқувчилар учун барча зарур шарт-шароитлар яратилган. Замонавий таълим инфратузилмаси, инновацион ёндашув ва юқори малакали мутахассислар иштирокидаги ўқув жараёни бу ерда таълим олишни янада самарали қилади. Муассаса ҳудудида 150 ўринли ишлаб чиқариш устахоналари, фаоллар ва спорт заллари, очиқ спорт майдончалари, лингафон хоналари, махсус касб-ҳунар хоналари, замонавий лабораториялар мавжуд бўлиб, улар ўқувчиларнинг назарий билимларини амалий машғулотлар билан бойитиш ва танлаган касбларига бўлган қизиқишларини ривожлантириш имконини беради.

Шунингдек, замонавий техника ва асбоб-ускуналар билан жиҳозланган устахоналар, компьютер ва мультимедиа синфхоналари орқали ўқувчилар янги технологиялар билан ишлашни амалда ўрганадилар. Ҳар бир ўқувчи учун индивидуал ёндашув, интерфаол дарслар ва кўргазмали таълим усуллари қўлланилади. Электрон таълим платформалари орқали дарс материаллари ва видеодарсларга онлайн кириш имконияти мавжуд.

Бундан ташқари, политехникумда ўқувчилар учун маданий-маърифий тадбирлар, спорт мусобақалари ва турли ижодий танловлар мунтазам ташкил этилади. Ўқувчилар нафақат касбий билим олишади, балки шахсий ва ижтимоий кўникмаларни ҳам ривожлантиришлари мумкин. Шунингдек, иқтидорли ўқувчилар халқаро ва республика миқёсидаги олимпиадалар ҳамда касбий кўникмалар танловларида иштирок этишлари учун имтиёзли дастурлар амалга оширилади.  

Политехникумнинг асосий мақсади – муҳандислик ва техник соҳаларда ўрта бўғин мутахассисларини тайёрлашдан иборат. Бундан ташқари, ошпазлик ва мактабгача таълим ташкилотларининг маиший масалалари менежери каби йўналишларда дуал таълим шакли жорий қилинган бўлиб, иш берувчилар билан ҳамкорлик асосида ўқувчилар ишлаб чиқариш жараёнига жалб этилади. 2025-2026 ўқув йилида Амударё тумани 2-сонли политехникуми бошланғич касбий таълим дастурлари бўйича 9-синф битирувчилари учун автомобилларни таъмирлаш ва уларга хизмат кўрсатиш, пайвандловчи, оқава сув ва сув таъминоти тизимларидан фойдаланиш ва монтаж қилиш устаси, маиший техника жиҳозларига хизмат кўрсатиш ва таъмирлаш, ошпазлик, якка тартибда кийим тикувчи ҳамда рақамли ахборотларни қайта ишлаш устаси йўналишларида таълим олиш имконини тақдим этади.

Шунингдек, ўрта ва ўрта махсус касбий таълим дастурлари бўйича мактабгача таълим ташкилоти услубчиси, кутубхонашунослик ва библиография, спорт фаолияти ҳамда мактабгача таълим ташкилотларининг маиший масалалари менежери каби йўналишларда мутахассислар тайёрланади.

Политехникумда таълим олувчилар ўз мутахассисликлари бўйича амалий тажрибага эга бўлишлари учун ишлаб чиқариш корхоналари ва муассасалар билан ҳамкорлик ўрнатилган. Бундан ташқари, битирувчилар ўзлаштирган модуллари, тўплаган кредитлари ва олий таълим ташкилоти томонидан белгиланган баллар асосида олий таълимнинг тегишли босқичидан ўқишни давом эттириш имконига эга бўладилар.

Шу билан бирга, политехникум турли иш берувчи ташкилотлар билан ҳамкорлик қилгани сабабли, битирувчилар учун меҳнат бозорида ишга жойлашиш имкониятлари анча кенгдир. Касбга эга бўлган ёшлар давлат ва хусусий секторда, стартапларда ва ҳатто ўз бизнесларини бошлашда катта устунликка эга бўладилар.

Политехникумда таълим олиш жараёнида фақат назарий билимлар эмас, балки амалий кўникмаларга ҳам алоҳида эътибор қаратилади. Ҳар бир йўналиш учун махсус жиҳозланган синфхоналар ва устахоналар ташкил этилган бўлиб, замонавий асбоб-ускуналар ва техник жиҳозлар таълим жараёнининг сифатини оширади. Шунингдек, малака ва компетенцияларни ошириш учун қисқа муддатли ўқув курслари ҳам ташкил этилган бўлиб, бу таҳсил олувчиларнинг касбий фаолиятларини тезроқ бошлашларига ёрдам беради. Ҳар бир ўқувчи учун давлат гранти асосида таълим олиш имконияти мавжуд. Шунингдек, умумий ўрта маълумотга эга бўлган талабгорлар учун тўлов-контракт асосида ўқиш имконияти ҳам тақдим этилади.

Таълим жараёнида назарий билимлар билан бир қаторда, талабаларнинг амалий машғулотларда қатнашишлари, реал иш шароитига мослашишлари учун турли ташкилотлар билан ҳамкорлик йўлга қўйилган. Политехникум битирувчилари йўналишига қараб, давлат ва хусусий сектордаги турли ишлаб чиқариш ва хизмат кўрсатиш корхоналарида амалиёт ўташади. Бу эса уларга келажакда ўз мутахассисликлари бўйича тўғридан-тўғри ишга жойлашиш имконини беради. Шунингдек, иқтидорли ўқувчиларга политехникум томонидан қўшимча малака ошириш курслари ва сертификат дастурлари таклиф этилади. 

Амударё тумани 2-сонли политехникуми – билим, касб ва муваффақият манбаи. Бу ерда олинадиган билим ва кўникмалар орқали келажакда ўз соҳангизда муваффақиятга эришишингиз, ўз касбингизни эгаллашингиз ва меҳнат бозорида рақобатбардош мутахассисга айланишингиз мумкин. Агар Сиз ҳам муваффақиятга йўл очишни истасангиз, биринчи қадамни биз билан бошланг!

Шоҳзод Қурбонбоев.