Ijtimoiy himoya borasidagi ishlar OAV nigohida

29-mart kuni Amudaryo tumani hokimligining Axborot xizmati tomonidan “Amudaryo tumanida aholining ijtimoiy himoyaga muhtoj qatlamini qoʻllab-quvvatlash borasida amalga oshirilayotgan ishlar hamda kelgusidagi rejalar” yuzasidan matbuot anjumani tashkil etildi. Matbuot anjumanida tuman “Inson” ijtimoiy xizmatlar markazi masʼullari, Xalq deputatlari tuman kengashi deputatlari hamda “Amudaryo TV” telekanali va “Taraqqiyot koʻzgusi” gazetasi jurnalist va muxbirlari, yosh jurnalistlar ishtirok etdilar.

Matbuot anjumanini tuman hokimligining Axborot xizmati rahbari, tuman hokimining matbuot kotibi Charos Arslonova ochdi hamda olib bordi. Matbuot kotibi oʻz soʻzida soʻnggi yillarda davlatimiz rahbari tomonidan davlat hokimiyati va boshqaruv organlari faoliyatida ochiqlik va oshkoralikni taʼminlash, ommaviy axborot vositalarining oʻrni va ahamiyatini mustahkamlashga qaratilayotgan yuksak eʼtibor va bu boradagi islohotlar xususida soʻz yuritdi.

Muhtaram prezidentimiz Shavkat Mirziyoyev oʻz maʼruzalarida: “Ommaviy axborot vositalari soʻzda emas, amalda “Toʻrtinchi hokimiyat” darajasiga koʻtarilishi zarur” degan iborani koʻp bora taʼkidlaydilar. Darhaqiqat, bugun OAVning jamiyat siyosiy hayotidagi oʻrni sezilarli darajada oshib, amalda “Toʻrtinchi hokimiyat”ga aylanmoqda desak, mubolagʻa boʻlmaydi.

Oʻzbekiston Respublikasining “Davlat hokimiyati va boshqaruvi organlari faoliyatining ochiqligi toʻgʻrisida”gi Qonuni bilan davlat hokimiyati va boshqaruvi organlari faoliyatida ochiqlik va oshkoralik siyosatini amalga oshirishda ommaviy axborot vositalarining oʻrni va ahamiyatini yanada oshirish borasidagi vazifalar mustahkamlangan.

Matbuot anjumanida tuman “Inson” ijtimoiy xizmatlar markazi boshligʻi Gʻulomjon Duysenboyev kun tartibidagi mavzu yuzasidan hisobot berdi. Hisobotda markaz tomonidan barcha toifadagi ijtimoiy himoyaga muhtoj insonlarni qoʻllab-quvvatlash borasida olib borilayotgan ishlar haqida atroflicha maʼlumot berildi.

Taʼkidlanganidek, soʻnggi yillarda aholining ijtimoiy himoyasini kuchaytirish, davlat tomonidan fuqarolarga ijtimoiy xizmat koʻrsatish koʻlami va turlarini kengaytirish boʻyicha tizimli ishlar amalga oshirilmoqda. Jumladan, ijtimoiy dasturlarni moliyalashtirish xarajatlari 2 baravarga oshib, kam taʼminlangan nafaqa oluvchi oilalar qamrovi 5 barobarga koʻpaydi hamda nogironligi boʻlgan shaxslar va bolalarning parvarishi bilan band boʻlganlar uchun yangi nafaqa turlari joriy etildi.

Yangi tahrirdagi Konstitutsiyada ham mehnatga layoqatsiz va yolgʻiz keksalar, nogironligi boʻlgan shaxslar hamda aholining ijtimoiy jihatda ehtiyojmand boshqa toifalarining huquqlari davlat himoyasida ekanligi alohida norma sifatida belgilab qoʻyilgan.

Aholini ijtimoiy himoya qilish va ijtimoiy xizmatlar koʻrsatish sohasidagi yagona davlat siyosatini muvofiqlashtirib borish maqsadida Oʻzbekiston Respublikasi Prezidenti huzurida Ijtimoiy himoya milliy agentligi hamda uning Qoraqalpogʻiston Respublikasi, viloyatlar va Toshkent shahar boshqarmalari va tuman hamda shaharlarda “Inson” ijtimoiy xizmatlar markazlari tashkil etildi.

Matbuot anjumani mobaynida mahalliy OAV vakillari hamda deputatlar tomonidan mavzu yuzasidan yoʻllangan savollarga atroflicha maʼlumotlar hamda tushunchalar berildi. Jumladan, voyaga yetmaganlar, ota-onasidan mahrum boʻlgan yetim bolalarni ijtimoiy himoya qilish, mahallalardagi ijtimoiy xodimlar faoliyati, markazga kelib tushayotgan murojaatlar boʻyicha savollarga batafsil maʼlumotlar berildi.

Markazning Bolalarni ijtimoiy himoya qilish shuʼbasi tomonidan berilgan maʼlumotlarga koʻra, ota-ona qaramogʻidan mahrum boʻlgan jami 245 nafar voyaga yetmagan bolaga vasiy va homiy tayinlangan, shundan vasiylikka olinganlari 152 nafarni, homiylikka olinganlari 94 nafarni tashkil etib, ularning 38 nafari chin yetim bolalardir. Yetim va ota-ona qaramogʻidan mahrum boʻlgan 17 yoshga toʻlgan 4 nafar voyaga yetmagan bolalar hamda 18-23 yoshli 3 nafar yoshlarni joriy yil davomida uy-joy bilan taʼminlash rejalashtirilgan.

Matbuot anjumani savol-javoblarga boy tarzda oʻtdi.

Charos Arslonova, tuman hokimligining Axborot xizmati rahbari.