Ҳар қарич ердан унумли фойдаланаётган фермер

Боғдорчиликда қатор ораларига бошқа экинлар экиш ер майдонидан унумли фойдаланиш, ҳосилдорликни ошириш ва тупроқнинг соғлом ҳолатини сақлаб қолишга ёрдам берадиган усуллардан ҳисобланади. Амударёлик фермерлар экин ер майдонларининг ҳар қаричидан унумли фойдаланиб, боғ қатор ораларига сабзавот ва полиз маҳсулотларини экишмоқда ва қўшимча даромад олмоқдалар.

Ана шундай илғор фермер Қуролбой Жапақов раҳбарлик қилаётган “Ражаб Жапақ” фермер хўжалигининг умумий экишлик ер майдони 45,2 гектар бўлиб, шунда 8 гектар экин майдонида янгидан нок боғи ташкил қилган. Асосий йўналиши пахтачилик-ғаллачилик бўлган фермер хўжалигида эртаки сабзавотлар, картошка, пиёз, карам, саримсоқ пиёз, сабзи каби маҳсулотлар ҳам етиштирилади.

Фермер Қуролбой Жапақов 8 гектар экин ер майдонида ташкил этилган боғда нокнинг "Маузер" навидан бу йил илк ҳосил олинади. Шунингдек, янги боғда қаторлар орасига картошка, сабзи, булғор қалампири, пиёз каби маҳсулотлар экилган бўлиб, улардан ҳам яхшигина ҳосил ва даромад олиш режалаштирилмоқда.

Таъкидлаш жоизки, мевали дарахтлар ҳали катта бўлмаган даврда, улар орасида бўш турган ерга бошқа экинлар экиб, ер майдонларидан тўлиқ фойдаланиш ҳамда қўшимча даромад олиш мумкин. Оралиқ экинлар экиш бегона ўтларга қарши курашишга ҳам хизмат қилади, яъни улар тупроқни тўлиқ қоплайди ҳамда бегона ўтларга жой қолдирмайди. Қолаверса, оралиқ экинлар тупроқни қуёшдан ҳимоя қилади, бу эса намликни сақлаб қолишга ёрдам беради.

Бугунги кунда, боғ қатор ораларидан самарали фойдаланиш Ўзбекистоннинг қишлоқ хўжалиги учун муҳим аҳамиятга эга. Инновацион технологиялар ва самарали усулларни жорий этиш, фермерларга нафақат маҳсулотларни сифатли ва самарали етиштириш имконини беради, балки умумий иқтисодий барқарорликни таъминлашга ҳам хизмат қилади. Шу сабабли, ушбу жараённи янада ривожлантириш, фермерларни янги билимлар билан таъминлаш ва тажриба алмашишини рағбатлантиришга алоҳида эътибор қаратилмоқда.

Шунингдек, боғ-ток қатор ораларидан самарали фойдаланиш жамиятда барқарор ўсаётган қишлоқ хўжалиги тизимини яратишда муҳим қадам бўлиб, ушбу соҳада янги инновацион ёндашувларни татбиқ этиш орқали иқтисодиётни янада ривожлантириш имконини беради.

Ҳамюртимиз холимбеглик Қуролбой Жапақов ўз фермер хўжалиги ерларидан самарали фойдаланиш баробарида ҳудуддаги 40 нафарда ортиқ ишсиз юрган маҳалладошларини ҳам мавсумий иш билан таъминлашга ҳамда уларнинг оилаларига даромад олиб келишларига ёрдам бермоқда.

Фермернинг ҳар мавсумдаги ҳосили ҳамда даромади ҳам яхшигина. Ота-боболаримиздан мерос бўлиб келаётган деҳқончилик сир-асрорларини пухта эгаллаш ҳамда ер ресурсидан унумли фойдаланишда замонавий имкониятлар ва технологияларни жорий қилиш орқали Қуролбой Жапақов Амударё туманидаги энг илғор фермерлардан бирига айланган.

Чарос Арслонова, туман ҳокимлигининг Ахборот хизмати раҳбари.