13-сонли давлат мактабгача таълим ташкилотидан 32 нафар тарбияланувчи мактабга учирма бўлди
Мамлакатимизда болаларнинг таълим-тарбия жараёнини замонавий асосда ташкил этиш борасида амалга оширилаётган ислоҳотлар мактабгача таълим тизимидаги ижобий ўзгаришларнинг яққол ифодасидир. Болаларни мустақил ҳаётга ва мактаб босқичига тайёрлашда боғчаларнинг ўрни беқиёс. Бу борада ҳар бир мактабгача таълим ташкилоти жамиятда катта аҳамият касб этади.
Ана шундай таълим-тарбия масканларидан бири, Ўрта қалъа овули ҳудудидаги 13-сонли давлат мактабгача таълим ташкилотида болажонларни мактабга кузатиш муносабати билан “Хайр, боғча – салом, мактаб!” номли байрамона тадбир ташкил этилди.
Жорий йилда ушбу боғчанинг 32 нафар тарбияланувчиси мактаб остонасига қадам қўйиш арафасида. Улар учун бу босқич янги ҳаётга, билим дунёсига илк қадам ҳамдир.
Тадбирда туман Мактабгача ва мактаб таълими бўлими шуъба бош методисти Ҳулкар Бабажонова, муассаса директори Дилафруз Гулмирзаева, ота-оналар, бобо-бувилар иштирок этишди.
Тадбир Ўзбекистон ва Қорақалпоғистон Республикалари Давлат мадҳияларининг янграши билан бошланди. Тадбирни кириш сўзи билан очган Дилафруз Гулмирзаева сўнги йилларда мактабгача таълим тизимида амалга оширилган ислоҳотлар, тарбия жараёнидаги янгиликлар ва боғчанинг бугунги қиёфаси ҳақида тўхталиб ўтди. Шунингдек, болажонларга мактаб ҳаётида улкан муваффақиятлар тилаб, фанларни қунт билан ўзлаштириш, фаол ва билимдон ўқувчи бўлиш зарурлигини таъкидлади.
Болажонлар томонидан тайёрланган шеърлар, рақслар, саҳна кўринишлари тадбирга алоҳида файз бағишлади. Улар бахтли болалик, она Ватан, мактаб ва боғча ҳақидаги шеърларни ифодали ўқишди. Айниқса, “Рақамлар” номли саҳна кўриниши болаларнинг бошланғич математикага оид билим ва кўникмаларини амалда намоён этишга хизмат қилди. Тадбир давомида тарбияланувчиларнинг боғчада олган билим ва кўникмалари акс этди.
Шунингдек, меҳмонлар иштирокида ўтказилган қизиқарли ўйинлар, интеллектуал викториналар тадбирга кўтаринки руҳ бағишлади. Биринчи ўйинда иштирокчилар хотира синовидан ўтказилса, иккинчи ўйин чаққонлик ва диққатни талаб қилувчи топшириқлардан иборат бўлди. Шарни бошидан туширмасдан топшириқларни бажариш иштирокчиларни бирдек қизиқтирди.
Айтиш жоизки, 13-сонли мактабгача таълим ташкилоти биноси 1987 йилда барпо этилган бўлиб, 2016 йилда қайта таъмирланди. Ҳозирда бу ерда 180 нафар тарбияланувчи шинам ва замонавий хоналарда тарбияланмоқда. Ташкилотда 10 нафар педагог фаолият юритади. Улардан 4 нафари олий маълумотли бўлиб, 1 нафари олий тоифали, 2 нафари биринчи тоифали мутахассислардир.
Таълим муассасасининг фаол тарбиячиларидан бири — Гулноза Гулмирзаева “Йилнинг энг яхши тарбиячиси – 2025” танловининг II босқичида муваффақиятли иштирок этди.
Тадбир якунида сўзга чиққан ота-оналар фарзандларига таълим ва тарбия берган устозларга, боғча раҳбариятига самимий миннатдорчилик билдирди. Бу каби тадбирлар нафақат болажонлар, балки уларнинг ота-оналари учун ҳам фахрли ва масъулиятли лаҳзалардан саналади.
“Хайр, боғча – салом, мактаб!” тадбири барча иштирокчилар қалбида унутилмас хотираларга айланди. Ушбу тадбир боғчалар фарзандларимизнинг ҳаёт йўлидаги илк пойдевори эканлигини кўрсатди. Чиндан ҳам, бугун боғча остонасидан мактабга қадам қўяётган ҳар бир бола — эртанги кунимизнинг порлоқ келажагидир.
Шоҳзод Қурбонбоев.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
