Ҳуқуқий машғулотлар орқали ёшлар онгида қонунга ҳурмат руҳи шаклланмоқда

Мамлакатимизда ҳуқуқий давлат барпо этиш, қонун устуворлигини таъминлаш ва жамият аъзолари, айниқса, ёшларнинг ҳуқуқий маданиятини юксалтиришга алоҳида эътибор қаратилмоқда. Ўзбекистон Республикаси Президентининг 2024 йил 24 май кунги “Маъмурий ислоҳотлар доирасида адлия органлари ва муассасаларининг масъулиятини янада ошириш ҳамда ихчам бошқарув тизимини шакллантириш тўғрисида”ги Фармонида ҳам юридик таълимнинг узлуксизлигини таъминлаш, вояга етмаганлар ва ёшларнинг ҳуқуқий саводхонлигини ошириш асосий устувор вазифалар сифатида белгиланди.

Шу мақсадда Вазирлар Маҳкамасининг 2024 йил 27 август кунги тегишли Қарори билан Ёшларнинг ҳуқуқий саводхонлигини ошириш, уларни қонунга итоаткорлик ва ҳуқуқбузарликка тоқатсизлик руҳида тарбиялаш бўйича чора-тадбирлар Дастури тасдиқланди. Мазкур дастур ёшлар ўртасида қонунга ҳурмат руҳини шакллантириш, ҳуқуқбузарликлар профилактикасини кучайтириш ва ҳуқуқий маданиятни юксалтиришда муҳим аҳамият касб этмоқда.

Дастур доирасида умумий ўрта таълим муассасаларида қонунга итоаткор ҳамда ҳуқуқбузарликларга тоқатсиз ёшларни тарбиялашга қаратилган аниқ чора-тадбирлар белгиланган. Хусусан, амалиётчи ҳуқуқшунослар, профилактика инспекторлари, судьялар, прокурорлар, адвокатлар ва адлия ходимлари иштирокида ҳуқуқий мавзуларда дарсдан ташқари амалий машғулотлар ташкил этилмоқда.

Бу каби машғулотлар орқали ўқувчиларга вояга етмаганларнинг ҳуқуқ ва бурчлари, ҳуқуқбузарлик тушунчаси ва унинг оқибатлари, шахсий ҳуқуқ ва эркинликлар, инсон ҳуқуқлари ва эркинликларининг кафолатланиши, давлат ҳокимияти тизими, суд ҳокимияти ва давлат хизматларини кўрсатиш тартиби ҳақида кенг тушунчалар бериляпти.

Ана шундай дарс машғулотларидан навбатдагиси Фуқаролик ишлари бўйича Амударё туман суди ташаббуси билан туман Мактабгача ва мактаб таълими бўлими тасарруфидаги 2-сонли умумтаълим мактабида ташкил этилди.

Мазкур дарс машғулотида Фуқаролик ишлари бўйича Амударё туман суди раиси Адилбек Сейтназаров ва мазкур суднинг судьяси Муҳаббат Қайповалар томонидан турли мавзуларда маърузалар қилинди. Унда мактаб ўқитувчилари ва юқори синф ўқувчилари фаол иштирок этди.

Дарс жараёнида судьялар ўқувчиларга Конституциянинг мазмун-моҳияти, давлат ҳокимияти тармоқларининг шаклланиши ва уларнинг вазифалари ҳақида ҳаётий мисоллар орқали кенг тушунчалар берди. Жумладан, қонун чиқарувчи, ижроия ва суд ҳокимияти тармоқлари, уларнинг ўзаро мувозанати ҳамда халқ манфаатларини таъминлашдаги ўрнига алоҳида тўхталиб ўтилди.

Айниқса, суд ҳокимиятининг адолатни таъминлаш, инсон ҳуқуқ ва эркинликларини ҳимоя қилишдаги роли, судьялар фаолиятида қонун устуворлиги ва холислик принципларининг аҳамияти ҳақидаги маълумотлар ўқувчилар учун жуда қизиқарли ва фойдали бўлди.

Ушбу амалий дарс орқали ўқувчилар ҳуқуқий мавзуларда ўзларини қизиқтирган кўплаб саволларга жавоб олдилар. Дарс якунида амалга оширилган қизиқарли машғулот учун Фуқаролик ишлари бўйича Амударё туман суди раиси Адилбек Сейтназаров ва мазкур суд судьяси Муҳаббат Қайповаларга мактаб маъмурияти томонидан миннатдорчилик билдирилди.

Мамлакатимизда ёш авлодни ҳуқуқий жиҳатдан онгли ва фаол фуқаролар сифатида тарбиялашга қаратилаётган эътибор самараси ўлароқ, таълим муассасаларида ўтказилаётган бундай дарс машғулотлари жамиятда қонунга ҳурмат, ҳуқуқий билим ва масъулият туйғусини кучайтиришда муҳим ўрин тутади. Конституцияда белгилаб берилган давлат ҳокимиятининг шаклланиши, унинг фаолият йўналишлари ва халқ манфаатларини таъминлашдаги вазифалари ҳақидаги билимлар ҳар бир ёш фуқаро учун ҳаётий аҳамият касб этади.

Фуқаролик ишлари бўйича Амударё туман суди томонидан ташкил этилаётган бундай маънавий-маърифий ўқув машғулотлари ёшларнинг ҳуқуқий билимларини мустаҳкамлаш, қонунга ҳурмат руҳида тарбиялаш ва ҳуқуқбузарликларнинг олдини олишда самарали восита бўлиб хизмат қилмоқда.

Шоҳзод Қурбонбоев.