Joriy yilda tumandagi 348 ta fermer xoʻjaliklari va boshqa qishloq xoʻjaligi subʼektlari tomonidan jami 13 ming gektar maydonga chigit ekiladi

Qishloq xoʻjaligi sohasida yuqori samaradorlikka erishish, yerdan unumli foydalanish hamda aholi farovonligini taʼminlash bugungi kunning eng dolzarb vazifalaridan biri sanaladi. Ayniqsa, mamlakatimizda paxtachilik yoʻnalishida amalga oshirilayotgan islohotlar, ilgʻor agrotexnologiyalarni joriy etish va klaster tizimi asosida faoliyat yuritish ushbu sohaning yangi bosqichga koʻtarilishiga zamin yaratmoqda.

Bugungi kunda qishloq xoʻjaligida, jumladan, paxtachilikda ilm-fan yutuqlariga tayanish, zamonaviy agrotexnologiyalardan foydalanish, xarajatlarni kamaytirish hamda daromadni oshirishga alohida eʼtibor qaratilmoqda. Yurtimizda bahor nafasi kezayotgan ayni aprel oyining iliq kunlarida Amudaryo tumanidagi fermer xoʻjaliklarida 2025-yilgi paxta hosili uchun chigit ekish ishlari jadal surʼatlarda olib borilmoqda. Xususan, Choykoʻl ovulidagi “Choykoʻl Doʻstlik” hamda Qangli ovulidagi “Diyorbek Qanjigʻali” fermer xoʻjaliklarida ham ishlar qizgʻin pallaga kirgan.

Amudaryo tumani Agrosanoat majmui ustidan nazorat qilish inspektsiyasi maʼlumotlariga koʻra, joriy yilda tumandagi 348 ta fermer xoʻjaligi va boshqa qishloq xoʻjaligi subʼektlari tomonidan jami 13 000 gektar maydonda chigit ekilishi rejalashtirilgan.

Eʼtiborga molik jihati shundaki, joriy yilda 5 ming gektar maydonda Xitoy texnologiyasi asosida chigit ekish ishlari amalga oshirilmoqda. Ushbu maydonlarning 2 400 gektarida xorijiy, 2 600 gektarida esa mahalliy navli chigit ekish moʻljallangan. Bunday yondashuv hosil sifati va hajmini oshirishga xizmat qilishi kutilmoqda.

Maʼlumotlarga koʻra, Xitoy texnologiyasi asosida amalga oshirilayotgan usul fermerlarga vaqt va mablagʻni tejash imkonini beradi. Bundan tashqari, chigitlar 5-6 kun ichida unib chiqishi va anʼanaviy usulga nisbatan taxminan 5 kun oldin hosil berishini taʼminlaydi. Hosildorlik esa 50 tsentnerdan ortiq boʻlishi mumkin.

Chigit ekish ishlari Agrosanoat majmui ustidan nazorat qilish inspektsiyasi tomonidan qatʼiy nazoratga olingan. Barcha agrotexnik tadbirlar belgilangan talab va meʼyorlarga toʻliq rioya etilgan holda, yuqori sifatda amalga oshirilmoqda.

Ushbu ishlar Oʻzbekiston Respublikasi Vazirlar Mahkamasining 2025-yil 29-yanvardagi “Paxtachilikda yuqori samarali intensiv agrotexnologiyalarni qoʻllash va xorijiy gʻoʻza navlari maydonlarini kengaytirishning qoʻshimcha chora-tadbirlari toʻgʻrisida”gi Qarori ijrosi doirasida amalga oshirilmoqda.

Maʼlumot oʻrnida taʼkidlash joizki, qishloq xoʻjaligi texnikalari va agregatlari mavsum oldidan toʻliq tayyor holatga keltirilgan. Yer tayyorlash va ekish ishlariga 71 ta xaydov traktori, 71 ta plug, 136 ta chizel, 15 ta diskli borana, 1700 ta tishli borana, 293 ta mola, 53 ta mineral oʻgʻit sepgich, 47 ta purkagich, 150 ta chigit ekish seyalkalari, shuningdek, 23 ta maxsus seyalka jalb etilgan. Hozirda barcha texnika va agregatlar soz holatda ishga tayyor va mavsumda ulardan faol foydalanilmoqda.

Fursatdan foydalanib, barcha fermer xoʻjaliklari va agrar sohada mehnat qilayotgan fidoyi yurtdoshlarimizga joriy yilgi mavsumda muvaffaqiyat va barakali hosil tilaymiz!

Shohzod Qurbonboyev.