Жорий йилда тумандаги 348 та фермер хўжаликлари ва бошқа қишлоқ хўжалиги субъектлари томонидан жами 13 минг гектар майдонга чигит экилади

Қишлоқ хўжалиги соҳасида юқори самарадорликка эришиш, ердан унумли фойдаланиш ҳамда аҳоли фаровонлигини таъминлаш бугунги куннинг энг долзарб вазифаларидан бири саналади. Айниқса, мамлакатимизда пахтачилик йўналишида амалга оширилаётган ислоҳотлар, илғор агротехнологияларни жорий этиш ва кластер тизими асосида фаолият юритиш ушбу соҳанинг янги босқичга кўтарилишига замин яратмоқда.

Бугунги кунда қишлоқ хўжалигида, жумладан, пахтачиликда илм-фан ютуқларига таяниш, замонавий агротехнологиялардан фойдаланиш, харажатларни камайтириш ҳамда даромадни оширишга алоҳида эътибор қаратилмоқда. Юртимизда баҳор нафаси кезаётган айни апрель ойининг илиқ кунларида Амударё туманидаги фермер хўжаликларида 2025 йилги пахта ҳосили учун чигит экиш ишлари жадал суръатларда олиб борилмоқда. Хусусан, Чойкўл овулидаги “Чойкўл Дўстлик” ҳамда Қангли овулидаги “Диёрбек Қанжиғали” фермер хўжаликларида ҳам ишлар қизғин паллага кирган.

Амударё тумани Агросаноат мажмуи устидан назорат қилиш инспекцияси маълумотларига кўра, жорий йилда тумандаги 348 та фермер хўжалиги ва бошқа қишлоқ хўжалиги субъектлари томонидан жами 13 000 гектар майдонда чигит экилиши режалаштирилган.

Эътиборга молик жиҳати шундаки, жорий йилда 5 минг гектар майдонда Хитой технологияси асосида чигит экиш ишлари амалга оширилмоқда. Ушбу майдонларнинг 2 400 гектарида хорижий, 2 600 гектарида эса маҳаллий навли чигит экиш мўлжалланган. Бундай ёндашув ҳосил сифати ва ҳажмини оширишга хизмат қилиши кутилмоқда.

Маълумотларга кўра, Хитой технологияси асосида амалга оширилаётган усул фермерларга вақт ва маблағни тежаш имконини беради. Бундан ташқари, чигитлар 5-6 кун ичида униб чиқиши ва анъанавий усулга нисбатан тахминан 5 кун олдин ҳосил беришини таъминлайди. Ҳосилдорлик эса 50 центнердан ортиқ бўлиши мумкин.

Чигит экиш ишлари Агросаноат мажмуи устидан назорат қилиш инспекцияси томонидан қатъий назоратга олинган. Барча агротехник тадбирлар белгиланган талаб ва меъёрларга тўлиқ риоя этилган ҳолда, юқори сифатда амалга оширилмоқда.

Ушбу ишлар Ўзбекистон Республикаси Вазирлар Маҳкамасининг 2025 йил 29 январдаги “Пахтачиликда юқори самарали интенсив агротехнологияларни қўллаш ва хорижий ғўза навлари майдонларини кенгайтиришнинг қўшимча чора-тадбирлари тўғрисида”ги Қарори ижроси доирасида амалга оширилмоқда.

Маълумот ўрнида таъкидлаш жоизки, қишлоқ хўжалиги техникалари ва агрегатлари мавсум олдидан тўлиқ тайёр ҳолатга келтирилган. Ер тайёрлаш ва экиш ишларига 71 та хайдов трактори, 71 та плуг, 136 та чизел, 15 та дискли борана, 1700 та тишли борана, 293 та мола, 53 та минерал ўғит сепгич, 47 та пуркагич, 150 та чигит экиш сеялкалари, шунингдек, 23 та махсус сеялка жалб этилган. Ҳозирда барча техника ва агрегатлар соз ҳолатда ишга тайёр ва мавсумда улардан фаол фойдаланилмоқда.

Фурсатдан фойдаланиб, барча фермер хўжаликлари ва аграр соҳада меҳнат қилаётган фидойи юртдошларимизга жорий йилги мавсумда муваффақият ва баракали ҳосил тилаймиз!

Шоҳзод Қурбонбоев.