Амударё тумани “Инсон” ижтимоий хизматлар маркази томонидан “Инсонга хизмат – олий қадрият” шиори остида коучинг тадбири ўтказилди
Мамлакатимизда инсон омилига эътибор, унинг ҳаётдан рози яшашини таъминлаш, турмуш шароитини яхшилаш, айниқса, давлат хизматларидан самарали фойдаланишларига кўмаклашиш мақсадида ҳуқуқий саводхонлигини оширишга қаратилган чора-тадбирлар туфайли фуқаролар ҳаётига доир ижтимоий муаммоларга ўз вақтида ҳуқуқий ечим топиш имкони яратилмоқда.
29 март куни Ўзбекистон Маҳаллалари уюшмаси Амударё тумани бўлими биносида туман “Инсон” ижтимоий хизматлар маркази томонидан “Инсонга хизмат – олий қадрият” шиори остида ташкиллаштирилган, фуқароларнинг ҳуқуқий саводхонлигини оширишга қаратилган коучинг дастурида ҳам инсон қадр-қимматини ҳамиша баланд тутиш, оғир ижтимоий вазиятга тушиб қолган фуқароларни ҳар томонлама қўллаб-қувватлаш, ҳуқуқий масалаларда эксперт-маслаҳатчи ва психологлар ёрдамларини ташкил этиш масалалари атрофлича муҳокама қилинди.
Тадбирда Амударё тумани маҳаллаларида истиқомат қилувчи ижтимоий ва ҳуқуқий ёрдамга муҳтож фуқаролар ҳамда ижтимоий хизмат ходимлари иштирок этдилар. “Инсон” ижтимоий хизматлар маркази директори Ғуломжон Дуйсенбоев ва марказ мутахассислари иштирокчиларга марказ ва ижтимоий ходимлар томонидан кўрсатиладиган хизматлар тури, аҳолини қийнаб келаётган мавжуд ижтимоий муаммоларга ҳуқуқий ечимлар топиш борасида амалга оширилаётган ишлар тўғрисида батафсил маълумотлар ва тушунчалар тақдим этишди.
Тадбир давомида иштирокчилар ўзларини қизиқтирган саволларга жавоблар олиб, марказ фаолияти ва шу кунгача амалга оширган ишлар билан ҳам яқиндан танишдилар. Хусусан, катта ёшдагилар ва оғир ижтимоий вазиятга тушиб қолган оилалар билан ишлаш шуъбаси бош мутахассиси Раҳмонжон Бобожонов, ногиронлиги бўлган шахслар билан ишлаш шуъбаси мудири Муроджон Болтаевлар томонидан 2024 йил давомида ижтимоий ҳимояга ва алоҳида парваришга муҳтож, ногиронлиги бўлган фуқароларга кўрсатилган амалий ва ҳуқуқий ёрдамлар ҳақидаги маълумотларга эга бўлдилар.
Шундан сўнг ижтимоий тўловлар шуъбаси фаолияти бўйича бош мутахассис Сирожиддин Жумабоев, маҳаллада ижтимоий хизматларни ташкил этиш шуъбаси мудири, бош ижтимоий ходим Баҳриддин Турабоевлар ўз фаолиятлари давомида амалга оширган ишлари тўғрисида тадбир иштирокчиларига батафсил маълумот бериб, 2025 йил учун белгиланган режалар, кўрсатиладиган ижтимоий ва ҳуқуқий хизматлар хусусида алоҳида тўхталиб ўтдилар.
Коучинг тадбир давомида “Инсон” ижтимоий хизматлар маркази мутахассислари томонидан болаларни ижтимоий ҳимоя қилиш шуъбаси, ҳуқуқий масалаларда эксперт-маслаҳатчи хизмати, психологлар ҳамда марказ операторлари фаолияти тўғрисида ҳам зарур тушунчалар тақдим этилиб, бу борада амалга оширилган ишлар юзасидан батафсил маълумотлар берилди.
Тадбир якунида Амударё туман “Инсон” ижтимоий хизматлар маркази директори Ғуломжон Дуйсенбоев ўтган 2024 йил давомида самарали фаолият олиб борган маҳалла фаолларига эсдалик совғалари топширди ва миннатдорчилик билдирди.
РОБИЯ ЙЎЛДОШЕВА.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
