Амударё туманида 9 май — Хотира ва қадрлаш куни муносабати билан байрам тадбири ўтказилди
Уруш — инсоният ўз қўли билан, ўзига қарши ўйлаб топган энг қайғули ва даҳшатли фалокатлардан биридир. Иккинчи Жаҳон уруши тарихдаги ана шундай энг ҳалокатли ва машъум воқеа бўлиб, 70 миллиондан ортиқ инсон ҳаётига зомин бўлди. Уруш туфайли миллатлар тақдири ўзгарди, шаҳарлар ер билан яксон этилди, миллионлаб инсонларнинг болалиги, ёшлиги ва умри хазон бўлди.
Бу каби улкан фожиадан хулоса чиқариш — ҳар бир авлоднинг инсоний бурчидир. Тинчлик — беқиёс неъмат, уни асраш эса ҳар биримизнинг муқаддас вазифамиздир. Хотира – абадий, қадр эса муқаддас туйғудир. Ҳар йили 9 май санаси муносабати билан жойларда ўтказиладиган тадбирларда ҳам шу икки туйғу улуғланиб, уруш қаҳрамонлари эътироф этилади, ўтганлар хотирланиб, орамиздаги қаҳрамонлар – фронт орти меҳнат фахрийларига эҳтиром кўрсатилади.
8 май куни Амударё туманида ҳам Хотира ва қадрлаш куни муносабати билан тантанали тадбир ўтказилди. Тадбирда Амударё тумани ҳокими Собир Хўжаметов, депутатлар, ҳуқуқни муҳофаза қилувчи органлар раҳбарлари, жамоатчилик фаоллари, таълим муассасалари масъуллари ва фахрийлар қатнашдилар. Иштирокчиларга Ўзбекистон байроғи тасвири туширилган “Шараф ленталари” тарқатилди.
Тадбир аввалида 9 май – Хотира ва қадрлаш куни муносабати билан аҳоли саломатлигини мустаҳкамлаш мақсадида ташкил қилинган югуриш марафонининг ғолиблари тақдирланди.
Тантанали тадбирда туман ҳокими Собир Хўжаметов ва туман Мудофаа ишлари бўлими бошлиғи, майор Шуҳрат Маматовлар йиғилганларни Иккинчи жаҳон урушида фашизм устидан қозонилган ғалабанинг 80 йиллиги билан табриклаб, ушбу сананинг мамлакатимиз бўйлаб кенг нишонланиши юртимиз озодлиги, тинчлиги ва равнақи йўлида жон берган, меҳнат фронтида фидокорона хизмат қилган, уруш майдонларида ва фронт ортида машаққат чеккан инсонларга бўлган ҳурмат ва эҳтиромнинг ёрқин ифодаси эканини таъкидладилар.
Тадбирда Иккинчи жаҳон урушида ҳалок бўлган юртдошларимиз хотираси ёдга олиниб, Қуръон тиловат қилинди. Сўнгра иштирокчилар томонидан Мотамсаро она ҳайкали ёдгорлиги пойига гулчамбарлар қўйилди.
Иккинчи жаҳон уруши миллионлаб инсонларнинг бевақт ҳалок бўлишига, шаҳарлар ва қишлоқлар вайронага айланишига, иқтисодиёт ва ижтимоий ҳаётда оғир оқибатларга олиб келди. Уруш нафақат моддий, балки маънавий зарар ҳам етказди — бутун бир авлоднинг тақдири вайрон бўлди, оилалар пароканда бўлди. Нафақат 5 йил давомида, балки уруш тугаганидан кейин ҳам унинг аянчли оқибатлари тугамади. Урушдан кейинги қайта тикланиш йилларида миллионлаб инсонлар оғир меҳнат ва машаққат билан иқтисодиётни, инфратузилмани, ижтимоий ҳаётни тиклаш ишларида фидойилик кўрсатдилар. Орадан 80 йил ўтса ҳам ўша машъум кунларнинг чиқарилган сабоқ бугунги авлодларни тинчликнинг қадрига етишга чорлаб келмоқда.
Хотира ва қадрлаш куни — бу фақат ўтганларни ёд этиш куни эмас, балки бугунги тинч ҳаётимизни қадрлаш, халқимиз кўрсатган жасоратни улуғлаш, ватанга садоқат руҳини авлодлар онгига сингдириш воситаси ҳамдир. Бу кун орқали ёшларимиз яқин ўтмишда аждодларимизнинг қандай оғир йўллардан ўтиб, тинчликка қандай қийинчилик билан эришганларини ҳис қилишади.
Тадбирда туман Маданият бўлими санъаткорлари томонидан ватанпарварлик руҳидаги куй-қўшиқлар ижро этилди.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
