Har qarich yerdan unumli foydalanayotgan fermer

Bogʻdorchilikda qator oralariga boshqa ekinlar ekish yer maydonidan unumli foydalanish, hosildorlikni oshirish va tuproqning sogʻlom holatini saqlab qolishga yordam beradigan usullardan hisoblanadi. Amudaryolik fermerlar ekin yer maydonlarining har qarichidan unumli foydalanib, bogʻ qator oralariga sabzavot va poliz mahsulotlarini ekishmoqda va qoʻshimcha daromad olmoqdalar.

Ana shunday ilgʻor fermer Qurolboy Japaqov rahbarlik qilayotgan “Rajab Japaq” fermer xoʻjaligining umumiy ekishlik yer maydoni 45,2 gektar boʻlib, shunda 8 gektar ekin maydonida yangidan nok bogʻi tashkil qilgan. Asosiy yoʻnalishi paxtachilik-gʻallachilik boʻlgan fermer xoʻjaligida ertaki sabzavotlar, kartoshka, piyoz, karam, sarimsoq piyoz, sabzi kabi mahsulotlar ham yetishtiriladi.

Fermer Qurolboy Japaqov 8 gektar ekin yer maydonida tashkil etilgan bogʻda nokning "Mauzer" navidan bu yil ilk hosil olinadi. Shuningdek, yangi bogʻda qatorlar orasiga kartoshka, sabzi, bulgʻor qalampiri, piyoz kabi mahsulotlar ekilgan boʻlib, ulardan ham yaxshigina hosil va daromad olish rejalashtirilmoqda.

Taʼkidlash joizki, mevali daraxtlar hali katta boʻlmagan davrda, ular orasida boʻsh turgan yerga boshqa ekinlar ekib, yer maydonlaridan toʻliq foydalanish hamda qoʻshimcha daromad olish mumkin. Oraliq ekinlar ekish begona oʻtlarga qarshi kurashishga ham xizmat qiladi, yaʼni ular tuproqni toʻliq qoplaydi hamda begona oʻtlarga joy qoldirmaydi. Qolaversa, oraliq ekinlar tuproqni quyoshdan himoya qiladi, bu esa namlikni saqlab qolishga yordam beradi.

Bugungi kunda, bogʻ qator oralaridan samarali foydalanish Oʻzbekistonning qishloq xoʻjaligi uchun muhim ahamiyatga ega. Innovatsion texnologiyalar va samarali usullarni joriy etish, fermerlarga nafaqat mahsulotlarni sifatli va samarali yetishtirish imkonini beradi, balki umumiy iqtisodiy barqarorlikni taʼminlashga ham xizmat qiladi. Shu sababli, ushbu jarayonni yanada rivojlantirish, fermerlarni yangi bilimlar bilan taʼminlash va tajriba almashishini ragʻbatlantirishga alohida eʼtibor qaratilmoqda.

Shuningdek, bogʻ-tok qator oralaridan samarali foydalanish jamiyatda barqaror oʻsayotgan qishloq xoʻjaligi tizimini yaratishda muhim qadam boʻlib, ushbu sohada yangi innovatsion yondashuvlarni tatbiq etish orqali iqtisodiyotni yanada rivojlantirish imkonini beradi.

Hamyurtimiz xolimbeglik Qurolboy Japaqov oʻz fermer xoʻjaligi yerlaridan samarali foydalanish barobarida hududdagi 40 nafarda ortiq ishsiz yurgan mahalladoshlarini ham mavsumiy ish bilan taʼminlashga hamda ularning oilalariga daromad olib kelishlariga yordam bermoqda.

Fermerning har mavsumdagi hosili hamda daromadi ham yaxshigina. Ota-bobolarimizdan meros boʻlib kelayotgan dehqonchilik sir-asrorlarini puxta egallash hamda yer resursidan unumli foydalanishda zamonaviy imkoniyatlar va texnologiyalarni joriy qilish orqali Qurolboy Japaqov Amudaryo tumanidagi eng ilgʻor fermerlardan biriga aylangan.

Charos Arslonova, tuman hokimligining Axborot xizmati rahbari.