Нукус шаҳрида иқлим ўзгариши ва экологик барқарорлик бўйича халқаро семинар-тренинг ўтказилди

Сўнгги йилларда иқлим ўзгариши бутун дунёда долзарб муаммога айланди. Ушбу жараён қишлоқ хўжалиги, иқтисодиёт, атроф-муҳит ва инсон саломатлигига салбий таъсир кўрсатмоқда. Айниқса, экологик мувозанатни сақлаш ва ер ҳамда сув ресурсларидан оқилона фойдаланиш борасида жиддий ёндашув талаб этилмоқда.

Мана шундай шароитда, жорий йил 13 июнь куни Нукус шаҳридаги “Оқ қуш” комплексида “Ўзбекистонда иқлим ўзгариши шароитида ақлли қишлоқ хўжалиги” мавзусида халқаро семинар-тренинг ўз ишини бошлади. Икки кун давом этган мазкур тадбир иқлим ўзгариши шароитида қишлоқ хўжалигини ривожлантириш, экологик барқарорликни таъминлаш ва замонавий, инновацион ёндашувлар асосида “ақлли қишлоқ хўжалиги”ни жорий этиш масалаларига бағишланди.

Семинарнинг очилиш маросимида Қорақалпоғистон Республикаси Жўқорғи Кенгеси раисининг ўринбосари Рустам Сапарбаев сўзга чиқиб, мазкур тадбир минтақадаги долзарб муаммоларни илмий-амалий ёндашув асосида ҳал этишда муҳим ўрин тутиши ҳақида алоҳида тўхталиб ўтди.

Шунингдек, тадбирда Ўзбекистон Республикаси Қишлоқ хўжалиги вазири ўринбосари Алишер Шукуров, Жаҳон банкининг қишлоқ хўжалиги бўйича катта иқтисодчиси, доктор Пиерре Гербер, Қишлоқ хўжалигида фан ва инновациялар миллий маркази директори, профессор Шодмон Намозов, Тошкент давлат аграр университети ректори, профессор Нарзулла Обломурадов, Қорақалпоғистон қишлоқ хўжалиги ва агротехнологиялар институти ректори Бердиёр Жўллибековлар ҳам сўзга чиқиб, иқлим ўзгаришига қарши курашиш, экологик барқарорликни таъминлаш ва бу соҳадаги илмий ҳамкорликлар аҳамияти ҳақида фикр билдиришди.

Семинар давомида иқлим ўзгаришининг қишлоқ хўжалиги, бозор иқтисодиёти, аҳоли саломатлиги, тупроқ ва экологик тизимларга салбий таъсири ҳақида мутахассислар ўз маърузаларини тақдим этишди. Жаҳон ва маҳаллий тажрибаларга асосланган ҳолда иқлим ўзгаришини юмшатиш, сув ва ер ресурсларидан оқилона фойдаланиш, “ақлли қишлоқ хўжалиги”ни жорий этиш борасида амалий таклиф ва тавсиялар муҳокама қилинди.

Семинарнинг иккинчи куни — 14 июнь санасида иштирокчилар учун амалий саёҳат ташкил этилди. Қорақалпоғистон қишлоқ хўжалиги ва агротехнологиялар институти ректори Бердиёр Жўллибеков бошчилигида иштирокчилар Мўйноқ туманига ташриф буюришди. У ерда авваламбор 1990 йилларда қуриган Орол денгизи тубига экилган саксовул майдонлари кўздан кечирилди. Мазкур ҳудуддаги ўсимликларнинг ўсиш жараёнига таъсир этувчи салбий омиллар муҳокама қилинди.

Шунингдек, Орол тубида ташкил этилган махсус илмий тадқиқот станциясида олиб борилаётган ишлар билан яқиндан танишилди. Олимлар иқлим шароитининг кескин ўзгарувчанлигига қарамай, тадқиқотлар изчил олиб борилаётганини таъкидлашди.

Саёҳатнинг навбатдаги манзили Мўйноқ давлат ўрмон хўжалиги қошидаги илмий тадқиқот бўлими бўлди. Бу ерда ҳудудни кўкаламзорлаштириш, экологик барқарорликни таъминлаш борасида амалга оширилаётган ишлар иштирокчиларда катта қизиқиш уйғотди.

Шунингдек, Мўйноқ шаҳрида жойлашган Орол денгизи тарихи музейига ташриф уюштирилди. Музейда бир пайтлар денгизда сузган кемалар, балиқчиларнинг меҳнат қуроллари, Орол бўйида яшаган ҳайвонот дунёси, маҳаллий саноат маҳсулотлари ва бошқа тарихий ёдгорликлар намойиш этилди. Ушбу музей тадбир иштирокчиларида катта таассурот қолдирди.

Мазкур семинар-тренинг нафақат тажриба алмашиш майдонига айланди, балки иқлим ўзгариши ва экологик муаммоларни бартараф этиш бўйича халқаро даражада ечим топишга хизмат қилувчи муҳим платформа бўлди. Ушбу тадбир иқлим муаммоларини ҳал этишда мулоқот, ҳамкорлик ва тажриба алмашишнинг нақадар муҳим эканини яна бир бор тасдиқлади.

Шоҳзод Қурбонбоев