“Қумли овул” фермер хўжалигида ғалла ўрим-йиғим ишлари авжида

Айни кунларда Амударё туманидаги ҳосилдор дала майдонларида бободеҳқонлар ҳамда миришкор фермерлар учун йилнинг энг масъулиятли ва меҳнатталаб палла — ғалла ўрим-йиғим ишлари бошланди. Бу палла деҳқон учун имтиҳон. Юртнинг озиқ-овқат хавфсизлиги эса айнан шу имтиҳон натижасига боғлиқ. Йил давомида сидқидилдан қилинган меҳнат, яхши ният билан ерга ташланган уруғ бугун ўз самарасини кўрсатмоқда. Эндиги вазифа — ҳосилни ўз вақтида ва йўқотишларсиз йиғиб олиб, юксак ғалла хирмонини бунёд этишдир.

Туманда мавсумга пухта тайёргарлик кўрилган. Ғалла ўрим-йиғим ишларини самарали ташкил этиш, техникаларни ишга шай ҳолатга келтириш, мутахассисларни жалб қилиш ва хавфсизликни таъминлаш юзасидан аниқ режалар асосида иш олиб борилмоқда.

Жорий йилда тумандаги 270 та фермер хўжалиги томонидан 4 минг 800 гектар майдонга буғдой экилган. Ушбу ерлардан олинган ҳосилнинг 11 минг 130 тоннасини контрактация шартномаси асосида қабул масканларига топшириш режалаштирилган. Ялпи ҳосилнинг қолган қисми эса фермерлар ва деҳқонлар ихтиёрида қолади.

Туманнинг Холимбег овулида фаолият юритаётган “Қумли овул” фермер хўжалиги раиси, кўп йиллик тажрибага эга фермер Отабек Йўлдошев бошчилигидаги жамоа бу йил 13 гектар майдонга буғдой экиб, 40 тонна ҳосилни контрактация шартномаси асосида сотишни мақсад қилган. Барча агротехник тадбирлар ўз вақтида амалга оширилгани боис далаларда мўл ҳосил етиштирилди.

Юқори ҳосилга эришиш учун сидқидилдан меҳнат қилиш, тупроқ билан тиллашиш, парвариш ишларини ўз вақтида ва тўғри амалга ошириш талаб этилади. Далада ҳосил мўл бўлса, эл дастурхони ҳам тўкин бўлади. Ана шунда деҳқон ўз мақсадига етади.

Мавсум давомида ишлар аниқ режа асосида ташкил этилган. Жумладан, туманда 23 та махсус отряд тузилган бўлиб, ҳар бирига 3 нафардан мутахассис бириктирилган. Бу жамоалар таркибида 23 нафар отряд раҳбари, 23 нафар ички ишлар бўлими ходими ҳамда 23 нафар Фавқулодда вазиятлар бошқармаси вакили фаолият олиб бормоқда. Бундай чора-тадбирлар ўрим самарадорлигини ошириш ва хавфсизликни таъминлашга хизмат қилмоқда.

Ғалла ўриш ишларини сифатли ва қисқа муддатда амалга ошириш мақсадида 131 та қишлоқ хўжалиги техникаси, жумладан, 18 та замонавий ғалла ўриш комбайни, юк ташувчи воситалар ҳамда бошқа зарур техникалар жалб этилган. Ҳар бир техника тўлиқ профилактикадан ўтказилган, хизматга шай ҳолатда. Дала ишлари мунтазам назорат қилинаётгани эса иш самарадорлигига ижобий таъсир кўрсатмоқда.

Деҳқон учун энг улуғ мукофот — хирмонлар тўлиб, эл дастурхонида тўкинлик ҳукм суриши. Миришкорлар меҳнати самарасида омборлар донга тўлмоқда.

Тумандаги фермерлар бу йил ҳам ҳалол меҳнат самарасини яқин кунларда намоён этади. Агар ҳосил тўлиқ ва сифатли йиғиб олинса, омборлар дон билан тўлади, халқ дастурхонида тўкинлик бўлади. Деҳқоннинг хирмони тўлса — юртда барака бўлади.

Бу — фақат деҳқоннинг ютуғи эмас, балки бутун халқ дастурхонидаги тўкинлик, фаровонлик тимсолидир. Чунки ҳар бир бошоқ дон ортида ҳалол меҳнат, юрт фаровонлигини таъминлаш масъулияти туради.

Шоҳзод Қурбонбоев.