26-SONLI MAKTABDA "DOLZARB 90 KUN" LOYIHASI MUVAFFAQIYaTLI AMALGA OShIRILMOQDA

Taʼlim va tarbiya ishlarida qachon muvaffaqiyatga erishiladi? Albatta, milliy-maʼnaviy qadriyatlar bilan taʼlim-tarbiyaviy ishlarning oʻzaro uygʻunligida! Bola ongiga nazariy, ilmiy tafakkurni qanchalik zoʻr berib singdirishga harakat qilmang, unda maʼnaviy ruh boʻlmasa, bolaning oʻzini anglash qobiliyati sustligicha qolaveradi. Shu bois, mamlakatimizda yoshlarga oid davlat siyosatini hayotga keng joriy etishda maʼnaviyat bilan maʼrifat – taʼlimning uzviyligiga alohida eʼtibor qaratiladi.

Oʻsib kelayotgan yosh avlodning milliy oʻzlikni anglash, ularni oʻz qiziqishlari va qobiliyatlari doirasida rivojlantirish, bobomeros qadriyatlarga hurmat va ehtirom, vatanparvarlik ruhida tarbiyalash borasidagi chora-tadbirlar, boʻsh vaqtlarini mazmunli oʻtkazishga xizmat qiluvchi saʼy-harakatlarning barchasi ana shu mezonlar asosida amalga oshiriladi. Ayniqsa, bu kabi ishlar umumtaʼlim maktablari oʻquvchilarining yozgi taʼtil mavsumini mazmunli oʻtkazishga qaratilgan rejaviy tadbirlarda yaqqol namoyon boʻladi.

Butun mamlakatimizda boʻlgani kabi Amudaryo tumani Maktabgacha va maktab taʼlimi boʻlimi tasarrufidagi umumtaʼlim maktablari oʻquvchilari ham 2024-2025 oʻquv yilining yozgi taʼtil damlarini biri-biridan qiziqarli koʻngilochar tadbirlar, turli sport musobaqalari, keksa avlod vakillari bilan uchrashuvlar va davra suhbatlarida ishtirok etish, taʼtil vaqtida tashkillashtirilgan toʻgaraklar mashgʻulotlarida qatnashish orqali yoqimli va koʻngilli tarzda oʻtkazishmoqda.

Prezidentimiz tashabbuslari bilan yoshlar hayotiga keng joriy etilayotgan “Dolzarb 90 kun” loyihasi doirasidagi tadbirlarda oʻquvchi-yoshlar nafaqat intilish va qiziqishlari, balki iqtidor va qobiliyatlarini, shu bilan birga milliy-maʼnaviy qadriyatlarimizga boʻlgan cheksiz hurmat-eʼtiborlarini amalda namoyon etishmoqda.

Joriy yilning 5-iyun sanasida Amudaryo tuman Maktabgacha va maktab taʼlimi boʻlimi tasarrufidagi 26-sonli umumtaʼlim maktabida “Biz kelajak bunyodkorlarimiz!” shiori ostida boʻlib oʻtgan maʼnaviy-maʼrifiy, adabiy-musiqiy tadbir oʻzining tarbiyaviy va taʼlimiy hamda oʻsib kelayotgan yosh avlodni yuksak maʼnaviyat sari undovchi daʼvatkor ruhda tashkillashtirilgani bilan ishtirokchilarga yorqin taassurotlar bagʻishladi.

Tadbir avvalida mazkur taʼlim muassasasida tashkil qilingan ingliz tili va matematika toʻgaraklari aʼzolarining 2024-2025 oʻquv yili davomida erishgan yutuqlari, shuningdek, mazkur toʻgaraklarda “Dolzarb 90 kun” loyihasi doirasida yozgi taʼtil paytida amalga oshirilishi rejalashtirilgan taʼlimiy dasturlar hamda yangiliklar namoyish etildi.

