Нукус шаҳрида “Ўзбекистон – ягона ватан!” шиори остида байрам тадбирлари ташкил этилди

Наврўз – асрлар давомида аждодларимиз томонидан эзгу ниятлар, ёруғ умидлар билан қарши олинган, бугун эса янги Ўзбекистонда ҳам халқимизнинг миллий қадриятлари, меҳр-оқибат ва тотувлик тимсоли сифатида кенг нишонланаётган улуғ айёмдир. Баҳорнинг илк нафаси, табиат уйғониши, инсонлар қалбидаги янгиланиш ва орзулар уйғунлигида Наврўз чин маънода эзгулик ва баракот байрамига айланган.

Юртимизнинг барча ҳудудларида бўлгани каби Қорақалпоғистон Республикасида ҳам Наврўз кенг нишонланди. Хусусан, яқинда Нукус шаҳрида жойлашган “Нодавлат нотижорат ташкилотлари уйи”да “Ўзбекистон – ягона ватан!” шиори остида байрам тадбирлари ташкил этилди. Ушбу байрам тадбирлари Ўзбекистон нодавлат нотижорат ташкилотлари миллий ассоциацияси Қорақалпоғистон Республикаси ҳудудий бўлинмаси томонидан бир қатор нодавлат нотижорат ташкилотлари вакиллари кўмагида кўтаринки руҳда ўтказилди.

Тадбир доирасида дастлаб, Ўзбекистон Республикаси Президентининг 2025 йил 19 мартдаги “Умуммиллий тотувлик ва хориждаги ватандошлар билан алоқаларни мустаҳкамлашни янги босқичга олиб чиқишга оид чора-тадбирлар тўғрисида”ги Фармони билан “Биргаликда кучмиз” шиори остида турли миллат ва элат вакилларидан иборат эко-волонтёрлар иштирокида экологик акциялар ўтказилди. Бу ташаббус юртимизда миллатлараро тотувлик ва бағрикенглик муҳитини мустаҳкамлашга қаратилган кенг кўламли ислоҳотлар изчил давом этаётганининг амалий далилидир.

Байрам тадбирларида ҳунармандлар томонидан тайёрланган миллий либослар кўргазмаси, турли миллат вакилларининг миллий кийимлардаги чиқишлари, маданият вакилларининг куй-қўшиқлари ва саҳна чиқишлари томошабинларга байрамона руҳ бағишлади. “Ўзбекистон – ягона ватан!” шиори остида ўтказилган асосий тантанали маросимда фаол иштирок этган нодавлат нотижорат ташкилотлари вакиллари ташкилотчилар томонидан тақдирланди.

Тадбир доирасида “Дўстлик уйи” саҳнаси турфа миллатлар маданияти, урф-одатлари, куй-қўшиқлари ва анъаналарини мужассамлаштирган концерт дастурлари намойиш этилди. Жумладан, Ўзбекистон давлат маданият ва санъат институти Нукус филиали талабалари томонидан саҳналаштирилган чиқишлар, мода кўргазмалари, “Қорақалпоқ қизлари”, “Лазги”, “Шабандоз”, “Сахарда” сингари саҳна кўринишлари томошабинлар эътиборини қозонди. Шу билан бирга, спорт мусобақалари ҳам ташкил этилди.

Байрам дастурининг якунида меҳмонлар учун байрам оши тортилади. Миллий таомлар байрам дастурхонини тўлдириб, қадимий урф-одатларга бўлган эҳтиромни акс эттирди. Халқимиз орасида “Наврўзда баҳор қандай келса, йил шундай ўтади”, деган нақл бор. Кўпни кўрган оқсоқоллар бу йилги баҳорнинг файзли келаётганини, йил баракали ва ҳосил мўл бўлишини башорат қилдилар.

Бугун Ўзбекистонда турли миллат ва элат вакиллари бир мақсад – юрт тараққиётига ҳисса қўшиш йўлида биргаликда меҳнат қилмоқда. Бу эса Ватанимизда барқарорликнинг, тинчликнинг ва келажак сари ишонч билан интилаётган жамиятнинг ёрқин ифодасидир.

“Ўзбекистон – ягона ватан!” шиори остидаги Наврўз тантаналари нафақат йиғилганларга байрамона кайфият бағишлади, балки эзгу мақсадларда бирлашган, фаровонлик йўлида ҳамкорликда ҳаракат қилаётган жамоанинг, турли миллат ва элат вакилларининг аҳиллигини, бағрикенг халқларнинг бирдамлигини амалда намоён этди. Зеро, Наврўз – бу нафақат баҳорнинг кириб келиши, балки юракларда эзгулик, меҳр-оқибат ва янгиланиш фаслининг бошланиши, тинчлик, дўстлик ва аҳиллик айёмидир.

Шоҳзод Қурбонбоев.