“Қадриятларинг боқий бўлсин, Наврўз!” шиори остида Амударё туманида Наврўз байрами кенг нишонланди
Тароватли кунларда табиат уйғониб, жонажон диёримизга барчамиз орзиқиб, соғиниб кутган Наврўзи олам кириб келди. Минг йиллар давомида маънавий ҳаётимизнинг кўрку зийнати бўлиб келаётган бу ажойиб, хосиятли байрам бугун қалбларимизга янада чексиз қувонч ва завқ бағишламоқда.
Байрам муносабати билан барча шарқ халқлари қатори юртимизнинг жонкуяр, фидойи, меҳнатсевар халқи ҳам Наврўз айёмини тантанали тарзда нишонламоқда.
19 март куни Амударё туманининг Дўстлик маҳалласи ҳудудидаги Вахум аҳоли пунктида жойлашган болалар ўйингоҳида ҳам “Қадриятларинг боқий бўлсин, Наврўз!” шоири остида байрам тадбири ташкил қилинди.
Байрам тадбирида республика ва туман миқёсидаги раҳбарлар, депутатлар, корхона-ташкилотлар ҳамда бўлимлар масъуллари, фуқаролар йиғинлари вакиллари, таниқли санъаткорлар, таълим-тарбия муассалари ходимлари ҳамда туман аҳолиси иштирок этди.
Тадбир аввалида туман ҳокимининг биринчи ўринбосари Фахриддин Юсупов туман ҳокими Собир Хўжаметовнинг халқимизга йўллаган байрам табригини ўқиб эшиттирди. Байрам табригида ўтган давр мобайнида туманни комплекс ижтимоий-иқтисодий ривожлантириш борасида барча соҳаларда амалга оширилаётган кенг кўламли ишлар, эришилаётган ютуқлар ҳамда келгусидаги режалар хусусида маълумотлар берилди.
Наврўз — янги деҳқончилик мавсумининг бошланиши, қут-барака, ободлик ва фаровонлик рамзи. Бободеҳқонларимиз янги деҳқончилик йилининг серҳосил, қут-баракали келишини, тўкин-сочин бўлишини тилаб дуо қилиб, аллақачон далада ишларни бошлаб юборишган.
Айни пайтда миришкор деҳқонларимиз 5 минг 970 гектар ерга экилган ғалла майдонларида униб чиққан майсаларни меҳр билан парваришламоқдалар. Мақсад — экилган ғалладан камида 60-80 центнергача ҳосил олиш ва халқимиз хирмонини донга, дастурхонини нонга тўлдиришдир.
Байрам табригида таъкидланганидек, 2022-2026 йилларга мўлжалланган “Янги Ўзбекистоннинг тараққиёт стратегияси” доирасида “Инсон қадри учун” деган тамойил асосида халқимизнинг турмуш фаровонлигини янада ошириш, иқтисодиётни ва тадбиркорликни жадал ривожлантиришга қаратилган улкан ислоҳотлар амалга оширилмоқда. Турли дастурлар доирасида 2024 йил давомида 4855 нафар фуқароларга 65,5 млрд сўмлик кредитлар ажратилди.
Муҳтарам Президентимизнинг ташаббуси асосида томорқа ва ижарага олинган ер майдонларидан самарали фойдаланиш бўйича электрон онлайн аукцион савдолари орқали жами 1536 гектар ер майдонлари 4275 нафар ишсиз фуқароларга ажратиб берилган.
Шунингдек, жорий йилда ҳам туманимизни ижтимоий-иқтисодий ривожлантириш дастури доирасида 39 та лойиҳаларга 317,8 млрд. cўмлик инвестициялар жалб қилиш орқали 582 та янги иш ўринлари яратиш режалаштирилган. 2025 йилда туманимизда экспорт кўрсаткичларини 16 млн. долларга, шундан саноат корхоналарининг экспорт ҳажмини 12 млн. долларга, мева-сабзавот маҳсулотлари экспорти ҳажмини 4 млн. долларга етказиш кўзда тутилмоқда.
Барча манбалар ҳисобидан 15 та ижтимоий соҳа объектларида жами 52,5 млрд. сўмлик қурилиш-таъмирлаш ишлари олиб борилмоқда. Қолаверса, давлатимиз раҳбари ташаббуси билан туман аҳолисини тоза ичимлик суви билан таъминлаш мақсадида қиймати 29 млн. долларлик лойиҳа амалга оширилмоқда. Бу лойиҳа орқали 3 дона ичимлик сув объекти ҳамда 300 км дан ортиқ ичимлик суви тармоқлари қуриш ва реконструкция қилиш белгиланган.
Қайд этиш жоизки, бугунги кунда амалга оширилаётган ислоҳотларнинг барчаси халқимизнинг турмуш тарзни яхшилаш, барқарор иқтисодиётни таъминлаш, ижтимоий адолатни қарор топтириш ва бу жараёнда аҳолининг ҳар бир қатламига, айниқса, кам таъминланган шахсларга, ёшлар ва хотин-қизларни қўллаб-қувватлашга эътибор қаратилиб, уларнинг ҳуқуқ ва манфаатларини ҳимоя қилиш энг устувор масалалар сифатида қаралмоқда.
Байрам тадбири мобайнида халқимиз учун миллий таомлар ва ноз-неъматларга бой бўлган байрам дастурхони ёзилди. Миллий урф-одатларимиз, миллатлараро ҳамдўстлик, кўклам, Ватан, шодлик, янгиланиш, бахтни тараннум этувчи турли кўринишлар, ажойиб саҳнавий чиқишлар, рақслар, куй-қўшиқларга бой бўлган катта концерт дастури тадбирга юқори шукуҳ ва байрамона кайфият бағишлади.
Шунингдек, сайл мобайнида туман ҳокими Собир Хўжаметов ҳоким кубоги учун ўтказилган спорт мусобақалари ғолибларига диплом ҳамда қимматбаҳо совғаларни топширди. Наврўз сайлида ҳар бир қишлоқ ва маҳалла полвонлари, моҳир спортчилари билан кураш, арқон тортишув баҳслари катта таассуротларга бой тарзда ўтказилди. Барча беллашувлар ғолибларига байрам совғалари топширилди.
Наврўз – бу нафақат янги йилнинг бошланиши, балки одамлар ўртасида ҳамжиҳатлик, меҳр-муҳаббат, адолат ва бирдамлик рамзидир. У кўпгина халқлар учун янги умидлар дебочаси, янги режалар тузиш палласи. Наврўз кун билан туннинг тенглашиши, борлиқнинг уйғониши, инсоннинг табиат билан уйғунлигини ҳис қилган ҳолда меҳнат майдони томон ошиқиши билан барчага бирдек қадрли фасл. Наврўз тириклик, яшиллик, яшариш ва янгиланиш айёмидир. Шунинг учун ҳам Наврўз байрами неча-неча замонлардан буён ардоқланиб келади, халқимиз томонидан севиб нишонланади.
Фурсатдан фойдаланиб, халқимизни мана шундай қадимий ва боқий байрам – Наврўз айёми билан билан табриклаймиз! Шарқона янги йилимиз ҳар бир хонадонга тинчлик-хотиржамлик, бахт-у саодат, ободлик ва фаровонлик билан келсин! Байрам муборак бўлсин!
Чарос Арслонова, туман ҳокимлигининг Ахборот хизмати раҳбари.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
