Ғўза майдонларини суғориш бўйича амалий семинар бўлиб ўтди

Жорий йилнинг 30 май куни Амударё тумани Тўлқин овулидаги “Хидиров Самад” фермер хўжалиги пахта даласида ғўза майдонларида биринчи суғориш ишларини тўғри ташкил этиш бўйича амалий семинар бўлиб ўтди. Тадбирда Қорақалпоғистон Республикаси Вазирлар Кенгаши Раиси ўринбосари, қишлоқ хўжалиги вазири Шуҳрат Тешаев, туман ҳокими Собир Хўжаметов, шунингдек, тумандаги илғор фермерлар, агрономлар, сув хўжалиги мутахассислари ва бошқа соҳа вакиллари иштирок этдилар.

Семинар давомида мавзуга оид долзарб масалалар муҳокама қилиниб, сув ресурсларидан самарали фойдаланиш, биринчи суғоришни агротехник талабларга мувофиқ ташкил этиш, ҳосилдорликни ошириш ва сувни тежаш технологияларини жорий этиш масалаларига алоҳида эътибор қаратилди.

Қорақалпоғистон Республикаси Вазирлар Кенгаши Раиси ўринбосари, қишлоқ хўжалиги вазири Шуҳрат Тешаев ўз нутқида сув ресурсларидан оқилона фойдаланиш, далаларни суғориш жараёнида замонавий ёндашувларни жорий этиш ва фермерлар билан доимий ҳамкорликда ишлаш зарурлигини қайд этди.

Таъкидланганидек, пахта юртимиз қишлоқ хўжалигида етакчи экинлардан бири бўлиб, унинг парваришида ҳар бир агротехник тадбирнинг ўзига хос ўрни мавжуд. Айниқса, суғориш ишларини тўғри ва илмий асосда ташкил этиш пахта ҳосилдорлигини белгиловчи энг муҳим омиллардан биридир. Ғўза вегетацион давр мобайнида тупроқдаги намлик миқдорига сезгир бўлади. Биринчи суғориш, яъни ғўза илдизи чуқур туша бошлаган, тупроқда ҳарорат ва намлик балансини мувозанатда сақлаш зарур бўлган даврда ғўзани соғлом ўстириш ва келгусида гуллаш, ҳосил боғлаш жараёнини мустаҳкамловчи муҳим омилдир.

Шунингдек, ўз вақтида ва меъёрида суғориш ҳосилнинг ортиши, пахтанинг сифатли бўлиши ва тўлиқ пишиши учун кафолат саналади. Аксинча, нотўғри, кечиктирилган ёки ортиқча суғориш далада илдиз чириши, вегетациянинг сустлашуви ёки ҳатто ҳосилнинг камайиши каби салбий оқибатларга олиб келиши хусусида сўз юритилди.

Амударё тумани ҳокими Собир Хўжаметов семинар иштирокчиларига мурожаат қилиб, суғориш ишларини режалаштиришда аниқ ва тизимли ёндашув муҳимлигини қайд этди. Тумандаги ҳар бир фермер хўжалигида сув сарфи ва ҳосилдорлик ўртасида барқарор мувозанатни таъминлашга қаратилган чораларни кучайтириш бўйича кўрсатмалар берди.

Семинар доирасида “Хидиров Самад” фермер хўжалигининг пахта даласида амалий кўргазма ўтказилиб, иштирокчилар биринчи суғориш ишларининг бевосита ташкил этилиши ва технологик жараёнлар билан танишдилар. Мутахассислар томонидан томчилатиб суғориш усули, ернинг мелиоратив ҳолатини сақлаш ва сувни тежаш бўйича тавсиялар берилди.

Бу каби семинарлар пахта етиштиришда замонавий ёндашувни кенгайтириш, ресурслардан оқилона фойдаланиш ва қишлоқ хўжалигида барқарор натижаларга эришишда муҳим восита ҳисобланади.

Чарос Арслонова, туман ҳокимлигининг Ахборот хизмати раҳбари.