Депутатлар биринчи чорак якуни бўйича сайловчиларга ҳисобот бермоқда

Айни кунларда Қорақалпоғистон Республикаси Жўқорғи Кенгеси ва Халқ депутатлари Амударё туман Кенгаши депутатлари сайловчилар билан учрашиб, жорий йилнинг ўтган 3 ойи давомида амалга оширган ишлари ва депутатлик фаолияти хусусида аҳолига ҳисобот бермоқда.

Амир Темур номли ОФЙ биносида ҳам шу каби учрашув ўтказилиб, унда ҳудуддан сайланган Қорақалпоғистон Республикаси Жўқорғи Кенгеси депутати Ғ.Ешниёзов ва Халқ депутатлари Амударё туман Кенгаши депутати М.Саъдуллаевлар иштирок этди.

Депутатлар таъкидлаганларидек, Қорақалпоғистон Республикаси Жўқорғи Кенгеси ва туман ҳокимлиги томонидан ҳудудни ижтимоий-иқтисодий ривожлантириш, аҳоли турмуш фаровонлигини янада ошириш ва инфратузилмасини яхшилаш, тадбиркорликни ривожлантириш ва бошқа йўналишларда тизимли ишлар амалга оширилмоқда. Президентимиз ва ҳукуматимиз томонидан Қорақалпоғистонни ривожлантириш учун 20 га яқин Фармон ва Қарорлар қабул қилинди. Ушбу қарорлар асосида 21 мингдан ортиқ оғир аҳволдаги турар жойларни таъмирлаш, жанубий туманлардаги 2 минг км.дан ортиқ ички йўлларга тош-шағал аралашмаси ётқизиш ишлари амалга оширилди. Кадастри йўқ 27 минг 590 та уй-жойнинг ижара ва мулк ҳуқуқлари бўйича тегишли ҳужжатлар ишлаб берилди. 452 та маҳалланинг ҳар бирига 500 млн сўмдан, жами 228 млрд. сўм маблағ ажратилди.

Йиғилишда овул фаоллари Мусофир аҳоли пунктига ичимлик суви тармоғини тортиш, ички тупроқ йўлларга қум-шағал аралашмаси ётқизиш, Манғит шаҳридан Амир Темур номли овулга олиб борувчи йўлни асфалтлаш масалаларида мурожаат қилдилар. Ушбу мурожаатлар юзасидан зарур тушунтиришлар берилиб, тегишли ташкилотларга депутатлик сўрови юборилиши қайд қилинди.

Шу каби учрашув туманнинг Тўлқин овулида ҳам ўтказилди. Учрашувда депутат Ғ.Ешниёзов Қорақалпоғистон Республикаси Жўқорғи Кенгеси томонидан амалга оширилаётган ишлар ва ўз фаолияти хусусида ҳисобот берди.

Учрашувда аҳоли вакиллари ижтимоий таъминот масаласида, шунингдек 28-сонли мактабга олиб борувчи йўл бўйига пиёдалар йўлакчаси қуриш, томорқаларни оқар сув билан таъминлаш масалаларда депутатга мурожаат қилдилар.

Бир гуруҳ фуқароларнинг овул ҳудудидан ўтган янги темир йўл линияси Чангал қалъа аҳоли пунктига бориш йўлларини узиб қўйгани, натижада шу ҳудудда яшовчи аҳоли овул марказига келиш учун 5-6 километр узоқ масофадан айланиб ўтишга тўғри келаётгани, овулдаги қабристон ҳам ушбу темир йўлнинг нариги томонида қолгани сабабли аҳоли учун ноқулайликлар туғдираётгани бўйича қилган мурожаати жойига чиқиб ўрганилди ва тегишли ташкилотларга депутатлик сўрови юборилиб, ижобий ҳал қилиниши маълум қилинди.

Чойкўл овулида ўтказилган учрашувда Қорақалпоғистон Республикаси Жўқорғи Кенгеси депутати Ғ.Ешниёзов ва Халқ депутатлари Амударё туман Кенгаши депутати Я.Аҳмедов, С.Муродбоевалар сайловчиларга ҳисобот бердилар.

Овул аҳолиси халқаро аҳамиятдаги автомобиль йўлининг 22-сонли мактаб олдидан ўтган қисмига болалар хавфсизлигини таъминлаш учун ётиқ сунъий тўсиқ ўрнатилгани, йўлдан катта юк автомобиллари ўтиши сабабли унинг бир қисми ишдан чиққанини маълум қилиб, таъмирлаш масаласида депутатлардан амалий ёрдам сўради.

Шунингдек, аҳоли томонидан турар жойларга кадастр ҳужжатларини расмийлаштириш бўйича тарғибот ишларини кучайтириш, собиқ Маданият қишлоқ врачлик пункти негизида оилавий поликлиника ташкил қилиш ва бошқа масалаларда йўлланган мурожаатлар ҳам тегишли тартибда ўрганиб чиқилиб, зарур чоралар кўрилиши маълум қилинди.

Учрашувдан кейин Тадбиркорлар ва ишбилармонлар ҳаракати – Ўзбекистон Либерал-демократик партиясидан сайланган депутатлар Ғ.Ешниёзов ва Я.Аҳмедовлар хотин-қизлар бандлигини таминлаш мақсадида ОФЙ биносида ташкил қилинган тикувчилик цехи фаолияти билан ҳам яқиндан танишдилар