Юксак пилла хирмони бунёд этиляпти

Жорий пилла мавсуми якунига ҳам саноқли кунлар қолди. Бу йилги мавсумда ҳам амударёлик касаначи пиллакорлар ўз меҳнатсеварлиги билан юксак пилла хирмонини бунёд этмоқдалар. Бугунги кунда тумандаги пилла қабул қилиш масканлари самарали фаолият олиб бормоқда. Уларда қабул қилинган юқори сифатли хомашё учун тўловлар тўғридан-тўғри, тарози бошида амалга оширилмоқда.

Пилла қабул қилиш жараёнлари туман мутасаддиларининг доимий эътиборида. Яқинда туман ҳокими ўринбосари, Оила ва хотин-қизлар бўлими раҳбари Гўзал Сабурова пилла қабул қилиш пунктида бўлиб, иш жараёнлари билан яқиндан танишди. Ҳоким ўринбосари касаначи хотин-қизлар билан самимий мулоқот қуриб, масъулиятли меҳнатларига юқори баҳо берди ва самимий миннатдорлик изҳор этди.

Пиллачилик – нафақат миллий анъаналаримиз билан боғлиқ қадимий касб, балки мамлакатимиз иқтисодиётида тобора муҳим ўрин эгаллаб бораётган даромадли тармоқлардан бири саналади. Айниқса, серқуёш ва илиқ иқлимга эга юртимизда тут дарахтининг кенг етиштирилиши, ипак қурти учун зарур шароитлар яратилгани соҳани янада ривожлантиришга кенг йўл очмоқда.

Маълумки, пилла – етти хазинанинг бири, пиллачилик эса юксак масъулият, меҳнатсеварликни талаб этувчи соҳадир. Ипак қурти хонадонга фақат даромад эмас, балки қут-барака ҳам олиб киради. Уларни парваришлаш жараёни жуда масъулиятли бўлиш билан бирга хонадон аъзолари учун қизиқарли иш саналади. Пиллачиликдан олинадиган кумуш тола – юқори сифатли ва фойдали маҳсулотдир. Ипак толасидан тайёрланган кийим-кечаклар инсон учун фойдали ҳисобланади.

Жорий мавсумда ҳам амударёлик пиллакорлар ғайрат ва шижоат билан меҳнат қилмоқдалар. Овул ва маҳаллаларда кўплаб хонадонлар пиллачиликка жалб этилди. Айниқса, пешқадам пиллакорлар меҳнати муносиб рағбатлантирилиб, туман ҳокимлиги томонидан эсдалик совғалари топшириляпти. Бу эса аҳоли орасида пиллачиликка бўлган қизиқишни янада оширди.

Эътиборли жиҳати, пиллакорлар тўловларни тарози бошида олмоқдалар. Бу эса уларнинг меҳнатга бўлган иштиёқини янада оширяпти.

Маълумот ўрнида, жорий йилда амударёлик касаначи пиллакорлар билан 296 тонна ҳосил етиштириш бўйича контрактация шартномалари тузилган. Шу мақсадда 2 минг 658 та хонадонга жами 4 минг 936 қути ипак қурти тарқатиб берилган. Ипак қуртини 25–30 кун давомида парваришлаш орқали мўмай ҳосил олиш мумкин. Таъкидлаш жоизки, ҳозирда йилига 2-3 марта пилла етиштириш имкониятлари кенгайиб, соҳанинг иқтисодий самарадорлигини янада ошмоқда.

Мамлакатимизда пиллачиликни ривожлантириш мақсадида кенг кўламда шарт-шароит ва имкониятлар яратилмоқда. Янги тут плантациялари барпо этилмоқда, соҳага доир замонавий билим ва технологиялар жорий этилмоқда. Бу эса пиллачиликнинг фақат якка тартибда эмас, балки маҳаллий иқтисодиёт ривожи учун ҳам муҳим аҳамиятга эга эканини кўрсатади.

Ислоҳотлар натижасида Амударё туманида ҳам пиллачилик йилдан-йилга ўсиб, аҳолининг юқори даромад манбаига айланиб бормоқда. Касаначи пиллакорлар меҳнатининг муносиб рағбатлантирилиши, тўловларнинг ўз вақтида амалга оширилиши, мавжуд ресурслардан унумли фойдаланиш соҳа самарадорлигини оширяпти. Маҳаллий аҳолининг ушбу соҳага бўлган қизиқиши ортиб бораётгани эса пиллачиликнинг туманда энг истиқболли тармоқлардан бирига айланаётганидан далолат беради.

Шоҳзод Қурбонбоев.