40-СОНЛИ МАКТАБДА “ХАЙР, БИРИНЧИ УСТОЗИМ!” ДЕБ НОМЛАНГАН АДАБИЙ-МУСИҚИЙ ТАДБИР ЎТКАЗИЛДИ

Инсоннинг шахс сифатида шаклланиш жараёни унинг болаликда олган бошланғич таълими сифатига боғлиқ. Чунки ёш ниҳол қуёш нурига қараб ўсганидай, мурғак қалбли болажонлар ҳам илм нурига йўғрилган устоз таълимидан баҳра олиб улғаядилар. Устозлари суҳбати уларни турли мўъжизалар оламига етаклайди, мантиқий фикрлашга, ҳаётий хулосалар чиқаришга, ўз олдларига аниқ мақсадлар қўйиш ва ана шу мақсадлари рўёби учун интилиб яшашга ўргатади. Шу боис, бола қўлига илк қалам тутқазиб, ўқиш-ёзишни ўргатган, қалбларида ширин орзулар уйғотиб, уларни эзгуликлар сари руҳлантирган биринчи устозларини ажиб меҳр-муҳаббат билан яхши кўрадилар. Айни кунларда умумтаълим мактабларида, “Сўнгги қўнғироқ” тадбирлари арафасида бўлиб ўтаётган бошланғич синфлар битирувчиларининг “Хайр, биринчи устозим!” деб номланган хайрлашув кечаларида бу яққол намоён бўлмоқда.

Амударё туманидаги 40-сонли мактабнинг 4-“в” синфи ўқувчилари ва уларнинг ота-оналари учун жорий йил 19 май санасида бўлиб ўтган “Хайр, биринчи устозим!” мавзусидаги адабий-мусиқий кеча бири-биридан ёрқин таассуротлар бахш этди. Хайрлашув кечасида мактабнинг бошланғич синфлар ўқитувчилари, 4-“в” синф ўқувчиларига таълим берган устозлари ҳамда уларнинг ота-оналари иштирок этишди.

Аввало шуни алоҳида айтиш жоизки, тадбир ўтказиладиган хона ўқувчиларнинг тўрт йил давомида эришган ютуқлари, билим ва кўникмаларини ўзида мужассам этган кўргазмали воситалар, турфа баҳор гуллари, суратлар ва альбомлар, устозларни шарафловчи жарангдор шиорлар билан безатилгани иштирокчиларга жўшқин кайфият бағишлади.

Жорий ўқув йилида мактабнинг 4-“в” синфини 33 нафар ўқувчи битиришмоқда. Бири-биридан иқтидорли ва эпчил ўқувчилар таълимда ҳам, спортда ва жамоат ишларида ҳам доимо фаол. Улар орасида мактаб ва туман миқёсида анъанавий тарзда ўтказилиб келинаётган турли кўрик-танловлар, бошланғич синф ўқувчилари орасида бўлиб ўтган фанлар олимпиадалари иштирокчиларининг ғолиб ва совриндорлари бор. Айни пайтда мазкур синфнинг энг аълочи ўқувчилари Президент мактабига ўқишга кириш учун тайёргарлик кўришмоқда.

“Хайр, биринчи устозим!” – хайрлашув кечасида 4-“в” синфнинг барча ўқувчилари фаол қатнашдилар. Улар жам бўлишиб, Ватан, устоз ва тинчлик-тотувликни мадҳ этувчи шеърлар айтишди, илм ва ақл-идрокнинг хосиятлари, катталарга ҳурмат, кичикларга иззат кўрсатиш одамийликнинг энг олий белгиси эканлиги ҳақидаги ибратли мақол ва ҳикоялари билан миллий-маънавий қадриятларнинг аҳамияти хусусида тўлқинланиб сўзладилар. Она Ватан ва устозларга бағишлаб куйлаган қўшиқлари, бири-биридан гўзал ва жозибали рақслари иштирокчиларга завқ-шавқ бағишлади.

Айниқса, ота-оналари учун алоҳида тайёрланган ва маҳорат билан ижро этилган, муҳтарама оналар, азиз оталарни шарафловчи қўшиқлардан уларнинг ота-оналари жуда мамнун бўлишди ва фарзандларига муносиб таълим-тарбия берган, уларнинг хулқини илм ва гўзал фазилатлар билан зийнатлаган устозларига чин дилдан миннатдорчилик билдирдилар.

Шу куни бошланғич синф битирувчилари янада янги ва улуғвор орзулар оғушида биринчи устозлари билан хайрлашдилар. Хайрлашув онларида синф раҳбари Муяссар Камолова севимли шогирдларига юқори синфларда ҳам аҳиллик ва иштиёқ билан ўқиб, билим олишлари, она Ватанга муносиб, юксак салоҳиятли ва маънавиятли инсонлар бўлиб вояга етишлари йўлида эзгу тилаклар билдирди.

РОБИЯ ЙЎЛДОШЕВА.