Nukus shahrida “Oʻzbekiston – yagona vatan!” shiori ostida bayram tadbirlari tashkil etildi

Navroʻz – asrlar davomida ajdodlarimiz tomonidan ezgu niyatlar, yorugʻ umidlar bilan qarshi olingan, bugun esa yangi Oʻzbekistonda ham xalqimizning milliy qadriyatlari, mehr-oqibat va totuvlik timsoli sifatida keng nishonlanayotgan ulugʻ ayyomdir. Bahorning ilk nafasi, tabiat uygʻonishi, insonlar qalbidagi yangilanish va orzular uygʻunligida Navroʻz chin maʼnoda ezgulik va barakot bayramiga aylangan.

Yurtimizning barcha hududlarida boʻlgani kabi Qoraqalpogʻiston Respublikasida ham Navroʻz keng nishonlandi. Xususan, yaqinda Nukus shahrida joylashgan “Nodavlat notijorat tashkilotlari uyi”da “Oʻzbekiston – yagona vatan!” shiori ostida bayram tadbirlari tashkil etildi. Ushbu bayram tadbirlari Oʻzbekiston nodavlat notijorat tashkilotlari milliy assotsiatsiyasi Qoraqalpogʻiston Respublikasi hududiy boʻlinmasi tomonidan bir qator nodavlat notijorat tashkilotlari vakillari koʻmagida koʻtarinki ruhda oʻtkazildi.

Tadbir doirasida dastlab, Oʻzbekiston Respublikasi Prezidentining 2025-yil 19-martdagi “Umummilliy totuvlik va xorijdagi vatandoshlar bilan aloqalarni mustahkamlashni yangi bosqichga olib chiqishga oid chora-tadbirlar toʻgʻrisida”gi Farmoni bilan “Birgalikda kuchmiz” shiori ostida turli millat va elat vakillaridan iborat eko-volontyorlar ishtirokida ekologik aktsiyalar oʻtkazildi. Bu tashabbus yurtimizda millatlararo totuvlik va bagʻrikenglik muhitini mustahkamlashga qaratilgan keng koʻlamli islohotlar izchil davom etayotganining amaliy dalilidir.

Bayram tadbirlarida hunarmandlar tomonidan tayyorlangan milliy liboslar koʻrgazmasi, turli millat vakillarining milliy kiyimlardagi chiqishlari, madaniyat vakillarining kuy-qoʻshiqlari va sahna chiqishlari tomoshabinlarga bayramona ruh bagʻishladi. “Oʻzbekiston – yagona vatan!” shiori ostida oʻtkazilgan asosiy tantanali marosimda faol ishtirok etgan nodavlat notijorat tashkilotlari vakillari tashkilotchilar tomonidan taqdirlandi.

Tadbir doirasida “Doʻstlik uyi” sahnasi turfa millatlar madaniyati, urf-odatlari, kuy-qoʻshiqlari va anʼanalarini mujassamlashtirgan kontsert dasturlari namoyish etildi. Jumladan, Oʻzbekiston davlat madaniyat va sanʼat instituti Nukus filiali talabalari tomonidan sahnalashtirilgan chiqishlar, moda koʻrgazmalari, “Qoraqalpoq qizlari”, “Lazgi”, “Shabandoz”, “Saxarda” singari sahna koʻrinishlari tomoshabinlar eʼtiborini qozondi. Shu bilan birga, sport musobaqalari ham tashkil etildi.

Bayram dasturining yakunida mehmonlar uchun bayram oshi tortiladi. Milliy taomlar bayram dasturxonini toʻldirib, qadimiy urf-odatlarga boʻlgan ehtiromni aks ettirdi. Xalqimiz orasida “Navroʻzda bahor qanday kelsa, yil shunday oʻtadi”, degan naql bor. Koʻpni koʻrgan oqsoqollar bu yilgi bahorning fayzli kelayotganini, yil barakali va hosil moʻl boʻlishini bashorat qildilar.

Bugun Oʻzbekistonda turli millat va elat vakillari bir maqsad – yurt taraqqiyotiga hissa qoʻshish yoʻlida birgalikda mehnat qilmoqda. Bu esa Vatanimizda barqarorlikning, tinchlikning va kelajak sari ishonch bilan intilayotgan jamiyatning yorqin ifodasidir.

“Oʻzbekiston – yagona vatan!” shiori ostidagi Navroʻz tantanalari nafaqat yigʻilganlarga bayramona kayfiyat bagʻishladi, balki ezgu maqsadlarda birlashgan, farovonlik yoʻlida hamkorlikda harakat qilayotgan jamoaning, turli millat va elat vakillarining ahilligini, bagʻrikeng xalqlarning birdamligini amalda namoyon etdi. Zero, Navroʻz – bu nafaqat bahorning kirib kelishi, balki yuraklarda ezgulik, mehr-oqibat va yangilanish faslining boshlanishi, tinchlik, doʻstlik va ahillik ayyomidir.

Shohzod Qurbonboyev.