Joʻqorgʻi Kenges deputati qilichboylik saylovchilar bilan uchrashdi

Soʻnggi yillarda yurtimizda amalga oshirilayotgan keng koʻlamli islohotlar, ayniqsa, davlat rahbarining xalq farovonligini taʼminlashga qaratilgan tashabbus va saʼy-harakatlari mamlakat taraqqiyotining asosiy tayanchiga aylanmoqda. Prezidentimizning xalqparvar siyosatlari tufayli barcha hududlar, jumladan, Qoraqalpogʻiston Respublikasi ham jadal rivojlanib, xalq farovonligi va aholi turmush darajasini yuksaltirishga qaratilgan aniq chora-tadbirlar izchil amalga oshirilmoqda.

Bu jarayonda Qoraqalpogʻiston Respublikasi Joʻqorgʻi Kengesi deputatlari ham faol ishtirok etib, oʻz saylov okruglaridagi muammolarni oʻrganish, fuqarolarning fikr va takliflarini tinglash hamda tegishli tashkilotlar bilan hamkorlikda yechim topish borasida tashabbuskorlik koʻrsatmoqda.

5-aprel kuni 32-Qilichboy saylov okrugidan Joʻqorgʻi Kenges deputati Sanobar Xoʻjamurotova Qilichboy ovulida saylovchilar bilan ochiq muloqot oʻtkazdi. Uchrashuvda mahalla yettiligi aʼzolari, mahalliy aholi, yoshlar va turli sohalar vakillari ishtirok etdi. Ochiq muloqot tarzida tashkil etilgan mazkur uchrashuv xalq va uning vakili oʻrtasidagi ishonch muhitini yanada mustahkamladi.

Deputat uchrashuv davomida soʻnggi uch oylik faoliyati yuzasidan hisobot berdi. U Prezidentimiz tashabbusi bilan Qoraqalpogʻistonga qaratilayotgan alohida eʼtibor, qabul qilingan qonun hujjatlari, ular asosida amalga oshirilayotgan islohotlar, infratuzilmaviy loyihalar va bunyodkorlik ishlari haqida atroflicha maʼlumot berdi.

Joriy yilda Amudaryo tumanida ijtimoiy va infratuzilma obʼektlarida qurilish hamda taʼmirlash ishlarini amalga oshirish uchun davlat va boshqa dasturlar doirasida 86 ta obʼektga 537,4 milliard soʻm mablagʻ ajratilishi belgilangani alohida qayd etildi. Ushbu loyihalar aholi turmush sifatini yaxshilash va jamiyat ehtiyojlarini qondirishga qaratilgani bilan ahamiyatlidir.

Shuningdek, uzoq yillar davomida aholini qiynab kelayotgan muammolar — ayniqsa, yozda qum-chang, yomgʻirli kunlarda esa loyga aylanadigan yoʻllar masalasi ham muhokama qilindi. 2025-yilning oʻzida tumandagi 107 km uzunlikdagi tuproq yoʻllarga qum-shagʻal aralashmasi toʻshash rejalashtirilgan va bu boʻyicha ishlar davom etmoqda.

Sanobar Xoʻjamurotova hisobot davomida saylovchilar murojaatlari asosida 2 ta deputatlik soʻrovi yuborilgani, 14 nafar ehtiyojmand oilaning holidan xabar olingani, OAV va ijtimoiy tarmoqlar orqali jamoatchilik bilan doimiy muloqot olib borilayotganini maʼlum qildi. Shuningdek, u Qonuniylik, sud-huquq va korruptsiyaga qarshi kurashish masalalari qoʻmitasi faoliyati haqida ham toʻxtalib oʻtdi.

Uchrashuv davomida fuqarolar tomonidan ichki yoʻllarni taʼmirlash, kommunal xizmatlar va ijtimoiy masalalar yuzasidan bir qator taklif va murojaatlar bildirildi. Muammolarning ayrimlariga shu yerning oʻzida yechim topilgan boʻlsa, qolganlari boʻyicha tegishli deputatlik soʻrovlari yuborilishi maʼlum qilindi.

Uchrashuvdan keyin deputat Sanobar Xoʻjamurotova hududda yashovchi uch nafar yoshi ulugʻ, bemor onaxonlar holidan shaxsan xabar olib, ehtiyojmand oilalarga oziq-ovqat mahsulotlarni topshirdi.

Mazkur uchrashuv xalq vakillarining faoliyatidagi ochiqlik va jamoatchilik bilan muloqotning yorqin namunasi boʻldi. Xalq orasida yurib, ularning dardini tinglash va yechim topish — bugungi kun deputati uchun eng muhim mezonga aylangan.

Shohzod Qurbonboyev.