Фидойи устоз хизматлари муносиб эътироф этилди

Юртимизда ўз умри давомида ёш авлод тарбияси, мамлакат равнақи йўлида виждонан, ҳалол меҳнат қилаётган инсонлар кўп. Давлатимиз ва жамият томонидан бундай фидойи шахсларнинг хизматлари доимий равишда эътироф этилиб келинмоқда.

Амударё тумани Мактабгача ва мактаб таълими бўлими тасарруфидаги 29-сонли умумтаълим мактабида фаолият юритаётган чақирувга қадар бошланғич тайёргарлик фани ўқитувчиси Турғанбой ака Ешмуратов ҳам Ана шундай фидойи инсонлардан саналади. Яқинда Турғанбой ака Ешмуратовнинг кўп йиллик фаолияти “Ветеран” жангчи-фахрий ногиронлар бирлашмаси томонидан юқори баҳоланиб, “Ёшларни ватанпарварлик руҳида тарбиялаш учун” медали билан тақдирланди. Бу мукофот ёш авлод тарбиясида жонкуярлик кўрсатган фидойи устоз хизматларининг ёрқин эътирофи бўлди. Мукофотни топшириш тадбирида Ўзбекистон “Ветеран” жангчи-фахрий ногиронлар бирлашмаси Қорақалпоғистон Республикаси бўлими Амударё тумани вакили Б. Жуманиёзов ҳамда уюшма аъзоси О. Хужаниёзовлар иштирок этдилар.

Турғанбой Ешмуратов 2002 йилдан буён ушбу таълим даргоҳида меҳнат қиляпти. 2020 йилдан эса чақирувга қадар бошланғич тайёргарлик фани ўқитувчиси сифатида ишлаб келмоқда. У ўз фаолияти орқали ўқувчиларга Ватанга муҳаббат, интизом, жасорат ва масъулият туйғуларини сингдиришга алоҳида эътибор қаратмоқда.

Устознинг оддий, бироқ жуда шарафли меҳнати йиллар давомида ўз самарасини бериб, муносиб равишда юксак мукофот билан қадрланди. Бу эътироф — нафақат устознинг фидокорона меҳнатига берилган баҳо, балки унинг қўл остида тарбияланаётган ўқувчилар учун ҳам катта илҳом манбаидир.

Турғанбой ака нафақат ўқитувчи, балки ёшлар учун ҳаёт сабоқларини ўргатувчи, ҳақиқий инсонпарвар тарбиячидир. Унинг меҳнати, фидойилиги ва тарбиявий таъсири кўплаб ўқувчилар қалбида Ватанга муҳаббат туйғусини уйғотмоқда.

Бугун биз ана шундай фидойи инсонлар борлигидан фахрланамиз. Чунки меҳнат қадрланган жамиятда фидойилар янада кўпаяди.

Севинч Ўмирбоева, Ўзбекистон жаҳон тиллари университети талабаси, таҳририят амалиётчиси.