26-СОНЛИ МАКТАБДА "ДОЛЗАРБ 90 КУН" ЛОЙИҲАСИ МУВАФФАҚИЯТЛИ АМАЛГА ОШИРИЛМОҚДА

Таълим ва тарбия ишларида қачон муваффақиятга эришилади? Албатта, миллий-маънавий қадриятлар билан таълим-тарбиявий ишларнинг ўзаро уйғунлигида! Бола онгига назарий, илмий тафаккурни қанчалик зўр бериб сингдиришга ҳаракат қилманг, унда маънавий руҳ бўлмаса, боланинг ўзини англаш қобилияти сустлигича қолаверади. Шу боис, мамлакатимизда ёшларга оид давлат сиёсатини ҳаётга кенг жорий этишда маънавият билан маърифат – таълимнинг узвийлигига алоҳида эътибор қаратилади.

Ўсиб келаётган ёш авлоднинг миллий ўзликни англаш, уларни ўз қизиқишлари ва қобилиятлари доирасида ривожлантириш, бобомерос қадриятларга ҳурмат ва эҳтиром, ватанпарварлик руҳида тарбиялаш борасидаги чора-тадбирлар, бўш вақтларини мазмунли ўтказишга хизмат қилувчи саъй-ҳаракатларнинг барчаси ана шу мезонлар асосида амалга оширилади. Айниқса, бу каби ишлар умумтаълим мактаблари ўқувчиларининг ёзги таътил мавсумини мазмунли ўтказишга қаратилган режавий тадбирларда яққол намоён бўлади.

Бутун мамлакатимизда бўлгани каби Амударё тумани Мактабгача ва мактаб таълими бўлими тасарруфидаги умумтаълим мактаблари ўқувчилари ҳам 2024-2025 ўқув йилининг ёзги таътил дамларини бири-биридан қизиқарли кўнгилочар тадбирлар, турли спорт мусобақалари, кекса авлод вакиллари билан учрашувлар ва давра суҳбатларида иштирок этиш, таътил вақтида ташкиллаштирилган тўгараклар машғулотларида қатнашиш орқали ёқимли ва кўнгилли тарзда ўтказишмоқда.

Президентимиз ташаббуслари билан ёшлар ҳаётига кенг жорий этилаётган “Долзарб 90 кун” лойиҳаси доирасидаги тадбирларда ўқувчи-ёшлар нафақат интилиш ва қизиқишлари, балки иқтидор ва қобилиятларини, шу билан бирга миллий-маънавий қадриятларимизга бўлган чексиз ҳурмат-эътиборларини амалда намоён этишмоқда.

Жорий йилнинг 5 июнь санасида Амударё туман Мактабгача ва мактаб таълими бўлими тасарруфидаги 26-сонли умумтаълим мактабида “Биз келажак бунёдкорларимиз!” шиори остида бўлиб ўтган маънавий-маърифий, адабий-мусиқий тадбир ўзининг тарбиявий ва таълимий ҳамда ўсиб келаётган ёш авлодни юксак маънавият сари ундовчи даъваткор руҳда ташкиллаштирилгани билан иштирокчиларга ёрқин таассуротлар бағишлади.

Тадбир аввалида мазкур таълим муассасасида ташкил қилинган инглиз тили ва математика тўгараклари аъзоларининг 2024-2025 ўқув йили давомида эришган ютуқлари, шунингдек, мазкур тўгаракларда “Долзарб 90 кун” лойиҳаси доирасида ёзги таътил пайтида амалга оширилиши режалаштирилган таълимий дастурлар ҳамда янгиликлар намойиш этилди.

Шунингдек, шахмат-шашка тўгараклари фаолияти ҳақида ҳикоя қилувчи лавҳалар, мактаб ҳаваскор театр жамоаси томонидан тайёрланган қўғирчоқ театри спектакллари тадбир иштирокчиларининг самимий олқишлари билан кутиб олинди. Айниқса, мактабнинг масъул ўқитувчилари томонидан замонавий касб-ҳунарлар хусусида тақдим этилган маълумотлар ўқувчи-ёшларда катта қизиқиш уйғотди.

Бундан ташқари, ёзги таътил даврида ўқувчи-ёшларнинг бўш вақтларини мазмунли ўтказишга қаратилган ва уларнинг интилиш ва қобилиятларини юзага чиқаришларини таъминлашга хизмат қилувчи интерактив тренинглар ҳам ташкил этилмоқда. Мактабнинг юқори синф ўқувчиларидан иборат “Пазанда қизлар” тўгараги аъзолари карвинг усулида турли хил мева ва сабзавотлардан витаминга бой салатлар, ассортилар тайёрлашди.

“Баркамол авлод” болалар мактаби томонидан таълим муассасасида ташкил қилинган бичиш-тикиш, тўқиш тўгараклари аъзоларининг амалий ишлари ҳам кўргазма сифатида намойиш этилди. Мазкур кўргазма мактаб ўқувчиларининг ўз келажагига бефарқ бўлмаган масъулиятли, билимдон, интилувчан ёшлар сифатида вояга етаётганининг амалий ифодаси бўлди.

Мактабда бўлиб ўтган “Долзарб 90 кун” доирасидаги тадбир тўрт авлод вакилларини ягона бир мақсад – ўсиб келаётган ёш авлодни ҳар томонлама етук ва баркамол инсонлар қилиб тарбиялашдек эзгу мақсад йўлида бир даврага жамлагани билан жуда катта маънавий-маърифий ва тарбиявий аҳамият касб этди.

“Биз келажак бунёдкорларимиз!” шиори остида ўтган тадбир 26-сонли мактабни 1985 йилда тамомлаган собиқ ўқувчилар, уларга таълим-тарбия берган катта авлод вакиллари – фахрий ўқитувчилар, мактабни жорий ўқув йилида тамомлаётган битирувчилар ҳамда муассасада таҳсилни давом эттираётган ва ёзги таътилда мароқли дам олаётган ўқувчи-ёшларнинг самимий, дилдан мулоқотлари билан иштирокчиларга янада жўшқин ва кўтаринки кайфият улашди.

Тадбирда иштирок этган “Нуроний” жамғармаси Амударё туман бўлинмаси жамоатчилик Кенгаши раиси Бекман Алламберганов, туман Маънавият ва маърифат маркази раҳбари Ислом Маткаримов ҳамда Амударё туман Мактабгача ва мактаб таълими бўлими ходими Зафар Абдуллаевлар 26-сонли мактаб педагогика жамоаси билан ота-оналарнинг ўзаро ҳамкорлиги ўқувчи-ёшларнинг интилишларида, амалга оширилаётган ижобий ишларда ўз аксини топаётганини мамнуният билан қайд этдилар.

Тадбир мактабда ташкил қилинган бадиий ҳаваскорлар жамоаси томонидан тайёрланган концерт дастури билан давом этди ва санъатга ошно ўқувчи-ёшлар ижросидаги она Ватан, дўстлик ва тинчликни, эзгуликни мадҳ этувчи куй-қўшиқлар, дилбар рақслар барчага қувонч, хуш кайфият улашди.

РОБИЯ ЙЎЛДОШЕВА.