Халқаро илмий-амалий анжуманда таълимда сунъий интеллект истиқболлари муҳокама қилинди
Бугунги кунда мамлакатимизда рақамли иқтисодиётни жадал ривожлантириш, барча соҳаларда – айниқса, давлат бошқаруви, таълим, соғлиқни сақлаш ва қишлоқ хўжалигида замонавий ахборот-коммуникация технологияларини кенг жорий этиш бўйича изчил ислоҳотлар амалга оширилмоқда. Ушбу йўналишда ҳаётга татбиқ этилаётган комплекс чора-тадбирлар рақамли трансформация жараёнининг жамият тараққиётида тутган ўрни ва аҳамияти ниҳоятда юқори эканини яққол намоён қилмоқда.
Хусусан, электрон ҳукумат тизимини такомиллаштириш, дастурий маҳсулотлар ҳамда ахборот технологияларининг маҳаллий бозорини ривожлантириш, барча ҳудудларда IT-паркларни ташкил этиш, соҳада талаб юқори бўлган малакали кадрларни тайёрлашга қаратилган 220 дан ортиқ устувор лойиҳалар амалга оширилмоқда. Шунингдек, 40 дан зиёд ахборот тизимлари билан интеграциялашган геопортал фаолияти йўлга қўйилди. Жамоат транспорти ва коммунал инфратузилмани бошқаришга қаратилган ахборот тизимлари ишлаб чиқилмоқда. “Рақамли Тошкент” дастури доирасида эса ижтимоий соҳани рақамлаштириш бўйича амалий ишлар бошланган бўлиб, бу тажриба келгусида бошқа ҳудудларда ҳам татбиқ этилиши кўзда тутилмоқда.
Жорий йилнинг 8–9 апрель кунлари Нукус шаҳридаги Инновацион технологиялар университетида Ўзбекистон Республикаси Олий таълим, фан ва инновациялар вазирлигининг тегишли буйруғи асосида “Сунъий интеллект ва таълим: имкониятлар, муаммолар ва истиқболлар” мавзусида халқаро илмий-амалий анжуман бўлиб ўтди.
Анжуманнинг асосий мақсади – жаҳонда кенг қўлланилаётган сунъий интеллект технологияларини юртимиз ҳаётига татбиқ этиш, рақамли маълумотлардан самарали фойдаланиш механизмларини йўлга қўйиш, олий таълим тизимини рақобатбардош даражага олиб чиқиш ва унинг жозибадорлигини оширишдан иборат.
Анжуманда Қорақалпоғистон Республикаси Жўқорғи Кенгесининг Ижтимоий-маданий ривожланиш, ёшлар сиёсати ва жамоат бирлашмалари масалалари қўмитаси раиси Мурат Атамуратов, Вазирлар Кенгаши Раисининг ёшлар сиёсати, ижтимоий ривожлантириш ва маънавий-маърифий ишлар бўйича ўринбосари Байрам Отемуратов ҳамда Ёшлар ишлари агентлиги Қорақалпоғистон Республикаси бошқармаси бошлиғи Полат Махсетбаев ва бошқалар иштирок этдилар. Меҳмонларни университет ректори Анвар Аъзамов кутиб олди ва анжуманнинг мақсад ва вазифалари билан таништирди.
Ўзбекистон Республикаси Президентининг 2024 йил 14 октябрдаги “Сунъий интеллект технологияларини 2030 йилгача ривожлантириш стратегиясини тасдиқлаш тўғрисида”ги Қарорига мувофиқ, 2030 йилгача сунъий интеллект асосида яратилган дастурий маҳсулотлар ва хизматлар ҳажмини 1,5 миллиард АҚШ долларига етказиш, Ягона интерактив давлат хизматлари порталида сунъий интеллект технологиялари асосида кўрсатиладиган хизматлар улушини 10 фоизга ошириш, соҳа бўйича 10 та илмий лаборатория ташкил этиш ва юқори ҳисоблаш қувватига эга серверларни ишга тушириш, шунингдек, Ҳукуматларнинг сунъий интеллектга тайёрлик индексида Ўзбекистонни дунёдаги илғор 50 давлат қаторига киритиш белгиланган.
Шу билан бирга, соҳани ривожлантириш бўйича устувор вазифалар сифатида сунъий интеллект соҳасида норматив-ҳуқуқий базани шакллантириш ва халқаро ҳамкорликни мустаҳкамлаш, техник инфратузилмани яратиш ва ушбу технологияларга асосланган лойиҳаларни амалга ошириш, аҳолининг сунъий интеллектдан фойдаланиш бўйича билим ва кўникмаларини ошириш ҳамда соҳа учун кадрлар салоҳиятини юксалтириш белгиланган.
Бу каби чора-тадбирлар, анжуманлар ва давлат стратегиялари мамлакатимизда рақамли иқтисодиёт ва сунъий интеллектни ривожлантириш, иқтисодий ўсишни таъминлаш, таълим сифатини ошириш, давлат хизматларининг самарадорлигини кучайтириш ҳамда жамиятнинг рақамли саводхонлигини юксалтиришга хизмат қилади.
Шоҳзод Қурбонбоев.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
