Yuksak pilla xirmoni bunyod etilyapti

Joriy pilla mavsumi yakuniga ham sanoqli kunlar qoldi. Bu yilgi mavsumda ham amudaryolik kasanachi pillakorlar oʻz mehnatsevarligi bilan yuksak pilla xirmonini bunyod etmoqdalar. Bugungi kunda tumandagi pilla qabul qilish maskanlari samarali faoliyat olib bormoqda. Ularda qabul qilingan yuqori sifatli xomashyo uchun toʻlovlar toʻgʻridan-toʻgʻri, tarozi boshida amalga oshirilmoqda.

Pilla qabul qilish jarayonlari tuman mutasaddilarining doimiy eʼtiborida. Yaqinda tuman hokimi oʻrinbosari, Oila va xotin-qizlar boʻlimi rahbari Goʻzal Saburova pilla qabul qilish punktida boʻlib, ish jarayonlari bilan yaqindan tanishdi. Hokim oʻrinbosari kasanachi xotin-qizlar bilan samimiy muloqot qurib, masʼuliyatli mehnatlariga yuqori baho berdi va samimiy minnatdorlik izhor etdi.

Pillachilik – nafaqat milliy anʼanalarimiz bilan bogʻliq qadimiy kasb, balki mamlakatimiz iqtisodiyotida tobora muhim oʻrin egallab borayotgan daromadli tarmoqlardan biri sanaladi. Ayniqsa, serquyosh va iliq iqlimga ega yurtimizda tut daraxtining keng yetishtirilishi, ipak qurti uchun zarur sharoitlar yaratilgani sohani yanada rivojlantirishga keng yoʻl ochmoqda.

Maʼlumki, pilla – yetti xazinaning biri, pillachilik esa yuksak masʼuliyat, mehnatsevarlikni talab etuvchi sohadir. Ipak qurti xonadonga faqat daromad emas, balki qut-baraka ham olib kiradi. Ularni parvarishlash jarayoni juda masʼuliyatli boʻlish bilan birga xonadon aʼzolari uchun qiziqarli ish sanaladi. Pillachilikdan olinadigan kumush tola – yuqori sifatli va foydali mahsulotdir. Ipak tolasidan tayyorlangan kiyim-kechaklar inson uchun foydali hisoblanadi.

Joriy mavsumda ham amudaryolik pillakorlar gʻayrat va shijoat bilan mehnat qilmoqdalar. Ovul va mahallalarda koʻplab xonadonlar pillachilikka jalb etildi. Ayniqsa, peshqadam pillakorlar mehnati munosib ragʻbatlantirilib, tuman hokimligi tomonidan esdalik sovgʻalari topshirilyapti. Bu esa aholi orasida pillachilikka boʻlgan qiziqishni yanada oshirdi.

Eʼtiborli jihati, pillakorlar toʻlovlarni tarozi boshida olmoqdalar. Bu esa ularning mehnatga boʻlgan ishtiyoqini yanada oshiryapti.

Maʼlumot oʻrnida, joriy yilda amudaryolik kasanachi pillakorlar bilan 296 tonna hosil yetishtirish boʻyicha kontraktatsiya shartnomalari tuzilgan. Shu maqsadda 2 ming 658 ta xonadonga jami 4 ming 936 quti ipak qurti tarqatib berilgan. Ipak qurtini 25–30 kun davomida parvarishlash orqali moʻmay hosil olish mumkin. Taʼkidlash joizki, hozirda yiliga 2-3-marta pilla yetishtirish imkoniyatlari kengayib, sohaning iqtisodiy samaradorligini yanada oshmoqda.

Mamlakatimizda pillachilikni rivojlantirish maqsadida keng koʻlamda shart-sharoit va imkoniyatlar yaratilmoqda. Yangi tut plantatsiyalari barpo etilmoqda, sohaga doir zamonaviy bilim va texnologiyalar joriy etilmoqda. Bu esa pillachilikning faqat yakka tartibda emas, balki mahalliy iqtisodiyot rivoji uchun ham muhim ahamiyatga ega ekanini koʻrsatadi.

Islohotlar natijasida Amudaryo tumanida ham pillachilik yildan-yilga oʻsib, aholining yuqori daromad manbaiga aylanib bormoqda. Kasanachi pillakorlar mehnatining munosib ragʻbatlantirilishi, toʻlovlarning oʻz vaqtida amalga oshirilishi, mavjud resurslardan unumli foydalanish soha samaradorligini oshiryapti. Mahalliy aholining ushbu sohaga boʻlgan qiziqishi ortib borayotgani esa pillachilikning tumanda eng istiqbolli tarmoqlardan biriga aylanayotganidan dalolat beradi.

Shohzod Qurbonboyev.