Ёзги таътил ўқувчилар салоҳиятини ривожлантириш даврига айланади

2025 йил 15 май куни Президентимиз Шавкат Мирзиёев раислигида бўлиб ўтган видеоселектор йиғилишида ёзги таътил даврида мактаблар аввалгидек ёпилмаслиги, балки фаолиятини фойдали ва мазмунли шаклларда давом эттириши белгиланиб, муҳим топшириқлар берилди.

Эндиликда мактаблар ёзги таътил вақтида болаларнинг шунчаки ҳордиқ чиқариш жойи эмас, балки уларга фойдали билимлар, касб-ҳунар кўникмалари бериладиган, спорт, маданият ва санъат орқали ривожланадиган, интеллектуал салоҳияти мустаҳкамланадиган марказларга айлантирилади.

Президент топшириғига кўра, таътил даврида мактабларнинг спорт майдончалари ва ўқув хоналаридан унумли фойдаланиш, ёшлар учун фан, спорт ва касб-ҳунар тўгаракларини ташкил этиш вазифаси белгиланди. Бу орқали ўқувчилар таътилда ҳам мактаб билан узвий алоқада бўлиб, салоҳиятини ривожлантиради.

Ёзги даврда ёшлар учун хавфсизлик ҳам устувор йўналишлардан бири сифатида қайд этилди. Хусусан, сунъий ва табиий сув ҳавзаларидан фойдаланишда хавфсизлик қоидаларига қатъий амал қилиш вазифаси белгилаб берилди.

Амударё тумани Мактабгача ва мактаб таълими бўлими тасарруфидаги 12-сонли умумтаълим мактабида ҳам ёзги таътил давомида ўқувчи ва уюшмаган ёшларнинг бўш вақтларини мазмунли ташкил этиш бўйича бир қатор чора-тадбирлар дастури ишлаб чиқилган.

Жумладан, мактабнинг жисмоний тарбия фани ўқитувчилари ташаббуси билан “Ҳаракат – саломатлик асоси” шиори остида “Ким тезроқ югуради?”, “Тўпни белгиланган жойга олиб бор” каби спорт мусобақаларини ўтказиш, эркин мавзу бўйича расмлар танлови, волейбол ва футбол мусобақалари, “Спортчилар паради” тадбири ҳамда мас-рестлинг (mas-wrestling) спорт тури бўйича беллашувларни ташкил этиш режалаштирилган.

Мактабимизда ўқувчилар учун барча шароитлар яратилган бўлиб, хусусан, 2 та спорт зали волейбол, баскетбол ва кураш спорт турлари билан шуғулланишга мослаштирилган. Айниқса, спортнинг кураш тури бўйича ташкил этилган тўгарак самарали фаолият юритиб келмоқда. Машғулотлар ҳафтанинг тоқ кунларида ўтказилади ва унда спортга иштиёқманд 25 нафар ўқувчи мунтазам қатнашиб, жисмоний тайёргарликларини оширмоқда.

Ўқувчиларимизнинг спортдаги фаол иштироки ва ютуқлари эътиборга лойиқ. Хусусан, “Умид ниҳоллари – 2025” мусобақаларида спортнинг кураш тури бўйича 9-синф ўқувчилари Ҳидоят Қурбонбоев ва Асилбек Жумабоевлар туман босқичида 1-ўринни эгаллаб, кейинги босқичда ҳам муносиб иштирок этдилар. Бу каби ютуқлар мактабимизда спортга бўлган қизиқиш ва унга яратилган шарт-шароитлар самараси эканини кўрсатади.

Бундан ташқари, 11-синф ўқувчиси Бекзод Раҳимбоев “Беш ташаббус олимпиадаси” доирасида ташкил этилган шашка мусобақасида 17 ёшгача бўлганлар ўртасида туман босқичида ғолибликни қўлга киритиб, кейинги босқичда ҳам муносиб иштирок этди.

Ёзги таътил — бу фақатгина дам олиш эмас, балки ўқувчиларнинг ўсиши, ривожланиши ва салоҳиятини юзага чиқариш учун муҳим даврдир. Ушбу жараён мактабда таълим-тарбиянинг узлуксизлигини таъминлаш билан бирга, ёш авлоднинг келажакда баркамол шахс сифатида шаклланишига асос бўлиб хизмат қилади.

Санжар Эшимов, мактабнинг олий тоифали жисмоний тарбия фани ўқитувчиси.