Чорвачилик – озиқ-овқат хавфсизлиги ва иқтисодий барқарорлик кафолати
Чорвачилик – Ўзбекистон қишлоқ хўжалигининг энг муҳим тармоқларидан бири бўлиб, озиқ-овқат хавфсизлигини таъминлаш, аҳолига сифатли ва арзон маҳсулотлар етказиб бериш ҳамда ички бозор нархларини барқарорлаштиришда катта аҳамиятга эга. Шу сабабли, чорвачилик маҳсулотлари ишлаб чиқариш ҳажмини ошириш масаласи давлат сиёсатида устувор йўналишлардан бири сифатида белгиланган.
2025 йил 17 март куни Ўзбекистон Республикаси Президенти Шавкат Мирзиёев раҳбарлигида ўтказилган кенгайтирилган йиғилишда чорвачилик маҳсулотлари – гўшт, сут ва тухум ишлаб чиқариш ҳажмини камида 10 фоизга ошириш бўйича муҳим топшириқлар берилган эди. Бу чора-тадбирлар соҳани изчил ривожлантириш, чорвачилик хўжаликларини қўллаб-қувватлаш ва озиқ-овқат маҳсулотларининг барқарорлигини таъминлаш мақсадини кўзда тутади.
Амударё тумани ҳокимининг 20 март кунги тегишли қарорига мувофиқ, туманда чорвачиликни янада ривожлантириш мақсадида фермер хўжаликлари ва қишлоқ хўжалиги корхоналарида гўшт, сут ва тухум ишлаб чиқариш бўйича прогноз кўрсаткичлари белгиланди. Шунингдек, маҳаллаларда чорвачилик маҳсулотлари ишлаб чиқариш ҳажмини оширишга қаратилган чора-тадбирлар тасдиқланди.
Бу борада туман Ветеринария ва чорвачиликни ривожлантириш бўлими ва бошқа масъул ташкилотлар томонидан соҳани такомиллаштиришга қаратилган бир қатор чора тадбирлар амалга оширилиши белгиланган. Хусусан, чорвачилик йўналишидаги янги лойиҳаларни ишлаб чиқиш ва амалга оширишга алоҳида эътибор қаратилиб, уларни ҳар томонлама қўллаб-қувватлаш механизмлари жорий этилади. Шу мақсадда тегишли тижорат банклари иштирокида молиялаштириш чоралари кўрилиши режалаштирилган. Шу билан бирга, чорвачилик субъектларига ажратилган сувли ерларни хатловдан ўтказиш ва мавжуд чорва молларига мутаносиб равишда ер ажратиш масаласи назоратга олинади.
Соҳани ривожлантиришда илмий-тадқиқот ишлари ва инновацион технологияларни кенг жорий этиш муҳим вазифа сифатида белгиланган. Озуқабоп экинлар уруғчилигини ривожлантириш мақсадида камида битта ихтисослашган уруғчилик хўжалигини ташкил этиш режалаштирилган. Шунингдек, агротехника қоидалари асосида экинларни парваришлаш ва ўрим-йиғим жараёнларини илмий асосда ташкил этиш назарда тутилган.
Чорва моллари ва паррандалар учун озуқа етиштириш ҳажмини ошириш мақсадида, ҳокимлик захирасидаги экин ерларининг 10–20 фоизини чорва озуқа маҳсулотлари учун аукцион савдосига чиқариш кўзда тутилган. Шунингдек, пахта ва ғалладан нормативдан кўп ҳосил олган фермерларга ўз ер майдонининг 25 фоизида чорва учун озуқа экишга рухсат берилади.
Чорва ҳайвонларини идентификация қилиш, рўйхатга олиш ва кузатиш тизими йўлга қўйилиб, икки ҳафта ичида тумандаги барча чорва ҳайвонларини рўйхатга олиш ишлари бошлаб юборилади ва йил охирига қадар тўлиқ якунланиши режалаштирилган.
Ушбу чора-тадбирларнинг самарали амалга оширилиши натижасида чорвачилик маҳсулотлари ҳажми камида 10 фоизга ошиши кутилмоқда. Бу эса ички бозорда гўшт, сут ва тухум таъминотининг кўпайиши ҳамда нархларнинг барқарорлашишига хизмат қилади. Шу билан бирга, фермерлар ва тадбиркорларнинг даромади ортиб, янги иш ўринлари яратилади.
Чорвачилик соҳасига илмий инновацияларни жорий этиш маҳсулот сифатини оширишга имкон берса, озуқабоп экинлар етиштириш ҳажмининг кенгайиши чорва моллари учун барқарор озуқа таъминотини таъминлайди. Бу чора-тадбирлар орқали чорвачилик тармоғи изчил ривожланиб, мамлакат озиқ-овқат хавфсизлиги ва иқтисодий барқарорлигига ҳисса қўшади.
Шоҳзод Қурбонбоев.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