Shuningdek, shaxmat-shashka toʻgaraklari faoliyati haqida hikoya qiluvchi lavhalar, maktab havaskor teatr jamoasi tomonidan tayyorlangan qoʻgʻirchoq teatri spektakllari tadbir ishtirokchilarining samimiy olqishlari bilan kutib olindi. Ayniqsa, maktabning masʼul oʻqituvchilari tomonidan zamonaviy kasb-hunarlar xususida taqdim etilgan maʼlumotlar oʻquvchi-yoshlarda katta qiziqish uygʻotdi.

Bundan tashqari, yozgi taʼtil davrida oʻquvchi-yoshlarning boʻsh vaqtlarini mazmunli oʻtkazishga qaratilgan va ularning intilish va qobiliyatlarini yuzaga chiqarishlarini taʼminlashga xizmat qiluvchi interaktiv treninglar ham tashkil etilmoqda. Maktabning yuqori sinf oʻquvchilaridan iborat “Pazanda qizlar” toʻgaragi aʼzolari karving usulida turli xil meva va sabzavotlardan vitaminga boy salatlar, assortilar tayyorlashdi.

“Barkamol avlod” bolalar maktabi tomonidan taʼlim muassasasida tashkil qilingan bichish-tikish, toʻqish toʻgaraklari aʼzolarining amaliy ishlari ham koʻrgazma sifatida namoyish etildi. Mazkur koʻrgazma maktab oʻquvchilarining oʻz kelajagiga befarq boʻlmagan masʼuliyatli, bilimdon, intiluvchan yoshlar sifatida voyaga yetayotganining amaliy ifodasi boʻldi.

Maktabda boʻlib oʻtgan “Dolzarb 90 kun” doirasidagi tadbir toʻrt avlod vakillarini yagona bir maqsad – oʻsib kelayotgan yosh avlodni har tomonlama yetuk va barkamol insonlar qilib tarbiyalashdek ezgu maqsad yoʻlida bir davraga jamlagani bilan juda katta maʼnaviy-maʼrifiy va tarbiyaviy ahamiyat kasb etdi.

“Biz kelajak bunyodkorlarimiz!” shiori ostida oʻtgan tadbir 26-sonli maktabni 1985-yilda tamomlagan sobiq oʻquvchilar, ularga taʼlim-tarbiya bergan katta avlod vakillari – faxriy oʻqituvchilar, maktabni joriy oʻquv yilida tamomlayotgan bitiruvchilar hamda muassasada tahsilni davom ettirayotgan va yozgi taʼtilda maroqli dam olayotgan oʻquvchi-yoshlarning samimiy, dildan muloqotlari bilan ishtirokchilarga yanada joʻshqin va koʻtarinki kayfiyat ulashdi.

Tadbirda ishtirok etgan “Nuroniy” jamgʻarmasi Amudaryo tuman boʻlinmasi jamoatchilik Kengashi raisi Bekman Allamberganov, tuman Maʼnaviyat va maʼrifat markazi rahbari Islom Matkarimov hamda Amudaryo tuman Maktabgacha va maktab taʼlimi boʻlimi xodimi Zafar Abdullayevlar 26-sonli maktab pedagogika jamoasi bilan ota-onalarning oʻzaro hamkorligi oʻquvchi-yoshlarning intilishlarida, amalga oshirilayotgan ijobiy ishlarda oʻz aksini topayotganini mamnuniyat bilan qayd etdilar.

Tadbir maktabda tashkil qilingan badiiy havaskorlar jamoasi tomonidan tayyorlangan kontsert dasturi bilan davom etdi va sanʼatga oshno oʻquvchi-yoshlar ijrosidagi ona Vatan, doʻstlik va tinchlikni, ezgulikni madh etuvchi kuy-qoʻshiqlar, dilbar raqslar barchaga quvonch, xush kayfiyat ulashdi.

ROBIYa YOʻLDOShEVA.