19-сонли мактабда спорт тўгараклари самарали фаолият юритмоқда

Ёш авлоднинг жисмоний ва маънавий ривожланиши, уларни соғлом турмуш тарзига йўналтиришда мактаблардаги спорт тўгараклари муҳим ўрин тутади. Спорт нафақат жисмоний ҳаракатлар йиғиндиси, балки саломатликни мустаҳкамловчи, руҳни тетиклаштирувчи ва иродани чиниқтирувчи воситадир.

Мактабларда ташкил этилган спорт машғулотлари ўқувчиларнинг бўш вақтини мазмунли ўтказишга ҳамда жисмоний фаолликни оширишга хизмат қилади. Ҳозирги замонда болалар орасида ҳаракатсизлик, нотўғри овқатланиш ва кўз касалликлари кўпайган бир пайтда, спорт машғулотлари муҳим профилактика воситасига айланмоқда.

Мактабимизда бу йўналишда бир қатор чора-тадбирлар амалга оширилмоқда. Жумладан, баскетбол, волейбол, бадминтон ва енгил атлетика бўйича ташкил этилган тўгараклар яхши самара бермоқда. Ўқувчилар ушбу машғулотларда ўз қобилиятларини намоён қилиб, турли мусобақаларда фаол иштирок этмоқда.

Хусусан, “Умид ниҳоллари – 2025” спорт мусобақаларида баскетбол бўйича 9–11-синф қизлар ўртасида ўтказилган баҳсларда мактабимиз жамоаси туман босқичида 3-ўринни эгаллади. Бу ютуқ ўқувчиларнинг ҳамжиҳатлиги ва машғулотлардаги интизоми натижасидир.

Енгил атлетика спорт турида ҳам ёшларимизнинг ютуқлари диққатга сазовор. 11-синф ўқувчиси Мухлиса Тўлибоева “Умид ниҳоллари – 2025” мусобақасининг туман босқичида 1-ўринга сазовор бўлди. Иккинчи босқичда эса эстафета югуриш йўналишида 3-ўринни қўлга киритди. Шунингдек, Мухлиса “Беш ташаббус олимпиадаси”нинг енгил атлетика мусобақаларида ҳам мактаб шарафини муносиб ҳимоя қилди.

Бундан ташқари 11-синфдан Роза Мададова ва Диана Турсунбаева, 10-синфдан эса Умида Ўринбаева ва Севинч Ражаббаева каби фаол ўқувчилар ҳам ўтказилаётган спорт мусобақаларида муносиб иштирок этмоқдалар.

Президентимизнинг ташаббуси билан мактаблар ёзги таътилда болалар учун фойдали билим ва кўникмаларга эга бўлиш, спорт ва маданият билан шуғулланиш учун махсус масканларга айлантирилмоқда. Бу мақсадда фан ва спорт машғулотлари ҳамда касб-ҳунарга йўналтирувчи дарслар ташкил этилмоқда. Мактабимизда ҳам ушбу вазифалар асосида ёзги таътил даври учун амалий чора-тадбирлар режаси ишлаб чиқилган.

Юқоридаги натижалар мактабимизда жисмоний тарбия ва спортга берилган эътиборнинг самараси ҳисобланади. Бу эса ўқитувчи ва ўқувчиларнинг биргаликда олиб бораётган фидокорона меҳнатининг натижасидир. Спорт тўгаракларидаги ютуқлар ёшларни соғлом турмуш тарзига, фаолликка ва интизомга йўналтиради.

Шукуржон Жумамуродова, 19-сонли умумтаълим мактабининг олий тоифали жисмоний тарбия ўқитувчиси.