1-сонли политехникумда “Касблар фестивали” тадбири юқори савияда ташкил этилди

Касб-ҳунар таълими ҳар доим ёшларни мустақил ҳаётга тайёрлаш, меҳнат бозорида ўз ўрнини топа оладиган етук мутахассислар сифатида вояга етказишда муҳим омил бўлиб келган. Бу жараёнда ўрта бўғин касб-ҳунар таълими тизимининг ўрни беқиёс.

Амударё туманида фаолият юритаётган 1-сонли политехникум айнан шундай замонавий талаблар асосида ташкил этилган таълим масканларидан биридир. Мазкур муассасада ўқувчилар танлаган мутахассисликлари бўйича назарий билимлар билан бир қаторда ишлаб чиқаришда зарур бўлган амалий кўникмаларга ҳам эга бўлиб бормоқдалар.

Яқинда политехникумда 9–11-синф битирувчилари, уларнинг ота-оналари, маҳаллий жамоатчилик, таълим соҳаси вакиллари иштирокида “Очиқ эшиклар куни” ҳамда “Касблар фестивали” юқори савияда ташкил этилди. Тадбирни политехникум директори Аллаёр Балтаев кириш сўзи билан очиб, касб-ҳунар таълими давлат сиёсатидаги ўрни, ёшларни замон талабларига мос равишда тайёрлаш йўналишидаги ислоҳотлар ҳақида тўхталиб ўтди.

Тадбир давомида муассасада йўлга қўйилган ихтисосликлар, ўқув жараёни, инновацион ёндашувлар, амалий машғулотлар самарадорлиги ва ёшларни иш билан таъминлаш имкониятлари ҳақида кенг маълумот берилди.

Бугунги кунда политехникумда замонавий талаблар асосида бир қатор мутахассислик йўналишлари бўйича таълим бериб келинмоқда. Автотранспорт воситаларини таъмирлаш ва техник хизмат кўрсатиш, электротехника ва энергетика, сантехника ҳамда иситиш-совитиш тизимлари, қурилиш ва смета ишлари, компьютер технологиялари ва ахборот тизимлари, саноат ускуналарига хизмат кўрсатиш, сервис хизматлари каби муҳим йўналишлар шулар жумласидан. Шунингдек, хизмат кўрсатиш соҳаси учун ҳам малакали мутахассислар тайёрлашга алоҳида эътибор қаратилмоқда.

Спорт залида ташкил этилган махсус кўргазмалар, тўгараклар, ишлаб чиқариш устахоналарининг фаолияти билан танишиш жараёни, ўқувчиларнинг ўз қўллари билан тайёрлаган макетлари, ўқув-техник ускуналари иштирокчиларда катта таассурот қолдирди. Айниқса, ижодий чиқишлар тадбирга байрамона кайфият бағишлади.

Политехникумда таълим олувчилар учун барча шарт-шароитлар яратилган. 240 ўринли ишлаб чиқариш устахоналари, 100 ўринли ётоқхона ва ошхона, спорт заллари, очиқ спорт майдончалари, замонавий лабораториялар, компьютер ва мультимедиа синфлари, касб-ҳунар машғулотлари учун махсус аудиториялар – буларнинг барчаси ўқувчиларнинг назарий билимларини амалиёт билан уйғунлаштиришга хизмат қилмоқда.

Бундан ташқари, муассасада 30 нафар олий маълумотли ўқитувчи, шу жумладан 2 нафар бош ўқитувчи, 6 нафар етакчи ўқитувчи, 9 нафар катта ўқитувчи ва 9 нафар амалиёт устаси фаолият юритмоқда.

Политехникум Қорақалпоқ давлат университетига бириктирилган бўлиб, ўқув жараёни миллий ва халқаро стандартларга мос равишда олиб борилади. Таълим кредит-модуль тизимида ташкил этилган бўлиб, ўқувчилар олган натижалари олий таълим муассасалари томонидан тан олинади. Бу эса битирувчиларга кейинги босқичда ўқишни давом эттириш имконини яратади.

Алоҳида таъкидлаш жоизки, политехникум ишлаб чиқариш корхоналари, ташкилот ва муассасалар билан кенг кўламли ҳамкорлик алоқаларини йўлга қўйган. Бу тизим ўқувчиларнинг билим ва кўникмаларини амалда синовдан ўтказишга, иш тажрибасига эга бўлишларига кенг йўл очмоқда. Шу орқали улар меҳнат бозорида ўз ўрнини топишга тайёр, рақобатбардош мутахассислар сифатида шаклланмоқда.

2025–2026 ўқув йилидан бошлаб политехникумда бошланғич касбий таълим дастурлари доирасида 9-синф битирувчилари учун қуйидаги йўналишларда таълим олиш имконияти яратилди. Хусусан, автомобилларни таъмирлаш ва уларга хизмат кўрсатиш, пайвандловчи, сув таъминоти ва канализация тармоқлари кузатувчиси, тикувчи, ахборот воситалари машиналари ва компьютер тармоқлари, электрик, қишлоқ хўжалик машиналари таъмирчиси ва тракторчи-машинист, қурилиш ишлари ишчиси, асаларичи, рақамли ахборотларни қайта ишлаш устаси, шунингдек, дуал таълим асосида ошпазлик каби йўналишлар бўйича мутахассислар тайёрланади.

Ўрта ва ўрта махсус касбий таълим дастурлари бўйича эса кундузги шаклда мактабгача таълим тарбиячиси, бухгалтерия ва компьютер инжиниринги йўналишлари, сиртқи шаклда эса мактабгача таълим тарбиячиси, электр ускуналар таъмирчиси, фермер хўжалиги бошқаруви, сув хўжалиги ва мелиорация, ўрмон хўжалиги каби техник йўналишларда мутахассислар тайёрлаш йўлга қўйилган.

Амударё тумани 1-сонли политехникуми бугунги кунда замонавий касб-ҳунар таълимининг илғор намуналаридан бирига айланган. Ўзига хос инновацион ёндашувлар, ишлаб чиқариш билан узвий алоқалар, кенг йўналишлар ва замонавий инфратузилма туфайли ёшлар нафақат касб эгаси, балки ўз ҳаётини тўлақонли қуришга қодир бўлган шахс сифатида шаклланмоқда.

Шоҳзод Қурбонбоев.