“Хавфсиз ва соғлом юрт” кенг қамровли тезкор профилактик тадбирлари ташкил этилмоқда

Давлатимиз раҳбарининг жорий йилнинг 3 январь санасида имзолаган “2025 йилда республика маҳаллаларида хавфсиз муҳитни яратиш ва ҳуқуқбузарликларнинг барвақт олдини олиш тизими самарадорлигини янада ошириш бўйича чора-тадбирлар тўғрисида”ги 1-сонли қарори ижросини таъминлаш мақсадида Республикамизда кенг кўламли ишлар амалга оширилмоқда.

Қарор ижросини таъминлаш ҳамда республика ҳудудида хавфсиз муҳитни яратиш, жамоат тартибини сақлаш, хавфсизликни таъминлаш ва криминоген вазиятни барқарорлаштириш борасида ҳамкорликда амалга оширилиши лозим бўлган чора-тадбирларни самарали ташкил этиш мақсадида Қорақалпоғистон Республикаси Ички ишлар вазирлиги томонидан жорий йилнинг 15 апрелидан 15 майига қадар “Хавфсиз ва соғлом юрт” кенг қамровли профилактик тадбири жорий қилиниб, Амударё туманида ҳам бу борада самарали ишлар амалга оширилмоқда.

Туман ҳокимлигида ушбу йўналишда белгилаб берилган вазифалар ижросини таъминлаш, чора-тадбирларни самарали амалга ошириш масалаларига бағишланган йиғилиш бўлиб ўтди. Унда туман ҳокими Собир Хўжаметов, ҳоким ўринбосарлари, ҳуқуқни муҳофаза қилувчи органлар масъуллари, тегишли ташкилотлар раҳбарлари иштирок этди.

Тадбирда туман ҳокими Собир Хўжаметов сўзга чиқиб, туманни жиноят ва ҳуқуқбузарликлардан ҳоли ҳудудга айлантириш борасида олдинда турган устувор вазифалар хусусида сўз юритди. Шунингдек, туман прокуратураси ва ИИБ масъуллари сўзга чиқиб, “Хавфсиз ва соғлом юрт” профилактик тадбирларини ташкил этиш юзасидан белгилаб берилган вазифалар хусусида тўхталдилар.

Хусусан, ҳудудларда “Тозалаш-антитеррор”, “Орият”, “Тиғ”, “Қора дори”, “Тонг” махсус профилактик тадбирларини ўтказиш, гиёҳвандлик, психотроп ва кучли таъсир қилувчи моддаларнинг ноқонуний муомаласига чек қўйиш мақсадида рейд тадбирлари ташкил этилиб, “кўча безорилиги” ва “гуруҳ” ташкил қилишга ёки гуруҳнинг аъзоси бўлишга мойил ҳамда “етакчиликка интилувчан” ёшлар билан кучайтирилган профилактик ишларни олиб бориш, ноқонуний равишда жанговар ўқотар ва ов қуролларини сақлаётган шахсларни аниқлаш ҳамда қонуний чоралар кўриш каби ишлар амалга оширилмоқда.

Профилактика ойлиги доирасида кўнгилочар жойларнинг, хусусан, тунги клублар, сауналар, SPA салонлар, соғломлаштириш марказларининг рўйхатларини янгилаш ва уларда қонунчиликда белгиланган тартибда тунги рейдлар ўтказиш, йўл ҳаракати хавфсизлигини таъминлаш мақсадида рейдлар ташкил этиш, мавжуд йўл-патруль хизмати масканлари, блок ва тўсиқ постларига ҳудудий ички ишлар органларининг соҳавий хизматлари ходимларини бириктириш, криминоген вазияти оғир ҳамда қўшни республикалар билан чегара ҳудудлардан марказга борувчи асосий йўлларда “сайёр патруль” гуруҳларининг фаолиятини жадаллаштириш каби чора-тадбирларни амалга ошириш кўзда тутилган.

Ушбу вазифаларни самарали амалга ошириш юзасидан тезкор профилактик тадбирлар туманимизнинг барча ҳудудларда тизимли тарзда ташкил этилмоқда. Туманнинг марказий автомобиль йўлларида йўл-транспорт ҳодисаларининг олдини олиш юзасидан рейд тадбирлари ташкил этилмоқда.

Қолаверса, туман ҳуқуқни муҳофаза қилувчи органлар масъуллари “Маҳалла еттилик”лари билан ҳамкорликда Гулзор маҳалласи ҳудудидаги кўп хонадонли уйларда яшовчи аҳоли билан ўғирлик, фирибгарлик, товламачилик каби жиноят ва ҳуқуқбузарликларнинг олдини олиш борасида тушунтириш ишларини олиб бордилар.

Шунингдек, маҳалла ҳудудидаги умумий овқатланиш шохобчалари, кафе ва ресторанлар масъуллари билан суҳбатлар ўтказилиб, хавфсизликни таъминлаш мақсадида кузатув камералари ўрнатиш тавсия қилинмоқда.

Бу борадаги ишлар туманимизнинг барча маҳаллаларида давом этмоқда.

Чарос Арслонова, туман ҳокимлигининг Ахборот хизмати раҳбари.