Ижтимоий ҳимоя борасидаги ишлар ОАВ нигоҳида

29 март куни Амударё тумани ҳокимлигининг Ахборот хизмати томонидан “Амударё туманида аҳолининг ижтимоий ҳимояга муҳтож қатламини қўллаб-қувватлаш борасида амалга оширилаётган ишлар ҳамда келгусидаги режалар” юзасидан матбуот анжумани ташкил этилди. Матбуот анжуманида туман “Инсон” ижтимоий хизматлар маркази масъуллари, Халқ депутатлари туман кенгаши депутатлари ҳамда “Амударё ТВ” телеканали ва “Тараққиёт кўзгуси” газетаси журналист ва мухбирлари, ёш журналистлар иштирок этдилар.

Матбуот анжуманини туман ҳокимлигининг Ахборот хизмати раҳбари, туман ҳокимининг матбуот котиби Чарос Арслонова очди ҳамда олиб борди. Матбуот котиби ўз сўзида сўнгги йилларда давлатимиз раҳбари томонидан давлат ҳокимияти ва бошқарув органлари фаолиятида очиқлик ва ошкораликни таъминлаш, оммавий ахборот воситаларининг ўрни ва аҳамиятини мустаҳкамлашга қаратилаётган юксак эътибор ва бу борадаги ислоҳотлар хусусида сўз юритди.

Муҳтарам президентимиз Шавкат Мирзиёев ўз маърузаларида: “Оммавий ахборот воситалари сўзда эмас, амалда “Тўртинчи ҳокимият” даражасига кўтарилиши зарур” деган иборани кўп бора таъкидлайдилар. Дарҳақиқат, бугун ОАВнинг жамият сиёсий ҳаётидаги ўрни сезиларли даражада ошиб, амалда “Тўртинчи ҳокимият”га айланмоқда десак, муболаға бўлмайди.

Ўзбекистон Республикасининг “Давлат ҳокимияти ва бошқаруви органлари фаолиятининг очиқлиги тўғрисида”ги Қонуни билан давлат ҳокимияти ва бошқаруви органлари фаолиятида очиқлик ва ошкоралик сиёсатини амалга оширишда оммавий ахборот воситаларининг ўрни ва аҳамиятини янада ошириш борасидаги вазифалар мустаҳкамланган.

Матбуот анжуманида туман “Инсон” ижтимоий хизматлар маркази бошлиғи Ғуломжон Дуйсенбоев кун тартибидаги мавзу юзасидан ҳисобот берди. Ҳисоботда марказ томонидан барча тоифадаги ижтимоий ҳимояга муҳтож инсонларни қўллаб-қувватлаш борасида олиб борилаётган ишлар ҳақида атрофлича маълумот берилди.

Таъкидланганидек, сўнгги йилларда аҳолининг ижтимоий ҳимоясини кучайтириш, давлат томонидан фуқароларга ижтимоий хизмат кўрсатиш кўлами ва турларини кенгайтириш бўйича тизимли ишлар амалга оширилмоқда. Жумладан, ижтимоий дастурларни молиялаштириш харажатлари 2 бараварга ошиб, кам таъминланган нафақа олувчи оилалар қамрови 5 баробарга кўпайди ҳамда ногиронлиги бўлган шахслар ва болаларнинг парвариши билан банд бўлганлар учун янги нафақа турлари жорий этилди.

Янги таҳрирдаги Конституцияда ҳам меҳнатга лаёқатсиз ва ёлғиз кексалар, ногиронлиги бўлган шахслар ҳамда аҳолининг ижтимоий жиҳатда эҳтиёжманд бошқа тоифаларининг ҳуқуқлари давлат ҳимоясида эканлиги алоҳида норма сифатида белгилаб қўйилган.

Аҳолини ижтимоий ҳимоя қилиш ва ижтимоий хизматлар кўрсатиш соҳасидаги ягона давлат сиёсатини мувофиқлаштириб бориш мақсадида Ўзбекистон Республикаси Президенти ҳузурида Ижтимоий ҳимоя миллий агентлиги ҳамда унинг Қорақалпоғистон Республикаси, вилоятлар ва Тошкент шаҳар бошқармалари ва туман ҳамда шаҳарларда “Инсон” ижтимоий хизматлар марказлари ташкил этилди.

Матбуот анжумани мобайнида маҳаллий ОАВ вакиллари ҳамда депутатлар томонидан мавзу юзасидан йўлланган саволларга атрофлича маълумотлар ҳамда тушунчалар берилди. Жумладан, вояга етмаганлар, ота-онасидан маҳрум бўлган етим болаларни ижтимоий ҳимоя қилиш, маҳаллалардаги ижтимоий ходимлар фаолияти, марказга келиб тушаётган мурожаатлар бўйича саволларга батафсил маълумотлар берилди.

Марказнинг Болаларни ижтимоий ҳимоя қилиш шуъбаси томонидан берилган маълумотларга кўра, ота-она қарамоғидан маҳрум бўлган жами 245 нафар вояга етмаган болага васий ва ҳомий тайинланган, шундан васийликка олинганлари 152 нафарни, ҳомийликка олинганлари 94 нафарни ташкил этиб, уларнинг 38 нафари чин етим болалардир. Етим ва ота-она қарамоғидан маҳрум бўлган 17 ёшга тўлган 4 нафар вояга етмаган болалар ҳамда 18-23 ёшли 3 нафар ёшларни жорий йил давомида уй-жой билан таъминлаш режалаштирилган.

Матбуот анжумани савол-жавобларга бой тарзда ўтди.

Чарос Арслонова, туман ҳокимлигининг Ахборот хизмати раҳбари.