Gʻoʻza maydonlarini sugʻorish boʻyicha amaliy seminar boʻlib oʻtdi

Joriy yilning 30-may kuni Amudaryo tumani Toʻlqin ovulidagi “Xidirov Samad” fermer xoʻjaligi paxta dalasida gʻoʻza maydonlarida birinchi sugʻorish ishlarini toʻgʻri tashkil etish boʻyicha amaliy seminar boʻlib oʻtdi. Tadbirda Qoraqalpogʻiston Respublikasi Vazirlar Kengashi Raisi oʻrinbosari, qishloq xoʻjaligi vaziri Shuhrat Teshayev, tuman hokimi Sobir Xoʻjametov, shuningdek, tumandagi ilgʻor fermerlar, agronomlar, suv xoʻjaligi mutaxassislari va boshqa soha vakillari ishtirok etdilar.

Seminar davomida mavzuga oid dolzarb masalalar muhokama qilinib, suv resurslaridan samarali foydalanish, birinchi sugʻorishni agrotexnik talablarga muvofiq tashkil etish, hosildorlikni oshirish va suvni tejash texnologiyalarini joriy etish masalalariga alohida eʼtibor qaratildi.

Qoraqalpogʻiston Respublikasi Vazirlar Kengashi Raisi oʻrinbosari, qishloq xoʻjaligi vaziri Shuhrat Teshayev oʻz nutqida suv resurslaridan oqilona foydalanish, dalalarni sugʻorish jarayonida zamonaviy yondashuvlarni joriy etish va fermerlar bilan doimiy hamkorlikda ishlash zarurligini qayd etdi.

Taʼkidlanganidek, paxta yurtimiz qishloq xoʻjaligida yetakchi ekinlardan biri boʻlib, uning parvarishida har bir agrotexnik tadbirning oʻziga xos oʻrni mavjud. Ayniqsa, sugʻorish ishlarini toʻgʻri va ilmiy asosda tashkil etish paxta hosildorligini belgilovchi eng muhim omillardan biridir. Gʻoʻza vegetatsion davr mobaynida tuproqdagi namlik miqdoriga sezgir boʻladi. Birinchi sugʻorish, yaʼni gʻoʻza ildizi chuqur tusha boshlagan, tuproqda harorat va namlik balansini muvozanatda saqlash zarur boʻlgan davrda gʻoʻzani sogʻlom oʻstirish va kelgusida gullash, hosil bogʻlash jarayonini mustahkamlovchi muhim omildir.

Shuningdek, oʻz vaqtida va meʼyorida sugʻorish hosilning ortishi, paxtaning sifatli boʻlishi va toʻliq pishishi uchun kafolat sanaladi. Aksincha, notoʻgʻri, kechiktirilgan yoki ortiqcha sugʻorish dalada ildiz chirishi, vegetatsiyaning sustlashuvi yoki hatto hosilning kamayishi kabi salbiy oqibatlarga olib kelishi xususida soʻz yuritildi.

Amudaryo tumani hokimi Sobir Xoʻjametov seminar ishtirokchilariga murojaat qilib, sugʻorish ishlarini rejalashtirishda aniq va tizimli yondashuv muhimligini qayd etdi. Tumandagi har bir fermer xoʻjaligida suv sarfi va hosildorlik oʻrtasida barqaror muvozanatni taʼminlashga qaratilgan choralarni kuchaytirish boʻyicha koʻrsatmalar berdi.

Seminar doirasida “Xidirov Samad” fermer xoʻjaligining paxta dalasida amaliy koʻrgazma oʻtkazilib, ishtirokchilar birinchi sugʻorish ishlarining bevosita tashkil etilishi va texnologik jarayonlar bilan tanishdilar. Mutaxassislar tomonidan tomchilatib sugʻorish usuli, yerning meliorativ holatini saqlash va suvni tejash boʻyicha tavsiyalar berildi.

Bu kabi seminarlar paxta yetishtirishda zamonaviy yondashuvni kengaytirish, resurslardan oqilona foydalanish va qishloq xoʻjaligida barqaror natijalarga erishishda muhim vosita hisoblanadi.

Charos Arslonova, tuman hokimligining Axborot xizmati rahbari.