Меҳнат фахрийларига "Иккинчи жаҳон урушидаги ғалабанинг 80 йиллиги" эсдалик юбилей медали тантанали тарзда топширилмоқда

Иккинчи жаҳон уруши нафақат жанг майдонларида, балки фронт орқасида ҳам бутун халқнинг сабри ва матонатини синовдан ўтказган воқеа бўлди. Миллионлаб йигитлар уруш майдонларига жўнаб кетар экан, халқ хўжалигининг турли соҳаларидаги машаққатли ва оғир ишларни бажариш масъулияти аёллар, кексалар ва ўсмирлар елкасига тушди. Улар ғалабага бўлган ишонч билан куну-тун фидокорона меҳнат қилдилар.

Аёллар оғир ер ишларида, пахтазорларда, завод ва фабрикаларда фаол иш олиб бордилар. Ер ҳайдаш, уруғ экиш, ўрим-терим ишларининг барчаси уларнинг зиммаларида эди. Бир пайтлар болаларини бағрига босиб, ўчоқ бошидан чиқмаган оналар ва қиз-келинчаклар энди қўлига кетмон олиб, тонг саҳардан далага ошиқардилар.

Кексалар — бобо ва момолар ҳам ўзларининг қариликни унутди. Улар ҳам фарзандлари учун, она Ватан учун қўлидан келганича меҳнат қилишди. Ўз болаларини фронтга кузатгач, қалбида пайдо бўлган аламни, фарзандидан қора хат келганда юрагида турган санчиқни унутиш учун тун-у кун меҳнат майдонида жонбозлик кўрсатишди.

Ана шундай фидойилардан бири, ўсмирлиги ва ёшлигини меҳнат фронтида ўтказган юртдошимиз ­– амударёлик Орзигул Мадаминова ҳам орамиздаги қаҳрамонлардандир.

9 май Хотира ва қардлаш куни ҳамда Иккинчи жаҳон урушида қозонилган ғалабанинг 80 йиллиги муносабати билан Орзигул Мадаминова қатори юзлаб ватандошларимиз Президент фармони билан “Иккинчи жаҳон урушидаги ғалабанинг 80 йиллиги” эсдалик юбилей медали билан тақдирландилар. Туман ҳокими Собир Хўжаметов ва Республика фаоллари Манғит шаҳрининг Дўстлик маҳалласига ­– онахон яшовчи хонадонга бориб, эсдалик юбилей медали ва байрам совғаларини тантанали тарзда топширдилар.

Манғит шаҳрининг Чордара маҳалласида яшовчи Бика Султанова ва Ойбек номли маҳаллада яшовчи Тозагул Йўлдошеваларга ҳам  меҳнат фронти фахрийлари сифатида юксак эҳтиром кўрсатилиб, “Иккинчи жаҳон урушидаги ғалабанинг 80 йиллиги” эсдалик юбилей медаллари ва байрам совғалари тантанали тарзда топширилди.

Фахрий онахонлар ўз хотираларида таъкидлаганларидек, Иккинчи жаҳон уруши йиллари бутун мамлакат учун оғир синовлар даври бўлди. Жанг майдонларидаги ҳар бир зафар ортида фронт ортидаги юртдошларимизнинг беқиёс меҳнати, сабри ва фидокорлиги мужассам эди. Ўзбекистон қишлоқ хўжалиги ва халқ хўжалиги соҳаларида бутун юртни озиқ-овқат, кийим-кечак ва бошқа муҳим эҳтиёжлар билан таъминлашда катта масъулиятни ўз зиммасига олди.

Уруш бошланган илк кунларданоқ мамлакатнинг барча меҳнат ресурслари тўлиқ сафарбар этилди. Ёшлар, аёллар ва кексалар қишлоқ хўжалиги ишларининг барча жабҳаларида фаол иштирок этдилар. Ўзбекистон халқи уруш йилларида нафақат Ватанни қўллаб-қувватлади, балки меҳнати билан ғалабага замин яратди. Бу заҳматли кунлар тарихга сабр, матонат ва фидойилик тимсоли сифатида муҳрланиб қолди ва шубҳасиз, бугунги авлод учун у йиллар давомида намуна, фахр ва илҳом манбаи бўлиб қолади.

Бугун биз тинч, обод юртда яшар эканмиз, Иккинчи жаҳон урушида жонини фидо қилган ота-боболаримиз, меҳнат фронтида заҳмат чеккан момоларимизнинг хотирасини улуғлаб, орамизда умргузаронлик қилаётган фахрийларимизни эъзозлашимиз, уларга эҳтиром кўрсатишимиз лозим. Зеро хотира – абадий, инсон қадри эса муқаддасдир.