Жўқорғи Кенгес депутати қиличбойлик сайловчилар билан учрашди

Сўнгги йилларда юртимизда амалга оширилаётган кенг кўламли ислоҳотлар, айниқса, давлат раҳбарининг халқ фаровонлигини таъминлашга қаратилган ташаббус ва саъй-ҳаракатлари мамлакат тараққиётининг асосий таянчига айланмоқда. Президентимизнинг халқпарвар сиёсатлари туфайли барча ҳудудлар, жумладан, Қорақалпоғистон Республикаси ҳам жадал ривожланиб, халқ фаровонлиги ва аҳоли турмуш даражасини юксалтиришга қаратилган аниқ чора-тадбирлар изчил амалга оширилмоқда.

Бу жараёнда Қорақалпоғистон Республикаси Жўқорғи Кенгеси депутатлари ҳам фаол иштирок этиб, ўз сайлов округларидаги муаммоларни ўрганиш, фуқароларнинг фикр ва таклифларини тинглаш ҳамда тегишли ташкилотлар билан ҳамкорликда ечим топиш борасида ташаббускорлик кўрсатмоқда.

5 апрель куни 32-Қиличбой сайлов округидан Жўқорғи Кенгес депутати Санобар Хўжамуротова Қиличбой овулида сайловчилар билан очиқ мулоқот ўтказди. Учрашувда маҳалла еттилиги аъзолари, маҳаллий аҳоли, ёшлар ва турли соҳалар вакиллари иштирок этди. Очиқ мулоқот тарзида ташкил этилган мазкур учрашув халқ ва унинг вакили ўртасидаги ишонч муҳитини янада мустаҳкамлади.

Депутат учрашув давомида сўнгги уч ойлик фаолияти юзасидан ҳисобот берди. У Президентимиз ташаббуси билан Қорақалпоғистонга қаратилаётган алоҳида эътибор, қабул қилинган қонун ҳужжатлари, улар асосида амалга оширилаётган ислоҳотлар, инфратузилмавий лойиҳалар ва бунёдкорлик ишлари ҳақида атрофлича маълумот берди.

Жорий йилда Амударё туманида ижтимоий ва инфратузилма объектларида қурилиш ҳамда таъмирлаш ишларини амалга ошириш учун давлат ва бошқа дастурлар доирасида 86 та объектга 537,4 миллиард сўм маблағ ажратилиши белгилангани алоҳида қайд этилди. Ушбу лойиҳалар аҳоли турмуш сифатини яхшилаш ва жамият эҳтиёжларини қондиришга қаратилгани билан аҳамиятлидир.

Шунингдек, узоқ йиллар давомида аҳолини қийнаб келаётган муаммолар — айниқса, ёзда қум-чанг, ёмғирли кунларда эса лойга айланадиган йўллар масаласи ҳам муҳокама қилинди. 2025 йилнинг ўзида тумандаги 107 км узунликдаги тупроқ йўлларга қум-шағал аралашмаси тўшаш режалаштирилган ва бу бўйича ишлар давом этмоқда.

Санобар Хўжамуротова ҳисобот давомида сайловчилар мурожаатлари асосида 2 та депутатлик сўрови юборилгани, 14 нафар эҳтиёжманд оиланинг ҳолидан хабар олингани, ОАВ ва ижтимоий тармоқлар орқали жамоатчилик билан доимий мулоқот олиб борилаётганини маълум қилди. Шунингдек, у Қонунийлик, суд-ҳуқуқ ва коррупцияга қарши курашиш масалалари қўмитаси фаолияти ҳақида ҳам тўхталиб ўтди.

Учрашув давомида фуқаролар томонидан ички йўлларни таъмирлаш, коммунал хизматлар ва ижтимоий масалалар юзасидан бир қатор таклиф ва мурожаатлар билдирилди. Муаммоларнинг айримларига шу ернинг ўзида ечим топилган бўлса, қолганлари бўйича тегишли депутатлик сўровлари юборилиши маълум қилинди.

Учрашувдан кейин депутат Санобар Хўжамуротова ҳудудда яшовчи уч нафар ёши улуғ, бемор онахонлар ҳолидан шахсан хабар олиб, эҳтиёжманд оилаларга озиқ-овқат маҳсулотларни топширди.

Мазкур учрашув халқ вакилларининг фаолиятидаги очиқлик ва жамоатчилик билан мулоқотнинг ёрқин намунаси бўлди. Халқ орасида юриб, уларнинг дардини тинглаш ва ечим топиш — бугунги кун депутати учун энг муҳим мезонга айланган.

Шоҳзод Қурбонбоев.